ՍԱՂՄՈՍՆԵՐ 136 - Նոր Էջմիածին Աստվածաշունչ

1 Սաղմոս Երեմիայի

¹ Սաղմոս Երեմիայի Այնտեղ՝ բաբելացիների գետերի մոտ, Նստում էինք ու լաց լինում Սիոնը հիշելիս։

² Նրանց ուռիներից էինք կախել մեր քնարները։ Այնտեղ մեզ գերողներն օրհնության խոսքեր էին ուզում,

³ Մեզ գերեվարողները ստիպում էին մեզ և ասում. «Մեզ երգե՛ր ասեք օրհնությունից Սիոնի»։

⁴ Բայց ինչպե՞ս երգենք օտար երկրում Օրհնությունները Տիրոջ։

⁵ Եթե մոռանամ ես քեզ, Երուսաղե՛մ, Թող իմ աջը մոռանա ինձ, Թե չհիշեմ քեզ,

⁶ Թող լեզուս կցվի քիմքիս, Եթե քո նվագը նախ չնվագեմ, ո՜վ Երուսաղեմ, Սկի՛զբն իմ ուրախության։

⁷ Տե՛ր, հիշի՛ր Եդովմի որդիներին, Որ Երուսաղեմի անկմանը ասում էին. «Քանդե՛ք, քանդե՛ք, Հիմնահատակ քանդե՛ք»։

⁸ Ո՜վ թշվառական՝ դո՛ւստր բաբելացիների, Երանի՜ նրան, որ կհատուցի քեզ, Ինչպես դու հատուցեցիր մեզ։

⁹ Երանի՜ նրան, որ կառնի քո մանուկներին Եվ քարին կհարվածի։