Psalms 86:5 - Bible Ni Thothup

⁵ Gur e gab gol ngomad ma ga ma n’agfan u wun’um e kireb romad, ma gubin e pi’in yad ma meybil ngom e yad ba sug ko fare t’ufeg rom ni dabimus.

Psalms 86:5 Referans Kwoze

Joel 2:13

Mu paged lanin’med nike m’ing nge gagyal u dakenmed; ma gathi kemus ni ngam guchthuyed e mad romed.’ Mu sulod ngak SOMOL ni ir e Got romed. Ya ba gol ma ba sug ko runguy’; ya ba gumaen’ mma tay u gil’ e tin ni micheg; ma gubin ngiyal’ ma ke fal’eg rogon ni nge n’ag fan u wan’ e kireb ma gathi nge gechig.

Exodus 34:6

Me th’ab SOMOL p’eowchen Moses me non ni ba ga’ laman ni ga’ar, “I Gag SOMOL, i gag ba Got ni gub sug ko murnguy mma kirban’ug, ma ba sowath ni gu ma damumuw ma gu ma dag e t’ufeg rog nib ga’ ma gub yul’yul’.

Nehemiah 9:17

Ra siyegned ni ngar folgad rom, ma kar paged talin urngin e pin’en ni um rin’; ra paged talin fapi maang’ang ni um ngongliy. Miyad duwgiliy be’ u fithik’ e ufanthin ni nge yog e thin rorad me fulwegrad nga Egypt ngar pired ni yad e sib. Machane gur ba Got ni ga ma n’ag fan u wun’um e kireb; gab gol ma ba t’uf e girdi’ rom, ma ba sowath ni gama damumuw. Runguy rom e ba ga’, aram fan nda mu n’agrad.

Psalms 103:8

I SOMOL e rib marnguy ma ba ga’ e t’ufeg rok, ba sowath nma yib e damumuw ngak, ma ba sug ko t’ufeg ni dabimus.

Acts 2:21

Ma aram e cha’ nra pining fithingan Somol ni nge ayuweg e ra fos.

Psalms 145:18

Ma ba chugur ngak urngin e pi’in yad ma non ngak, ni yad be non ngak u fithik’ e yul’yul’.

Psalms 86:15

Machane gur Somol e ga ba Got nri gama runguy ma bt’uf e girdi’ rom, gubin ngiyal’ ni ga ba gumaen’, gubin ngiyal’ ni ga ba gol ma ga ba yul’yul’.

Psalms 25:8

SOMOL e mmat’aw ma bfel’; mma fil ngak e pi tadenen e kanawo’ ni ngar leked.

Psalms 130:7

Israel, mu pagan’um ngak SOMOL, ni bochan e t’ufeg rok e dabimus, gubin ngiyal’ ni yugu be par ni ba’adag ni nge mat’aw nigem ngak.

John 4:10

Me fulweg Jesus ni ga’ar, “Fa’an mang e ga manang e n’en nma pi’ Got nge en ni be ning e ran ngom ni nge unum, ma kam wenig ngak ke pi’ e ran ngom nma pi’ e yafos.”

Mikah 7:18

SOMOL, dakuriy yugu reb e got nga bang ni bod gur; kam n’ag fan e denen rok e tin ke magey ko girdi’ rom. Damur par ni gab damumuw ni dariy n’umngin nap’an, ga ba felan’ ngay ni ga ma dag ngomad fare t’ufeg rom ni dabimus.

Daniel 9:9

I gur e ga ma runguy e girdi’ ma ga ma n’ag fan u wun’um e kireb rok e girdi’, yug aram rogon ni u gu togopluwgad ngom.

Ezekiel 36:37

I SOMOL ni Th’abi Tolang e be ga’ar, “Bay gon’ daken. Bay gu gagiyegnag yu Israel ngar weniggad ngog ni nggu ayuwegrad. Bay gu gagiyeg nagrad ngar pire’ gad ni bod ba ran’ i saf.

Ezekiel 36:33

I SOMOL ni Th’abi Tolang e be ga’ar, “Nap’an ni bay gu chuweg urngin e denen romed ngam machalboggad, mu gu gagiyeg nagmed ngam sulod ngam pired ngalan e pi binaw romed bayay mi gimed ngongliy rogon.

Jeremiah 33:3

“Mu piningeg mu gu fulweg lungum; gu ra yog ngom boch ban’en nib manigil ma bfel’ ni damnang murung’agen.

Psalms 119:68

Rigab manigil — ma gab gol! Mu fil ngog e tin kamog ni ngan rin’.

Jonah 4:2

Ma aram me meybil ni ga’ar, “SOMOL, gu be fithem, gathi gog faram u m’on ndawor gu pag e tabinaw rog, ni irera’ e n’en ni ga ra rin’? Aram fan ni gu athamgil nggu mil nga Tarshish! Ya gu manang ni gur ba Got ni gab sumunguy ma ri ga ma runguy e girdi’; ma gubin ngiyal’ ni gab gumaen’, ma gubin ngiyal’ ni gab gol, ma gubin ngiyal’ ni kam fal’eg rogom kam par nrayag ni ngam thiliyeg lanin’um nge dab kum pi’ e gechig.

Isaiah 55:7

Pi’in kireb e ngongol rorad e ngar paged, miyad thiliyeg rogon e leam ni yad be tay. Miyad sul ngak SOMOL, ni Got rodad; ya ri ma runguy e girdi’, ma ba gur ni ma n’ag fan ban’en u wan’.

Psalms 130:4

Machane ga be n’ag fan romad, ni fan e ngu’ug pired ni bay madgum u wun’mad.

Psalms 69:16

SOMOL, mu fulweg taban e meybil u fanam gol ko fare t’ufeg rom ni dabimus; mu changar ngog u fithik’ gelngin e runguy rom ni ba ga’!

Psalms 36:7

A Got, rib th’ab feni fel’ e t’ufeg rom ni dabimus! Gamad be naf e girdi’ nga tan e taglul’ u pom.

Efesus 2:4

Machane runguy rok Got ngodad e ri ba ga’, ma rogon ni gadad ba t’uf rok e ri ba ga’,

Psalms 52:1

Mang ni ga be uf ko kireb rom, gur e en ni yargel? Feni yul’yul’ Got e dariy n’umngin nap’an.

Psalms 50:15

Mu piningedgag ko ngiyal’ nra yib e oloboch; mu gu lufmed riy, ma bay mu pininged e sorok ngog.”

Psalms 69:14

Mu ayuwegneg nge dab kug nguchur nga fithik’ e rungdu’; mu yororiyeg rok e pi to’ogor rog, ma ga ayuwegneg nge dab gu ligil nga’ar.

Psalms 103:3

Ma n’ag fan u wan’ urngin e denen rog mma faseg urngin e liliy nike yib ngog;