Roma 2:27 - Bible Ni Thothup

²⁷ Ere pi’in gathi yad piyu Israel e bay ra turguyed e kireb nga dakenmed piyu Israel; ni bochan e kari yoloy e re Motochiyel nem kan pi’ ngomed, ma kan maad’ad ngomed, machane kigimed be th’ab e re Motochiyel nem, machane yad e dawor ni maad’ad ngorad, ma yad be fol ko re Motochiyel nem.

Roma 2:27 Referans Kwoze

2 Korinth 3:6

ya ir e ke pi’ gelngimad ni nggu pigpiggad ko fa bin nib be’ech e m’ag, ni gathi ni ngongliy ko motochiyel ni kan yoloy, machane yib rok fare Kan Nthothup. Fare motochiyel ni kan yoloy e ma fek e yam’ i yib, machane fare Kan Nthothup e ma pi’ e yafos.

Roma 8:4

I rin’ Got e ren’ey ni fan e tin ni be yog e Motochiyel ni ngad rin’ed e nge yan i aw ngarogon u fithik’dad e pi’in ni fare Kan ni Thothup e be gagiyegnag pangidad, ma gathi rogon nib m’agan’ e dowef rodad ngay.

Roma 2:29

Machane cha’ nriyul’ ni ir be’ u Israel e cha’ ni ir be’ u Israel u fithik’ i laniyan’, ni aram e cha’ ni kan maad’ad nga laniyan’, ni fare Kan ni Thothup rok Got e ke yodoromnag, machane gathi fare Motochiyel ni kan yoloy. Be’ nike yodorom e Got e bay yog e sorok ngak, ma gathi girdi’ e nge yog e sorok ngak.

Hebrews 11:3

Michan’ rodad ngak Got e kad nanged riy ni lanelang nge urngin ban’en ni bay riy nib mu’un e fayleng ngay e thin rok Got e sunumiy, ere n’en nrayag ni ngan guy nga owchey e ni ngongliy ko n’en ndabiyag ni ngan guy nga owchey.

Galatia 5:14

Ya re Motochiyel nem ni polo’ e kan puthuy nga ta’bang ke yan i par nta’reb e motochiyel ni ba’aray ni ga’ar: “Demturug e gin’en ni ga bay riy ma ngam t’ufeg e cha’ ni ir e mmigid ngom ni gowe gur.”

Roma 13:10

En nib t’uf rok e en nib migid ngak e ri dabiyag ni nge rin’ ban’en nib kireb ngak. Ra t’uf e girdi’ rodad, ma aram e kad folgad ko fare Motochiyel ni polo’.

Roma 2:20

me gur e gabe fonownag e pi’in yad bbalyang, me gur e sensey ko pi’in bitir. Ma ke muduwgil u wun’um nu fithik’ e re Motochiyel nem e bay urngin e llowan’ riy nge tin riyul’.

Acts 13:22

Ma nap’an ni chuweg Got Saul, me fek David nge tay ni ir e nge mang pilung. Ba’aray e n’en ni yog Got ni murung’agen David, ‘Kug pir’eg ni David, ni fak Jesse, e ir e cha’ ni gub adag, ya ir be’ nra rin’ urngin e tin ni gub adag ni nge rin’.’

Matthew 3:15

Me fulweg Jesus ngak John ni ga’ar, “Ngad rin’ew e chiney ni aray rogon. Ya ireray kanawo’en ni gadow ra rin’ ma aram e kad rin’ew urngin e tin ni be finey Got.” Ma aram me fel’ u wan’ John.

Roma 2:15

Ya ngongol rorad e be m’ug riy ni tin ni be yog fare Motochiyel ni ngan rin’ e yad manang u lanin’rad. Ya ku errogon lanin’rad ni be dag ni ren’ey e ba riyul’, ni bochan e yu ngiyal’ e ma yog e leam rorad ngorad nib tagan e tin ni kar ngongliyed, ma yu ngiyal’ e ma yog ngorad nib mat’aw e tin ni kar ngongliyed.

Roma 2:25

Maad’ad ni kan tay ngom e ra yib fan ni fa’anra um fol ko re Motochiyel nem; machane fa’anra dab mu fol riy, ma dariyfan ni kan maad’ad ngom.

Roma 2:26

Ma be’, ni gathi be’ u Israel, ni be’ ndawor ni maad’adnag, ma be fol ko tin ni be yog fare Motochiyel, e gathi ra tay Got e cha’nem ni susun e be’ ni kan maad’ad ngak?

Roma 3:30

Ya Got e ri ta’reb ni bay, mra mat’awnag piyu Israel ngak u daken e michan’ rorad ngak Jesus, ma ku errogon e pi’in gathi yad piyu Israel nu daken e michan’ rorad ngak Jesus e ra mat’awnagrad Got riy ngak.

1 Korinth 7:19

Ya dariy ban’en nrogon ni fa’anra kan maad’ad ngom fa dawor. N’en ni bay fan e ngan fol ko tin ke yog Got ni ngan rin’.

Efesus 2:11

Gimed e pi’in nni gargel nagmed ni gathi gimed yu Israel — nma yog yu Israel ni gimed e girdi’ ndanir maad’ad ngomed, ma yad e karogned yad ni yad e pi’in ni yima maad’ad ngorad (ni ren’ey e be yip’ fan e n’en nma rin’ e girdi’ nga dowrad) — mu tafinay niged rogomed kakrom.

2 Timothy 3:15

ma ga manang nnap’an ni kagab bitir ma ga manang e thin ni bay u lan fare babyor nib thothup, ni ir e rayag ni nge tamilang nigem u rogon ni yima thap ngak Got, nma yag u daken e michan’ ngak Kristus Jesus.