Ա ԵԶՐԱՍ 3 - Նոր Էջմիածին Աստվածաշունչ

Թագավորի թիկնապահների մրցումը

¹ Դարեհ թագավորը մեծ խնջույք արեց և հրավիրեց իր բոլոր պալատականներին ու ազգակիցներին, ինչպես նաև Մարաստանի, Պարսից աշխարհի և քաղդեացիների բոլոր մեծամեծներին,

² Հնդկաստանի կողմերից մինչև Եթովպիայի կողմերի հարյուր քսանյոթ սատրապությունների նախարարներին, զորագլուխներին ու կուսակալներին։

³ Նրանք կերան, խմեցին, հագեցան և ուրախացան։ Երբ խնջույքն ավարտվեց, Դարեհ թագավորը մտավ իր սենյակը և ելնելով իր գահույքի վրա՝ քնեց։

⁴ Այնժամ երեք պատանիներ, որ նրա սենեկապաններն էին, մինչ թագավորը քնած էր, և իրենք սենյակի ներսում պահպանում էին նրան, խոսեցին միմյանց հետ և ասացին.

⁵ «Եկեք յուրաքանչյուրս մի բան ասենք, և ում խոսքը գերազանցի իմաստությամբ, քան իր ընկերներինը, Դարեհ թագավորը թող նրան մեծամեծ պարգևներ տա, և նա բոլորից ավելի մեծ ու անվանի դառնա,

⁶ թող նա ծիրանի հագնի, ոսկե սպասքով խմի և ուտի, ոսկեղենի վրա նստի և ննջի, ոսկեսանձ երիվար վարի, բեհեզյա խույր դնի իր գլխին և ոսկե մանյակ՝ իր պարանոցին

⁷ և իր իմաստության համար Դարեհի երկրորդ աթոռին նստի ու Դարեհի ազգական անվանվի»։

⁸ Այնժամ ամեն մեկը գրելով իր խոսքը, կնքեցին և դրեցին Դարեհ արքայի սնարի տակ՝ ասելով.

⁹ «Երբ արթնանա, այդ գրությունները կտանք նրան. թագավորն ու պարսից երեք մեծամեծ իշխանները կընտրեն, և ում խոսքն ավելի իմաստուն լինի, նրան կտրվի հաղթողի պարգևը»։

¹⁰ Առաջինը գրեց. «Ամեն ինչից ավելի հաղթող և հզոր է գինին»։

¹¹ Երկրորդը գրեց. «Ամեն ինչից ավելի հաղթող և հզոր է թագավորը»։

¹² Երրորդը գրեց. «Ամեն ինչից հաղթող և հզոր են կանայք, սակայն ամեն ինչից ավելի հաղթում է ճշմարտությունը»։

¹³ Եվ երբ թագավորն արթնացավ, վերցնելով գրվածքները, որ տվեցին իրեն, կարդաց,

¹⁴ ապա կանչել տվեց Պարսից աշխարհի և Մարաստանի բոլոր մեծամեծներին, նախարարներին, սպարապետներին, կուսակալներին ու իշխաններին։ Եվ նստելով դահլիճում, գրվածքները կարդացվեցին բոլորի առաջ։

¹⁵ Թագավորն ասաց. «Կանչե՛ք այստեղ պատանիներին, և թող նրանք մեկնեն իրենց գրած խոսքերը»։ Երբ նրանք ներս կանչվեցին,

¹⁶ նրանց ասացին. «Բացատրե՛ք մեզ ձեր գրածները»։

Գինու գովքի ճառը

¹⁷ Սկսեց խոսել առաջինը, որ գրել էր գինու զորության մասին, ասելով այսպես.

¹⁸ «Ո՜վ այրեր, ինչպե՞ս գինին հզոր չէ, քանի որ հիմարացնում է այն բոլոր մարդկանց մտքերը, ովքեր խմում են այն,

¹⁹ թե թագավորների և թե տառապողների մտքերը մեկ է դարձնում, ինչպես նաև տիրոջ և ծառայի, հարուստի և աղքատի։

²⁰ Բոլորի մտքերը դարձնում-շրջում է դեպի ուրախություն, և նրանք երբեք չեն հիշում ո՛չ տրտմություն և ո՛չ էլ ցավ։

²¹ Որովհետև բոլորի սրտերը լցնում է զվարթությամբ ու հարստության զգացումով, և չեն հիշում ո՛չ թագավոր, ո՛չ նախարար, մեծ-մեծ խոսել է տալիս։

²² Երբ խմում են, չեն հիշում սիրելիներին, եղբայրներին ու թշնամիներին, հաճախ էլ սուր են ճոճում։

²³ Եվ երբ սթափվում են գինուց, չեն հիշում թե ի՛նչ են արել։

²⁴ Ո՜վ մարդիկ, ինչպե՞ս գինին հզոր չէ, որ ստիպում է գործել այս ամենը»։ Եվ այս ասելով՝ լռեց։