Revelation 11:18 - Bible Ni Thothup

¹⁸ Pi nam e kari gel e damumuw rorad, ya ke taw nga nap’an ni nge taw e damumuw rom, nge nga nap’an ni ngam pufthinnag e pi’in ni karm’ad; nge nga nap’an e ngiyal’ ni ngam pi’ puluwon e tapigpig rom ni fapi profet, nge urngin e tirom e girdi’, ni pi’in yad ba tolang nge pi’in yad ba sobut’, ni urngin e pi’in ni bay madgum u wun’rad. Ke taw nga nap’an ni ngan kirebnag e pi’in ni kar kireb niged e fayleng!”

Revelation 11:18 Referans Kwoze

Revelation 20:12

Ma aram mu gguy e pi’in ni karm’ad, ni pi’in nib tolang nge pi’in nib sobut’ ni kar sak’iygad u m’on u tagil’ Got. Min pithig e babyor, mu kun pithig ba kaen, ni fare ke babyor ni babyoren e pi’in ni kar fosgad. Ma pi’in ni karm’ad e ni pufthinnagrad ni be yan u rogon e n’en ni ur ngongliyed, ni bod rogon ni kan yoloy ngalan fa yu ke babyor.

Revelation 19:5

Ma aram me yib ba lam u tagil’ Got ni be ga’ar, “Gimed urngin e pi tapigpig rok Got, nge urngin e girdi’ ni pi’in yad ba tolang nge pi’in yad ba sobut’, ni bay madgun Got u wun’med e ngam pininged e sorok ngak e Got rodad!”

Revelation 13:10

En ni kan finey ni ngan kol e ri bay ni kol; ma en ni kan finey ni ngan li’ ko saydon ngem’ e bmuduwgil ni bay nli’ ko saydon ngem’. Ireray e ngiyal’ ni nge k’adan’ me pagan’ girdi’en Got ngak Got.”

Revelation 22:12

Be ga’ar Jesus, “Mu telim! Dabki n’uw nap’an mu gub! Ma bay gu fek puluwon e girdi’ i yib nra be’ ma bay gu pi’ puluwon ni be yan u rogon e n’en ni i rin’.

Psalms 103:11

Rogon feni tolang lanelang ko fayleng, e aram feni ga’ e t’ufeg rok SOMOL ko pi’in ni bay madgun u wun’rad.

Revelation 15:7

Me pi’ bagayad fa aningeg i n’em ni yad ba fos, ngak fa medlip i engel, medlip raba’ i ban’en nib gol nike sug ko damumuw rok Got, ni fa’anem ni ir e be par nib fos ndariy n’umngin nap’an.

Revelation 15:1

Ma aram mu gguy yugu reb e pow u tharmiy ni ba ga’ ni gu gin ngay, ni medlip i engel ni bay medlip i gafgow rorad. Ireray e tin tomur e gafgow, ya yad e tomur ni ngar daged e damumuw rok Got.

Revelation 14:10

e ir e ra unum e wayin rok Got, ni wayin ko damumuw rok, nike pu’og ngalan e kap ko damumuw rok ke yan i mus nga gelngin! Urngin e girdi’ ni ra rin’ e ren’ey e yira gafgow nagrad u fithik’ e nifiy nge sulfur u p’eowchen fapi engel nib thothup nge fare Fak e Saf.

Hebrews 9:27

Ra be’ ma thingari yim’ ni ta’ab yay, ma nga tomuren e nge pufthinnag Got fa’anem.

Luke 1:50

ma runguy urngin e pi’in bay madgun u wun’rad u reb e mfen nga reb.

Matthew 5:12

Ngari felan’med, ya bay labgen ni ba ga’ ni fan ngomed ni kan tay u tharmiy. Ya ireray rogon e gafgow ni i tay e girdi’ ngak e pi profet ni yad ba kakrom ngomed.”

Psalms 110:5

I Somol e bay u ba’ ni mat’aw rom; chirofen ni bayi damumuw e bayi gel ngak e pi pilung.

