Roma 3:4 - Bible Ni Thothup

⁴ Rib muduwgil ndanga’! I Got e dabisiy ni nge par nib yul’yul’, ni mus ni fa’anra yan i par ni urngin e girdi’ ma yad be lifith l’ugunrad. Ni bod rogon ni be ga’ar e babyor nib thothup: “Thangri yib i m’ug ni gab mat’aw ko ngiyal’ ni ga ra welthin; ma thingar mu gel ko ngiyal’ ni yira pufthinnigem riy.”

Roma 3:4 Referans Kwoze

Psalms 51:4

Kug denen nib togopluw ngom, ni kemus ni gur e ba togopluw ngom, ma kug rin’ e tin nib kireb u wun’um. Ere mmat’aw ni ngam pufthin nigeg, bay mat’awum ni ngam turguy e gechig rog.

Psalms 116:11

ni mus ko ngiyal’ ni gu rus me lungug, “Dariy be’ ni nge pagan’uy ngak.”

Galatia 2:17

Ere fa’anra gadad be guy rogon ni ngad ta’ab girdi’gad ngak Kristus ni bochan e ngad mat’awgad ngak Got, ma kani pir’eg ni gadad e tadenen nta’reb rogodad ngak e pi’in gathi yad piyu Israel — gur aram e ke maruwel Kristus ni fan ko denen ni nge gel? Bmuduwgil ndanga’!

Hebrews 6:18

Ere gali n’ey e dabiyag ni nge thil ma dabiyag ni nge lifith Got l’ugun riy. Ere gadad e pi’in ni kad thapgad ngak Got e ka ni pi’ e athamgil nga lanin’dad ni ngad chichi’iyed pa’dad ko fare pagan’ ni ka ni pi’ ngodad.

Titus 1:2

ni murung’agen e yafos ndariy n’umngin nap’an ni ir e nge l’agan’uy ngay. I Got nder ma ban e turguy e re yafos ney ndariy n’umngin nap’an ni nge pi’ ngodad ko ngiyal’ ndawori sunumeg e fayleng riy,

Deuteronomy 32:4

“I SOMOL e ba gel ma bay i par ni manaf romed, ir e ba yal’uw ma bmat’aw urngin e tin ma rin’. Got romed e ba yul’yul’ ma der ma ban, ngongolen e bfel’ ma ba yal’uw.

BABYOR NI JOB 36:3

Ba ga’ e llowan’ rog; bay gog e tin gu manang ni nggu dag ni Got ni sunmiyeg e bmat’aw.

John 3:33

En nra mich u wan’ e thin nike fek i yib e aram e ke micheg nib riyul’ Got.

Psalms 119:160

Yul’yul’ e ir e def ko motochiyel rom, ma gubin e tin nib mat’aw ni ga be tiriggiliy e dariy n’umngin nap’an.

Revelation 3:7

“Mu yol ngak fare engel ko galesiya nu Filadelfia ni nge lungum: “Ireray e thin nike pi’ fa’anem ni ir e ba thothup ma ba yul’yul’, ni ir e bay fare kiy rok David u pa’, ni ir e ra bing ma dariy be’ nrayag ni nge ning, ni ir e ra ning ma dariy be’ nrayag ni nge bing.

1 John 5:20

Gadad manang ni en ni Fak Got e ke yib ma ke tamilangnag an’dad ni ngad nanged fa bin riyul’ e Got. Gadad bay u fithik’ e bin riyul’ e Got — u fithik’ Fak ni Jesus Kristus. Ir e bin riyul’ e Got, ma ir e yafos ndariy n’umngin nap’an.

Roma 9:14

Ere mang e nga dogned? Nge lungudad e de mat’aw Got? Ri dangay!

Psalms 138:2

Gub sap ko Tempel rom ni thothup, ni gu be siro’, ma gu be pining e sorok nga fithingam ni bochan e t’ufeg rom ni dabimus nge fanam yul’yul’, ni bochan kam dag ni fithingam nge tin kamog ni ngan rin’ e ba mathangeluwol.

Mikah 7:20

Bay mu dag fanam yul’yul’ nge fare t’ufeg rom ni dabimus ngak e girdi’ rom, ni pi’in owchen Abraham nge Jakob, ni bod rogon ni mmicheg ngak e pi chitamangimad kakrom.

Psalms 100:5

I SOMOL e bfel’; t’ufeg rok e dariy n’umngin nap’an, ma feni yul’yul’ e bayi par ni kargon ni manemus.

1 John 5:10

Ere en nra michan’ ngak e en ni Fak Got e bay e re mich ney u laniyan’; machane en nde mich Got u wan’ e aram e ke yog ni Got e be lifith l’ugun, ya de mich u wan’ e tin keyog Got ni murung’agen Fak.

