1 Samwel 13 - Gooti Toolluro Yogalokwono

Isuraiyolda'ai tooro Filistiyada'ai toorai molo kwiyopo tovinokwono

¹ To'no'gwowi Soolol 40-pela kworomokwe tool a'mwo aguto kig sumo'nokaikono. Toro toolluro mido mollomwalo yoduke tov kworomo pullal kuuwolo'nokaikono.

² Toro te Soolol a'mwo aguto kig imo'nyuno sumaiyokwe Isuraiyolda'ai tonyu mollu'bworumwallo'no 3,000 a'mwo mollurogudo pworai ajesokaikono. Toro me'no jesuno sumaiyokwe a'mwo majesungiko gabovo tooraino'gwowi kemi ago tomuuno aikomgu amodapiyokaikono. Toro modapino sumaiyokwe a'mwo mollurogudo ajesoka su tooraida'ai 2,000 pworo gavuge mwalpino'moneyokwe muumuudo Betel tomuu kwako Mikimas towai kuumwallokarogano. Aki 1,000 a'mwo mollurogudo pworai gamoro muugunyo Joonataneke amorapiyokaikono. Toro amorapiyoka su tooro Bejamenolluro iko tovasuda'ai tooravuro kwako Gibiya towai'no avlavoporogano.

³ Toro te Joonataneke'aro a'mwo mollurogudo amorapiyoka su toorogai'aro tooro plaino sumaveyokwe wagwolago Geba towai Filistiyada'ai toorai molo wiyo'mno kuuwolovoporogano. Toro kuuwolovopo tovino Filistiyada'ai pworo wuu'no'mno Isuraiyolda'ai toorai molo wiyo'mo soporogano. Toro yodopure toga a'mwo aguto kig Soolol gami a'mwo mollurogudo pworai ju'bworomallo'moneyokwe a'mwo pworai amodapiyokaikono. Toro amodapiyoka tooro yiuwi'nokai Isuraiyolda'ai ton mwalodupudo tomuu yomollo'mno biugel tokwe kirapiyodupu deko aro adomolloporogano. “Kevu yiuwi'nokai Hibruu a'mwo toorekul kaduko neya duu'nyulo.” Adomolloporogano.

⁴ Toro domolluno sumaveyokwe aki aro kuudoporogano. “Soolol Filistiyada'ai a'mwo mollurogudo toorai molo wiyo'no kuuwolo'mwa'jukekono. Toro tovino tov Filistiyada'ai tooro nemi molo nekullo'mo sadokwovo.” Kuudoporogano. Toro kuudopo tovi Isuraiyolda'ai tooro wuu'nyuno sumaveyokwe Soolollu molluullo'moneyokwe wagwolago Gilgal'no bo'mno abuuru'maroporogano.

⁵ Toro buuru'ma'dopure toorai Filistiyada'ai tooro molo wiyo'moneyokwe su'bwo'noporogano. Toro su'bwo'nopo tooro arorogano. 30,000 molo mollo'mo karis toorogai'aro 6,000 a'mwo hoos toorai mokavlaiyokwe toorogai'aro aki a'mwo mollurogudo bwotonyago toorogai'aro tooro su'bwo'noporogano. Soolwarovuro wolo tovida'ai we'gullugulludo bwotonyago wo'dupudo tonbusuko kubalno a'mwo mollurogudo su'bwo'nopo su toorai ku'nono majagiloporogano. Toro tooro i'bwo'nyuno sumaveyokwe wagwolago Betavenda'ai imgu kuujo tool sulopiyamoka tomuuno avlavoporogano. Toro plaino sumaveyokwe wagwolago Mikimas toru ki'movo'mno kemi woromollo'mo sel ago ton amodoporogano.

⁶ Toro mojuno sumaveyokwe Isuraiyolda'ai toorai molo guureji kwiyoporogano. Toro wiyodopure tovi Isuraiyolda'ai tooro wono'mno adoporogano. “Nevu ku'nono muuwolowanonogano.” Toro juno sumaveyokwe lukado avlavoporogano. Toro plaino sumaveyokwe judo'no judo'no aro tomuu yiulo apuu'naroporogano. Sumago tomge'aro sumwallago tomge'aro sulkuumwiyo tomge'aro kuuraibuuso tomgu'aro wonyo buugo alsovomwollosungiko toorogai'aro yiuwi'nokai su tomuu yiulo apuu'naroporogano.

