२ थेसलोनिकि 3 - देवास राई

पावले पाराथ्ना करिदेहे बाजिहिन् बिम्ति कर्ल

¹ दाजुभाइ आउँ दिदिबैन्हिहेलक्, अन्तिमै हाम्‍रा लागि पाराथ्ना करिदेहे, ताकि पर्भुक् बचन छिट्‌टोय जम्मापाखा फैलिहिन् जाउस् आउँ यक्‍राक् आदर भेउस्, जहरङ् करिहिन् तोहोराखर्ह्‌वाक् माझै आको भेल रैल्हकुन्।

² परमेस्वरे हाम्‍रालाइ खाराब मनेसौ आउँ दुस्ट मानुसलकक्‌भटे बाँचाउस् बाजिहिन् पाराथ्ना करिदेहे। किसाबुने जम्माय मानुसलके बिस्वास नाकरथ्।

³ तर पर्भु ता बिस्वासयोग्य रहैस्। ओहिं तोहोराखर्ह्‌वालाइ बल्यो बानाहेर्ला आउँ दुस्ट सैतानक्‌भटे बाँचाहेर्ला।

⁴ हामि जुन् कहिनक् आग्या देहुँक्ला, उ तोहोराखर्ह्‌वाइ कर्तिहि रहला आउँ करहला बाजिहिन् हामि पर्भुमा भरोसा कर्ल धरुहुँक्ला।

⁵ पर्भुइ तोहोराखर्ह्‌वाक् हिर्‌दयालाइ परमेस्वरक् पेरेम आउँ खिरिस्टक् सहनसिलताक् पैंदाइ डोर्याउस्।

अल्सि कर्लाहारलकलाइ चेताउनि

⁶ दाजुभाइ आउँ दिदिबैन्हिहेलक्, हाम्‍रा पर्भु येसु खिरिस्टक् नाँओइ हामि तोहोराखर्ह्‌वालाइ आग्या देहुँक्ला, कि हामि देल सिच्छा नहिंमान्लाहार आउँ अल्सि कर्लाहारक्‌भटे टार्‌होय बसह।

⁷ किसाबुने हामि तोहोराखर्ह्‌वाक्‌सङ्‌हिं भेइटे कख्नुहुँ अल्सि करिहिन् नहिंबस्लुहुँक्। आउँ हामि कर्लक्‌परौ कर्बापोर्लाहार बाजिहिन् तोहोराखर्ह्‌वा आफ्निहि आको जानहला।

⁸ हामि पैसा नहिंतिरिहिन् कुन्‍हुँक् किच्छु खाबाक् थोक् नहिंखाइलुहुँक्। तर तोहोराखर्ह्‌वालाइ बोझ बुन् भेउस् बाजिहिन् हामि रातदिन मेहेनत करिहिन् काम कर्लुहुँक्।

⁹ साहेता पाबाकलाइ हाम्‍रा अधिकार नहिंभेल बोइने, तर हाम्‍रा ब्यभारेसौ तोहोराखर्ह्‌वाक् लागि एक्टा नमुना बनुस् बाजिहिन् हामि ओरोङ् कर्लुहुँक्।

¹⁰ हामि तोहोराखर्ह्‌वाक्‌सङ्‌हिं रैल्हटाकै यि आग्या तोहोराखर्ह्‌वालाइ देल धर्लुहुँक् “कुन्हुँ मानुसे काम नाकरै बुने, ओहिंसे खाबाउ बुन् खाउस्।”

¹¹ किसाबुने हामि सुन्ल धरुहुँक्ला, कि तोहोराखर्ह्‌वाक्‌मध्ये काम नहिंकर्लाहार अल्सि मानुसलक् आको रहट्‌थ्ला हँन। उखर्ह्‌वाइ आफ्नि काम किच्‍छुय नाकरथ्, तर ओर्कोक् कामै बेठ्‍ठाहिमा भाँजो हालट्‌थ्ला।

¹² असौ यरङ् खालक् मानुसलकलाइ पर्भु येसु खिरिस्टक् नाँओइ हामि आग्या करिहिन् चेताउनि देहुँक्ला, कि उखर्ह्‌वाइ चुप्‌चापेसौ काम करुस् आउँ आफ्नि काम करिहिन् खाबाक् थोक् जुटाउस्।

¹³ तसौ दाजुभाइ आउँ दिदिबैन्हिहेलक्, तोहोराखर्ह्‌वासेहे राम्‍रो काम कर्बालाइ कख्नुहुँ बुन् हड्‌याहो।

¹⁴ यदि तोहोराखर्ह्‌वामध्ये कुन्हुँइ हामि यि चिठिमा लेखिहिन् पाठाल कहिन् नामानथ् भेनेमा, उ मानुसलाइसेहे चिन्हिबानाइ धरहँक्। आउँ ओक्‍राक्‌सङ्‌हिं सङ्‍गत बुन् करह। ताकि उ आफ्नि लाजै पोरुस्।

¹⁵ भेटौसुधा ओक्‍रानि सत्‌रुक्‌परौ ब्यभार बुन् करह, तर आफ्निक् दाजुभाइक्‌परौ करिहिन् चेताउनि देहो।

पावलक् अन्तिम अभिबादन

¹⁶ हाम्‍रा सान्तिक् पर्भुइ साँद्‍धाउ तोहोराखर्ह्‌वालाइ जम्मा थरिक् सान्ति देउस् आउँ पर्भु तोहोराखर्ह्‌वा जम्माहिंक्‌सङ्‌हिं भेउस्।

¹⁷ मुँइ पावले आफ्नि हाथिहि यि अभिबादन लेखिहिन् पाठातिहि रहम्ना। मोरा लेख्ल जम्माय चिठिक् चिन्हँ यिहे हो। मुँइ यहेरङे लेखम्ना।

¹⁸ हाम्‍रा पर्भु येसु खिरिस्टक् अनुग्रह तोहोराखर्ह्‌वा जम्माहिंक्‌सङ्‌हिं भेउस्।