Psalms 102:14 - Bible Ni Thothup

¹⁴ Pi tapigpig rom e ba t’uf yu Zion rorad, ni yug aram rogon nike mogothgoth; ke kireban’rad ngak, ni yug aram rogon nike puth.

Psalms 102:14 Referans Kwoze

Nehemiah 4:2

Me welthin u p’eowchen e pi’in yad be un ngak nge pi salthaw nu Samaria ni ga’ar, “Mang e be leamnag e pi Jew ni gafgow ney ni yad be rin’? Gur yad be leamnag ni ngar fulweged e re binaw ney nga rogon? Gur yad be finey ni ngar pi’ed e gamanman ni maligach miyad mu’nag e re maruwel nem u lan ta’reb e rran? Gur ku rayag ni ngar fanayed e malang ko bin kakrom e yoror ni kan buthug ma kan urfiy?”

Psalms 79:1

A Got, ke yib boch e nam ni mael ngak e nam rom. Kar ta’ay niged fare Tempel rom nib thothup ma kar paged yu Jerusalem nike mogothgoth.

Nehemiah 4:10

Girdi’ nu Judah e bay ba tang rorad nron’ed ni ga’ar: Be m’ay gelngimad ni bochan e gachowor, malang nike muchubu’ ni ngan chuweg e pire’, ra diin me yag ni gu mu’ niged e re yoror ney e daba’?

Nehemiah 4:6

Ma gamad muruwliy fare yoror, ma de n’uw nap’an me yan i taw tolngin nga lukngun, ya be maruwel e girdi’ nib pasigan’rad.

Nehemiah 2:17

Ma aram me lungug ngorad, “Kam guyed e gafgow ni kad awgad nga fithik’, ke mogothgoth e binaw nu Jerusalem nge pi garog riy nike kireb! Ngad ubunged e yoror ko re binaw ney nge dab ku un darifannagdad.”

Nehemiah 2:3

mu gu fulweg ni lungug, “Pilung, ngam par ndariy n’umngin nap’an! Ra di’in mu gu par ndabi kireban’ug ni re binaw ni ka ni k’eyag e pi ga’ rog riy kakrom e ke mogothgoth ma pi garog riy e kan urfiy?”

Nehemiah 1:3

Miyad ga’ar ngog. “Pi’in nra mageygad ndar m’ad u lan binaw nra milgad u kalbus e yad be gafgow, ma yi be changar ngorad nga but’; ma fare yoror nu Jerusalem e ke puth nga but’, ma pi garog riy e ke mo’oruf nga but’.

Ezra 7:27

Me ga’ar Ezra, “Ke magaer SOMOL ni fare Got rok pi chitamangidad ni kakrom! Ke gagiyegnag fare pilung ke m’agan’ ngay ni nge tay fan e Tempel rok SOMOL ni bay u lan yu Jerusalem ni aray rogon!

Ezra 1:5

Ma pi lolugen e yu ke girdi’ ko pi ganong rok Judah nge Benjamin, nge pi prist nge pi Levite, nge urngin e pi’in ke tay Got nga lanin’rad ni ngranod e ra fal’eged rogorad ni ngranod ngar toyed e Tempel rok SOMOL u Jerusalem.

Daniel 9:16

I gur e gab mat’aw, ere dab kum damumuw ngak yu Jerusalem, ya ir e binaw rom, ni fare burey rom nib thothup. Urngin e girdi’ ko pi nam ni yad ba chugur ngay e yad be changar nga but’ ngak yu Jerusalem nge ngak e girdi’ rom ni bochan e denen ni kug rin’ed nge pi kireb ni i ngongliy e pi chitamangimad.

Ruth 1:6

Me munmun me rung’ag Naomi nike ayuweg SOMOL e girdi’ rok ya ke dammalnag e woldug rorad; me fal’eg rogon ni nge chuw u Moab ni yad fa gali ppin ni le’engin fak.

Psalms 119:126

SOMOL, ke taw ko ngiyal’ ni ngam mithmith, ya dakir fol e girdi’ ko motochiyel rom.

Isaiah 14:1

I SOMOL e bayi kirban’ bayay ko girdi’ rok nu Israel me mel’egrad ni nge mil farad ngak. Bayi pagrad ngar pired bayay u lan e nam rorad, ma girdi’ u bang e bay rabad ngar pired rorad.

Isaiah 40:2

Mu pi’ed e athamgil nga laniyan’ e girdi’ nu Jerusalem. Mogned ngorad nike gaman n’umngin nap’an ni kar gafgowgad, ma chiney e ken’ag Got fan e denen rorad. Kug gechig nagrad ke yan i mus nga rogon ni bochan urngin e denen rorad.”

Isaiah 51:3

“Bay gu dag e runguy rog nga Jerusalem, ngak gubin e pi’in yad be par u fithik’ e gafgow u rom. Ni yug aram rogon ni kan n’ag e re but’ rok nem, ma bay gu mangnag bangi milay’, ni bod fare milay’ ni gu yung u lan yu Eden. Madnom nge felfelan’ e yira tay u rom, mi ni tangnag e sorok ngog nge ogmagaer.

Jeremiah 29:10

“I ga’ar SOMOL, ‘Nap’an nra thumur medlip i ragag e duw u Babylon, ma bay gu dag e runguy rog ngomed nggu tay u gil’ e n’en ni gu micheg ni nggu fulwegmed nga tafenmed.

Jeremiah 30:18

Be ga’ar SOMOL, “Bay gu fulweg e girdi’ rog ko fare but’ rorad me yib e marnguy rog nga daken gubin e tabnaw; Jerusalem e bay ku ni ubung bayay, ma naun ko pilung riy e bay ku ni toy.