Roma 1:16 - Bible Ni Thothup

¹⁶ Dagur tamra’ ko re Thin ney Ni Bfel’ ni murung’agen Jesus, ya ir gelngin Got ni nge thapeg e girdi’ ngak, ni urngin e pi’in ke mich u wun’rad e re thin ney, ni som’on e ni pi’ ngak piyu Israel, mu kun pi’ ngak e pi nam ni gathi yad piyu Israel.

Roma 1:16 Referans Kwoze

Mark 8:38

Ere fa’anra tamra’ be’ ni bochag nge n’en ni gu be fil ngak e girdi’ ko ngiyal’ney ndakir mich Got u wan’ e girdi’ ma yad be rin’ urngin mit e kireb, e ku ra tamra’ e en ni Fak e Girdi’ ngak ko ngiyal’ nra yib riy ni yad e pi engel rok Got ni be galgal ram’en ni bod e Chitamngin.”

2 Timothy 1:8

Ere dab mu tamra’ ni ngu’um weliy murung’agen e Somol rodad; fa reb e mu tamra’ ngog, ni kug kalbus ni bochan. Machane mu’un ko gafgow ni fan ko fare Thin Ni Bfel’, nrogon gelngim ni bay i pi’ Got ngom.

1 Peter 4:16

Machane fa’anra ni gafgow nagmed ni bochan e gimed girdi’en Kristus ma dab mu tamra’gad ngay, ya ngam pininged e magaer ngak Got ni bochan e bay fithingan Kristus u dakenmed.

2 Timothy 1:12

ma ireray fan ni kug gafgow. Machane dagur tamra’ ngay, ya gu manang e en ni kug pagan’ug ngak, ma bmuduwgil u wun’ug nrayag rok ni nge tay e tin ke pag fan ngog ni dabi buch ban’en riy nge yan i mada’ ko Rofen ni bay sul riy.

Luke 9:26

Fa’anra i tamra’ be’ nga murung’ageg nge thin ni gu be machibnag ma aram e en ni Fak e Girdi’ e ra tamra’ nga murung’agen fa’anem ko ngiyal’ nra sul riy ni yow e fla’ab rok nge fla’ab ko en ni Chitamangiy nge pi engel nib thothup.

2 Korinth 4:4

Der mich u wun’rad ni bochan e fare kan nib kireb nu roy u fayleng e ke tay lanin’rad u fithik’ e lumor. Ya ke ta’rad ndab ra guyed ram’en fare tamilang ni be mat nga dakenrad, ni fare tamilang ni be yib ko fare Thin Ni Bfel’ ni murung’agen e fla’ab rok Kristus, ni Kristus ni ir e ri ta’reb rogorow Got.

1 Korinth 2:4

ma welthin ni gu tay nge machib e da gu pi’ u fithik’ e fel’ nifingin l’ugun nma yib ko gonop ko girdi’, machane gelngin fare Kan ni Thothup rok Got e immoy u fithik’ e thin rok, ni ir e i micheg ngomed nre thin nem ni gu be yog e yib rok Got.

1 Korinth 2:2

Ya gu turguy u wun’ug ni nggu pag talin urngin ban’en ko ngiyal’ ni gu bay romed, ma kemus ni Jesus Kristus nri yam’ ni tay u daken e kuruth e ir e nggu tay u lanin’ug.

Roma 10:17

Thin rok Got ni yibe machibnag yibe rung’ag e be yagnag e michan’ ngak e girdi’, ma re thin rok Got nem e aram murung’agen Kristus ni yibe machibnag.

Hebrews 4:12

Ya thin rok Got e ba fos ma bay gelngin nma maruwel. Ya kab m’uth ngabangi saydon ni ruw raba’ ma bm’uth. Ya ma yan nge yan i taw nga fithik’ i lanin’dad ko n’en ni gadad be leamnag, nge fithik’ e ul ul nge yil, ma ma pufthinnag e n’en ni yima yim’ ni bochan nge tin ni yima leamnag.

1 Korinth 15:2

Fare thin ni gu fek i yib ngomed ni ir e gu machibnag ngomed e ireram fare Thin Ni Bfel’. Fa’anra mpired ni kari mich u wun’med, ma aram e kam thapgad ma fa’anra danga’ me ere bochan e ri de mich u wun’med.

Jeremiah 23:29

Thin rog e bod ba nifiy, nge ba ama nma bilbilig e war nge par ni nochiyang. I Gag SOMOL e kugog e pi thin ney.

Galatia 1:7

Ma bin riyul’ riy e dakuriy “yugu reb e Thin Ni Bfel’ ngabang ni yib rok Got.” Gu be yog e re bugithin ney ya bay boch e girdi’ ni yad be guy rogon ni ngar wagagey niged lanin’med, ni aram e yad be guy rogon ni ngar thiliyeged e Thin Ni Bfel’ ni murung’agen Kristus.