Galatia 2:21

Dagur siyeg e n’en nike rin’ Got ni fan ngog u daken Fak! Fa’anra ke mat’aw be’ ngak Got u daken e Motochiyel, ma aram e yam’ ni tay Kristus e bm’ayfan.

Roma 6:15

Ere uw rogon? Gur ngu’ud denengad ni bochan e dad moyed u tan e motochiyel ya gadad bay u tan e runguy rok Got? Ri danga’!

Roma 3:31

Gur fan e ren’ey e aram e ngad n’iged fare Motochiyel ni bochan e ke mich Kristus u wun’dad? Danga’, gathi errogon; ya aram e kad ted e re Motochiyel nem nga tagil’.

Matthew 11:19

Me yib e en ni Fak e Girdi’, mi i abich ma be garbod me ga’ar e girdi’ ni gubin, ‘Mu guyed e re mo’on ney! I ir be’ nib ta’abich mma unum e wayin, me ir e fager rok e pi’in tamukun tax nge pi’in ndabuy dakenrad ni yad ba thiyar u lan binaw!’ Machane gonop rok Got e ke gagyal nib riyul’, ko tin ke yib i m’ug riy.”

BABYOR NI JOB 40:8

Mog, ga be guy rogon ni nge m’ug ni gu ba kireb me par ni gur e ga ba manigil?

Galatia 6:14

Machane gag e kemus ni kuruth rok e Somol rodad i Jesus Kristus e bay ug weliy murung’agen ma gu be uf ngay; ya kuruth rok e ke muruwliy ke par e fayleng nike yim’ rog, ma ku gum’ rok e fayleng.

Roma 11:1

Ere nggu fith ni nge lungug: I n’ag Got girdi’en fa danga’? Rib muduwgil ndanga’! Er rogon gag ni gu be’ u Israel, ni gag reb i owchen Abraham, ni gag girdi’en e ganong ku Benjamin.

Psalms 62:9

Girdi’ ni gubin e yad bod ba wuchuth i nifeng pi tolang nge pi sobut’ e ta’reb feni dariy rogorad ngabang. Yira thabthabel nagrad, ma dariy malngirad; yad bba’ud nga ba wuchuth i nifeng.

2 Korinth 1:18

Rogon feni yul’yul’ Got, e aram rogon e thin ni gog ngomed ni gathi ba “Kefel’ ” nge ba “Danga’.”

Roma 11:11

Ere nggu fith ni nge lungug: I tun ay piyu Israel ni fan e ngar dol’gad ngar kirebgad? Ri dangay! Kanawo’en ni ngan thap ngak Got e ke yib ngak e pi’in gathi yad piyu Israel ni bochan e ke denen piyu Israel, ya nge awan’ piyu Israel ngak e pi’in gathi yad piyu Israel.

Roma 7:7

Mang e nga dogned? Nge lungudad e re Motochiyel nem e ban’en nib denen? Bmuduwgil ndanga’! Re Motochiyel nem e ir e ke pateg ngan’ug ko mang e denen. Ya dab gu nang ko uw rogon ma aram e kan chogow ni fa’an mang e dawori yog e re Motochiyel nem nike ga’ar, “Dab mu chogow.”

Roma 6:2

Ri danga’! Ya kadm’ad rok e denen — ere ra di’in mu ud pired ni kagadad be par u fithik’?

Luke 20:16

Ra yib nge li’ fa pi’inem ngarm’ad, me pi’ fa gi woldug ngak yugu boch e girdi’.” Ma fa’ani rung’ag fapi girdi’ e re bugithin ney me lungurad, “Yigi siy i yodorom!”

Roma 7:13

Gur fan e ren’em e ban’en ni bfel’ e ke fek e yam’ i yib ngog? Ri danga’! Denen e ir e yodoromnag, ni maruwel nga ban’en ni bfel’ nge fek e yam’ i yib ngog ni fan e bin riyul’ i rarogon e denen e nge yag ni yib i m’ug. Ere Motochiyel e yib i gagiyelnag feni kireb e denen.

1 Korinth 6:15

Gimed manang ni dowmed e yu yang u downgin Kristus. Gur rayag ni gu fek bang u downgin Kristus nggu ngongliy nge mang bangi downgin be’ ni bpin nma pi’ ir nchuway’? Ri dabiyag!

1 Timothy 3:16

Rib muduwgil ni yira ngat ko n’en nib riyul’ ni ir e ke michan’dad ngay: I yib i m’ug nike bod ya’an e girdi’, ma Kan Nthothup e dag nib mat’aw, ma pi engel e ra guyed. Ma kan machibnag murung’agen ko pi nam i yan, me michan’ e girdi’ nu fayleng ngak, min fek nga tharmiy.