Psalms 85:9

Riyul’ nra mat’awnag ngak e pi’in ni bay madgun u wan’rad, nge par e muluplup’ rog u lan e nam rodad.

Psalms 2:5

Ra damumuw nge ginangrad, me k’aring e marus ngorad ko damumuw rok.

Revelation 20:15

En nda immoy fithingan ni kan yoloy ngalan babyoren e pi’in ni kar fosgad e nin’ ngalan fare lipath i nifiy.

Revelation 18:6

Mu rin’ed ngak ni bod nike rin’ ngomed, mu gechigniged ni l’agruw yay u gelngin e n’en ke rin’ ngomed. Mu suguyed e kap rok ko n’en ni yima unum nl’agruw yay ni kab gel ko n’en nike ngongliy rogon ni ngam unumed.

Revelation 11:2

Machane dab mu foleg lan e yoror ko Tempel. Dab mu foleg, ya kan pi’ ngak e pi’in ni gathi yad piyu Israel, ni yad e bay uryot’ed daken fare Binaw nib Thothup ni aningeg i ragag nge l’agruw e pul.

Daniel 8:25

Ma bay i mon’og i yan e tin ni be rin’ u fithik’ e sabanban ni bochan e ba sasaliyeb. Bay i par nib ufanthin me li’ bo’or e girdi’ ni yugu yad ra gin ma ke og ngorad. Ma bayi togopluw ngak fare Pilung ni ir e th’abi ga’ u fithik’ e pilung, machane bay ni thirif u but’ ni gathi gelngin e girdi’ e bay ni maruwel ngay.

Daniel 7:26

Ma aram e bayi tabab e puf oloboch, min chuweg gelngin rok min thirif u but’.

Eklesiastes 12:13

U tomuren urngin e pin’ey, ma ka ta’reb e kabay ni nganog: Nge yib madgun Got u wun’um, ma ga fol ko tin ke ta’chiylen, ya kemus fan e girdi’ ni sunmiy.

Eklesiastes 8:12

Be’ nib kireb e rayag ni nge rin’ e oloboch ni ra’ay yay ma ku be par nib fos. Ahh rriyul, gu manang ko mang e yad be yog: “Fa’anra um fol rok Got, ma urngin ban’en mra par ni bfel’ rogon,

Psalms 147:11

ya ma felan’ ngak e pi’in yad ma liyor ngak, ni pi’in nib pagan’rad ko t’ufeg rok ni dabimus.

Revelation 19:15

Me yib ba saydon u lan l’ugun nib m’uth, ni ir e nge maruwel ngay nge gel ngak e pi nam. Bay mang ir e i gagiyeg nagrad nga ba ley i wasey, ma bayi uduy e grape u lan fare n’en nma uduy e grape u lan, ni aram e damumuw rok Got ni Gubin ma Rayag Rok.

Daniel 11:44

Me rus nga murung’agen ban’en ni yib ngak u ngek ngu lel’uch, me mael nike el merin nge li’ pire’ e girdi’.

Revelation 10:7

Machane ngiyal’ nra thoy e bin medlip e engel e rappa rok riy, e aram e nge rin’ Got e tin ni kem’ay i leamnag rok ni bod rogon ni yog ngak e pi tapigpig rok ni pi profet, mi i par nib mith.”

Revelation 13:16

Me gelnag fare gamanman ir ngak urngin e girdi’ ni pi’in yad ba sobut’ nge pi’in yad ba tolang, nge pi’in ni bo’or ban’en rorad nge pi’in yad ba gafgow, nge pi’in yad e sib nge pi’in ni gathi yad e sib ni ngan tay ba pow nga daken e rifrif u ba’ ni mat’aw i pa’rad nge nga daken peri’rad,

Revelation 19:18

Mired ngam longuyed e ufin u downgin e pi pilung, nge pi’in nth’abi tolang ko salthaw, nge pi salthaw, nge ufin ko os nge pi’in nra afgad nga daken, nge ufin rok urngin e girdi’, ni pi’in yad e sib nge pi’in ni gathi yad e sib, nge pi’in nib tolang nge pi’in nib sobut’!”