Revelation 18:2 - Bible Ni Thothup

² Me non ni ba ga’ laman ni ga’ar, “Ke waer! Fare Babylon nib gilbuguwan e ke waer! Chiney e kemang tafen e mo’onyan’ nge pi kan nib tagan; urngin mit e arche’ nib golong nge pi arche’ ni fanenikay ni be par u lan yu Babylon.

Revelation 18:2 Referans Kwoze

Revelation 14:8

Me lek e bin migid e engel tomuren fa bin som’on ni be ga’ar, “Ke waer! Fare binaw nu Babylon nib gilbuguwan e ke waer! Ke pi’ e wayin rok ngak girdi’en e pi nam ni urngin, ke pi’ ngorad kar unumed, ni fare wayin rok nib gel, ni wayin ko darngal rok!”

Jeremiah 51:37

Re binaw nem e bayi par ni dakriy woton u but’ ni go’ gamanman ni malboch e ma par riy. Nike tamdag ya’an ni dakriy be’ nra par u rom, gubin e pi’in yad raguy miyad ra dugow.

Jeremiah 51:8

Babylon e yigi thay pa’ nib tomgin nge mogothgoth! Mu yor niged! Mu feked e falay ni fan ko maad’ad rok, ma dabisiy nra gol.

Revelation 18:21

Ma aram me fek ba engel nib gel bmalang ni bod ga’ngin fare malang ni ba ga’ ni yima bilig e wheat ngay ngan ngongliy e flowa riy, me yin’ nga daken e day, ni be ga’ar, “Fare binaw nu Babylon nib gilbuguwan e bay ni pag nga but’ nib gel merin ni aray rogon, ma aram e dab ku ni guy bayay.

Revelation 18:10

Bay ra sak’iygad u orel rok, ni bochan e yad be tamdag ko re gafgow nem nike yib ngak, me lungurad, “Kari gafgow i gafgow e re binaw ney nu Babylon nib gilbuguwan ma ba gel! Ri ta’reb e awa ma ka ni mu’ i gechig nigem!”

Revelation 17:18

“Fare pin ni kam guy e ireram fare binaw nib gilbuguwan ni ir e be gagiyegnag e pi pilung nu fayleng.”

Revelation 17:5

Ma kan yoloy ba ngachal nga daken peri’ ni bay fan nib mith ni ga’ar: “Fare Babylon nib Gilbuguwan, ni ir e chitiningin urngin e ppin ni yad ma chuway’ ngorad nge urngin e kireb nu fayleng.”

Revelation 16:19

Ma fare binaw nib gilbuguwan e pil nge dalip yang, ma urngin e pi binaw ni bay u daken urngin e nam e yigo’o kireb. Me yib e binaw nu Babylon nib gilbuguwan ngan’ Got, me pi’ Got e wayin nu kap rok ngak nge unum ni wayin ko damumuw rok nib gel.

Isaiah 14:23

Bay gu pilyeg yu Babylon nge bod lan ba mu’ut ni go’ ran, arche’ ni owl e bayi par u rom. Bay gu wolguy yu Babylon ko wolguw nge chuw gubin ban’en riy. I Gag, fare SOMOL ni Gubin ma Rayag Rok e gu be non.”

Revelation 16:13

Ma aram mu gguy dalip e mo’onyan’ ni bod ya’an e kayru, ni karbad nga but’ u lan l’ugun fare dragon, ngu lan l’ugun fare gamanman, ngu lan l’ugun fare profet ni yugu ban’en.

Revelation 14:15

Me yan reb e engel nga wuru’ e Tempel me tolul ni ba ga’ laman ngak fa’anem nike par nga daken fa gi manileng ni be ga’ar, “Kama rom e ngam t’ar wom’ngin e woldug ngay, ya ke taw nga nap’an ni ngan t’ar wom’ngin e woldug u fayleng!”

Revelation 10:3

me non ni ba ga’ laman ni gowa laman bogi layon nra nonod nta’ab yay. Ma fa’ani mu’ ko numon me fulweg fa medlip i dirra’ ta’ab yay ni ba ga’ lingrad ni chub.

Revelation 5:2

Mu gguy ba engel nib gel ni non ni ba ga’ lungun ni ga’ar, “Mini’ e bay rogon ni nge guchthuy e pi hang nem nge pithig e re gi babyor nem ni kan bachiy?”

Zefaniah 2:14

Bayi par e re gin’em nike mang yu ran’ i saf nge garbaw, nge gabin mit e gamanman e yad be par riy. Arche’ ni owl e bay ra pired ko pi naun nike mogothgoth ngu’ur mayngargad u langan e winda. Pi gap’luw e ku yad ra mayngar u langan e tawo’. Ma yungi ren ni cedar ko pi naun riy e bay ni fathiy ngan chuweg.

Jeremiah 25:30

“Jeremiah, gur e thingar mu weliy gubin ban’en ni kugog. Ni ngar mog ko pi girdi’ ney ni nge lungum, ‘I SOMOL e bayi non nib ga’ laman u tharmiy ni bod e dirra’ ko yungin th’abi tolang u tharmiy. Bayi non nib almarin nib togopluw ko girdi’ rok; me tolul nib ga’ laman ni bod be’ ni be pirdi’iy e grape. Urngin e girdi’ nu fayleng ni yad ra rung’ag laman,

Revelation 1:15

ma rifrif u ay e be galgal ram’en ni gowa wasey ni brass ni kan rannag ko nifiy nge mu’ min gichiy downgin, ma laman e bod lingan ba lul’ ni ba ga’ ni beb i map’ u taban bangi war nib tolang ngalan e yibu’.

Joel 3:16

SOMOL e bayi tolul u daken e Burey ni Zion; bay yan lungun u Jerusalem ni bod lingan e dirra’; me rur e but’ nge lanelang. Machane bayi n’uf SOMOL e girdi’ rok.

Revelation 11:8

ma bayi par downgirow u daken e wo’ ko fare binaw nib gilbuguwan, ni aram e gin nrichibiy e Somol rorow riy ko kuruth. Re ngachal nra m’ag ko re binaw nem e Sodom, ara Egypt.