^7-8 Aki Hibruu a'mwo su tooravuro pworo wonyo Joodanovi igo'mgu iloga'mova'mno Gatuda'ai toorogai'aro Giliyatda'ai toorogai'aro tooravuro kwako tomuuno lukado avlavoporogano. Lukado toro pla'mdopure toga Soolol wagwolago Gilgal toru mwalo'no Samwelol abonyuru'maroneyokwe sogwollo kwinyajukekono. Samwelol sumdomgu Soolollu aro me'no kuudokaikono. “Iruko 7-pela tobuul me'no plawo'ji toga nuu gumi noboguru'ma'monyugono.” Samwelol toro me'no kuudoka tovi Soolol iruko 7-pela tobuullu sogwollo kwinoka kuvi kuruv Samwelol yere mabuuru'marokaikono. Soolol toro sogwollo kinoduke toga gamoro a'mwo mollurogudo pworo kweke amwallajupo tooro Filistiyada'ai tooraino wuu'no'mno bu'buto soporogano. Toro ino sumaveyokwe a'mwo Sooleke mwalodupudo su tooraida'ai pworo Soolollu uugollu'mo'mdupu sounopiyoporogano.

⁹ Toro younopiyodopure tovino tov Soolol a'mwo gavuge amwalopo pworai aro amodapiyokaikono. “Kevu plavopi romiroudapiyo'moneyokwe buulmokauworodeyo pworai donumokabilo. Toro amokabupi su tooro pworo duko tovi yiunokuudo nopiyono'moneyokwe romiroudapiyo'moneyokwerogano. Pworo sumwoluko puru'mono wosunyo'moneyokwe romiroudapiyo'moneyokwerogano. Toro toorai donumokabilo.” Amodapiyokaikono. Toro amodapiyoka tovi mokabino sumaveyokwe Soolol duko tovi yiunokuudo nopiyono'moneyokwe su toorai aromiroudapiyokaikono.

¹⁰ Toro me'no romiroudapiyoduke kuga'gwo kuuno Samwelol abai'movokaikono. Toro bai'mo'mduke toollu Soolol ilaiyo mollomallo'moneyokwe kuuru'marokaikono.

¹¹ Toro wuuru'malluno sumaiyokwe ilaiyo amollomaroka kwollu kuruv Samwelol aro samuugojokaikono. “Guu buro'nyo sumadekudukono?” Toro samuugojoka tovi Soolol aro kuudokaikono. “Guu mi bonyuru'mallo'mo iruko tollugwoji sogwollo agino kweku kuruv yere mabonyuru'ma'modekugono. Aki guu yere mabonyuru'ma'dore toga numoro a'mwo mollurogudo tooro mi me'no anyugollu'mo'maporogano. Aki Filistiyada'ai tooro molo nekullo'mo kwako Mikimas toru i'bwo'nodopure toorai kwonmonyugono.

¹² Toro tonyu wonodum kuudo sau'monyugono. Oo Filistiyada'ai tooro wagwolago Gilgal akaru molo bilanyo'mo nonuwolopinorodeyo. Toro kuudo sauro kuvi kuruv nuu Gooti Yawellu nonyo'mwojono'moneyokwe yere muudoganmonyugono. Toro tovino tov nuvnokwe tekwonyu jurogudo yopiyodum duko tovi yiunokuudo nopiyo'moneyokwe su toorai aromiroudapimonyugono.” Kuudokaikono.

¹³ Soolol toro kuudoka kuvi kuruv Samwelol aro kuudokaikono. “Gumi Gooti Yawelluro me'no adagujoka tovi muumjunmadekugono. Guu kuvinono kuumjuno'bujuko'mno'juki aguto kig tookujuro mido mollomwalo tov yiunokuudo amjo'movlawo'jujukokwono. Toro kweku kuruv guu kwolaiyo muudoga pwekubusuko Gooti Yawellu kisuvolo wiyodum ku'nono muumjunmadekugono.

¹⁴ Toro tovino tov aga'no'gwowi gumoro mido mollomwalo tov guureji mamjo'movlawonokwono. Guu Gooti Yawelluro adagujoka tovi kuvinono muumjunmadekugono. Toro tovino tov Gooti Yawel a'mwo gami ilaiyo to'no uumjunodowodo pwollu me'no ajesumokaikono. Toro ajesumoka su tool Gooti Yawelluro a'mwo abolo tonyu mido mollomwalmwalonekono.”