MATEO 10:15 - Zapotec Mixtepec: Diidz ne rdeed guielmban

¹⁵ Gneli naa lo to gaṉle zeeṉe gaḻ dze ne laa Dios guṉ xquieḻwxtis me, bii lëëtaa gac guieḻnë ne ygaa grë miech ne bio guiedz Sodom, guiedz Gomorr, lëdle guieḻnë ro ne ygaa grë miech ne sca siguieḻd ycaania to.

MATEO 10:15 Referans Kwoze

2 PEDRO 2:6

Scaque leṉ dze ne wban Lot, bdziguiend me grë miech yozh ne bio guiedz Sodom ni guiedz Gomorr, blaaḻ me gui grop guiedz co, bnitlo me zho grëse zho, xquidiese biaaṉ. Laa me beeṉ miṉ co, zeeṉa ga gaṉ grëraa zha ntseeb gaṉle pe nac miṉe tsieguiaḻ zho teḻne csaand zho xquieḻntseeb zho.

1 JUAN 4:17

Zig nac ne, niina ne laa ne nacniele Jesús, zig zie dze laa ne lozh cseed gleynie ne me, ni gleynie ne samiech ne zigne racladz me; ni scagaa tsod pe nacne ctoladz ne, pe nacne gdzieb ne gdziṉ dze ne laa me guṉ xquieḻwxtis me; sinque haxta gley ne dziaṉ ne me gaḻ dze co.

2 PEDRO 3:7

Scaque, nacle xtiidz Dios, zigtaa gbaaw, zigtaa guidzliu ne no niinaw, laaw nitlo, per lo guile nitlow; ni lo gui co nagoṉ ygaa grëse zha ne ruṉ guieḻntseeb ted zho caxtigw.

2 PEDRO 2:9

Gase na gaṉle rlu ib rsaand Dios zha ne rnalopaa me, rsaand me guiab zho lo doḻ; ni scagaa grë zha ne rsaand guieḻntseeb, ib tedsod zho lo guieḻnëdox ne cteed me zho gaḻ dze ne laa me guṉ guieḻwxtis.

MARCOS 6:11

Laa zaatne ne ib gneedzd zho pa cuëz to, niicle nëdgaa zho yquiaadiag zho miṉe gnee to, dzigo goḻlit grë yudie co ni to, goḻrieegazh ga, zeeṉa guieṉ zho gaṉle lëda ga beeṉ zho.

MATEO 12:36

Ni gaḻ dze ne goṉ guṉ Dios guieḻwxtis, ib tedsod zuṉquizh me miech tib tib diidz ntseeb, tib tib diidznë ne sca rriee ro zho.

MATEO 5:18

Gneli naa lo to gaṉle: Laga niaa guidzliu rii, laga niaa gbaa, ib none gac miṉe zhobnee lo ley, miṉe bneegaa zha ne biadteed xtiidz Dios, ni tib lë paat gdzëëda.

MATEO 7:22

Gaḻ dze co, nzian zha ne grieequia gnë lo naa: “Conque rdziuuṉbey no luu, blactaa name bio no bionee no Xtiidz luu lo miech, nzian milagr ne bdziuuṉ no, haxta meṉdox bdziuṉcxooṉ no zeeṉe bzeet no lë luu.”

JUAN 6:39

Ni miṉe racladz me, grëse zha ne bneedz me lo naa, ni tib zho nitlod, sinque cueeban naa zho gaḻ dze ne laa guidzliu nitlo.

JUAN 6:40

Sac racladz me: grëse zha ne gbig lo naa ni gliladz zho naa dib zdoo zho, grëse zho ygaa tib guieḻmban ne ib gdziṉd dze lozh, ni cueeban naa zho gaḻ dze ne nitlo guidzliu.

JUAN 12:48

Xtidz naa gac ley ne guṉquizh zhow; zigtaa zhaw zigtagaa grë zha ne nëd guṉbey naa, grë zha ne nëd yquiaadiag xtidz naa.

HECHOS 17:31

sac laa me bzole tib dze ne gacredz grëse miech lo me ygaa zho miṉe tsieguiaḻ zho tib tib zho, teḻ zha wban zho. Ni laa me blule gaṉle cho nac meṉ ne guṉ guieḻwxtis co, lëë meṉ co ga goṉ bleeban me.

1 CORINTIOS 3:13

Zeeṉe gdziṉ dze ne laa Jesús guṉ guieḻwxtis, ga glu dieṉ zha nac xtsiiṉ zho; sac gaḻ dze co grësew laaw none ted lo gui, ga glu dieṉ pa miṉ lëbraa.

1 TESALONICENSES 5:4

Saṉgue to, bets, bzian, nacdraa to zha ne nonziaab lo ncow, teḻ pa hortaa guiaad me nsinle zo to; sacdraa to dze co zig rzac miech ngbaan, lega nacle zeeṉe raṉ zho laa ngbaan rdziṉ.

HEBREOS 10:25

Dze ne nacle diidz ycaalsa ne dziooḻnie ne Dios, ible none ycaalsa ne grëse ne, guionaḻd ne miṉe ruṉ grë zha ne rzozit. None cso ne diidz lo grë zha ne nacgrë ne, conley ne zdoo zho dziits so zho lo miṉe rliladz ne; xco co none dzio ne niina ne laa dze ne guiaad Jesús ziaadgaxle.

JUDAS 1:6

Scaque grë anjl ne biche lo me, psaan zho dziin ne pso me zho; bdziguiend me zho, laa me nsioogyu zho tib lo guieḻcowdoo, ga quiadoo zho haxta gdziṉ dze ne laa me guṉ guieḻwxtis.

JUDAS 1:7

Rsoladz to gaṉle zha goc guiedz Sodom, guiedz Gomorr, ni grëraa guiedz las ne bre gax ga. Grë miech ne bio grë guiedz co, laa zho güeynaḻ miṉe nacdraa guieḻtsieel, teḻ chotaa pquiangob zho, bionie zho haxta grë mrazh; grëse zho, lo gui ga bnitlo zho. Ga rlu gaṉle, grëse zha ne csaand xquieḻntseeb, no tib lo guidox ne gdziṉd dze guiuu, ni ga nitlo zho.