Roma 2:9

Bay e gafgow nge amith nra yib ngak urngin e pi’in yad be rin’ e tin nib kireb, ni piyu Israel e yad ra m’on nga fini migid e pi’in gathi yad piyu Israel.

Acts 3:26

Ma aram me duwgiliy Got ni gimed e som’on ni nge l’oeg e Tapigpig rok nge yib ngomed, nge ayuwegmed ni aram e nge ngongliymed ni gimed gubin ngam pi’ed keru’med ko kireb ni gimed be rin’.”

Psalms 119:46

Bay gu weliy e tin kamog ni ngan rin’ ko pi pilung ni dab gu tamra ngay.

1 Thessalonika 2:13

Ma ku ba’aray reb i fan ni gubin ngiyal’, ma gamad be pining e magaer ngak Got, bochan e gu feked e thin rok Got i yib ngomed mi gimed rung’ag nge mu’ mi gimed fol riy, ma da mu leam niged ni thin rok e girdi’, ya mu leam niged ni thin rok Got, ni er e bin ni ir, ya ri ir e thin rok. Ya Got e be maruwel u fithik’med e pi’in ke mich Got u wun’med.

Isaiah 53:1

Me fulweg e girdi’ ni lungurad, “I mini’ e ra mich u wan’ e ren’en ni gadad ra weliy murung’agen e chiney? Mini’ e rayag ni guy pa’ SOMOL ni be maruwel u fithik’ e ren’ey?

1 Timothy 1:11

Ireram e re machib ni kan pir’eg u fithik’ fare Thin Ni Bfel’ ni ir e kan pag fan ngog ni nggu weliy ngak e girdi’, ni ireram fare Thin Ni Bfel’ ni ir e th’abi sorok ma ba fla’ab.

2 Korinth 9:13

Pi’in ni bay mu ayuweged e bay ra felan’gad ni gathi kemus ni bochan e tin ni kam pi’ed ngorad nge boch e girdi’ u fithik’ e gol, machane bay rogned e sorok ngak Got, ya ireyer e mich riy nri gimed ba yul’yul’ ko thin ni bfel’ ni yib rok Kristus ni ir e gimed be weliy.

2 Korinth 2:12

Nap’an ni gu taw nga Troas ni nggu machibnag e Thin Ni Bfel’ ni murung’agen Kristus, mu gu pir’eg ni Somol e ke bing e kanawo’ ngog ko maruwel ni nggu tay u rom.

1 Korinth 9:18

Mang puluwog ni be yib riy ngog? Felfelan’ ni be yib riy ngog ni bochan e gu be machibnag ngak e girdi’ fare Thin Ni Bfel’ ndariy puluwon ni yad be pi’ ngog, ma mat’wug ni bay ni nga ni pi’ puluwog ni bochan e gu be wereg fare Thin Ni Bfel’ e dagur yog.

1 Korinth 9:12

Fa’anra bay mat’wun boch e girdi’ ni ngam rin’ed e ren’ey ngorad, me ere gathi gamow e bay mat’awmow ni ka ba ga’ ngorad? Machane dawor gu maruwelgow ko ren’en ni mat’awmow ney. Ya kug kadan’gow u gubin ban’en ni bochan e nge dab gu tew ban’en nra magawonnag e girdi’ ngalan kanawo’en fare Thin Ni Bfel’ ni murung’agen Kristus.

Roma 15:29

Ra gub ngomed ma gu manang nra gub nib sug e tow’ath rok Jesus Kristus rog.

Roma 15:19

ngu gelngin e pi pow nge pi maang’ang, ngu gelngin fare Kan Thothup rok Got. Ere milekag ni gu tay u Jerusalem nggu mada’ nga Illyrikum e yigo’o kugog riy e Thin Ni Bfel’ ni murung’agen Kristus.

2 Timothy 1:16

Nge runguy Somol girdi’en e tabinaw ku Onesiforus, ya bo’or yay nike pi’ e athamgil nga lanin’ug. Der tamra’ ngay ni gu bay u kalbus,

Roma 4:11

Fin nni maad’adnag nga tomur riy, ma maad’ad ntay ngak e ba pow ni nge micheg ni bochan e michan’ rok Abraham ngak Got ma aram e ke matha’eg Got ngak ni ir be’ nike mat’aw u m’on ndawor ni maad’adnag. Ere Abraham e kemang chitamngin urngin e pi’in ke mich Got u wun’rad ke matha’eg Got ngorad ni yad e pi’in kar mat’awgad, ni yugu aram rogon ni dawor ni maad’ad nagrad.

Psalms 110:2

I SOMOL e bayi ga’nag e gagiyeg ni pilung rom nge wear u Zion i yan nga orel. Be ga’ar, “Gur e bay mu gagiyeg nga daken e pi to’ogor rom.”

John 7:35

Me yog e pi tolang ko Jew u fithik’rad ni lungurad, “U uw e ke chugur ni nge yan ngay ndab kud pir’eged? Gur bay yan ko pi binaw rok yu Greece ko yungi n’en ni be par piyu Israel riy ngi i machibnag piyu Greece?