Obadiah 1:10 - Bible Ni Thothup

¹⁰ “Bochan e mororo’ nge thang pogofan ni um tay ngak pibe’ rom ni pi’in owchen Jakob, bay ni thirfem u but’ me m’ay fam ni manemus.

Obadiah 1:10 Referans Kwoze

Amos 1:11

Be ga’ar SOMOL, “Girdi’ nu Edom e kar denen gad bayay nge bayay, ere ri bay gu gechig nagrad. Kar lol’oged e girdi’ rorad ni piyu Israel, ni der kireban’rad ngorad. Dariy folan e damumuw rorad ni yug be par ni der m’ay.

Ezekiel 35:9

Bay gu gagiyegnag ngam par ni dakriy ban’en ni bfel’ rom bingyal’. Ma dariy be’ ni ku ra par u lan fapi binaw rom bayay. Ma aram e bay mu nang ni Gag fare SOMOL.

Psalms 89:45

Kam pilibthirnag ndawori taw nga nap’an, ke par nike m’ay fan.

Genesis 27:41

Me fanenikay Esau Jakob, ni bochan e ke fal’eg e chitamngin wa’athan, me yog u wan’ ni ga’ar, “Dabki n’uw nap’an mi ni mowawnag e chitamag nike yim’; ma aram e bay gu thang e fan rok Jakob.”

Psalms 137:7

SOMOL, mu leamnag e n’en ni rin’ e pi Edomite ko fa rofen nem nni kol yu Jerusalem ko mael. Mu leamnag rogon ni i lungurad, “Mu buthuged nge mada’ nga daken e but’!”

Mikah 7:10

Ma aram e bayi guy e pi to’ogor e ren’ey miyad tamra’, ni fapi to’ogor rodad ni ur moning gad ngodad ni be lungurad, “Bu uw fa’anem i SOMOL ni Got romed?” Bay da guyedrad ni kar waergad, ma yibe yot’rad nga but’ ni yad bod e rungdu’ u lan e kanawo’.

Joel 3:19

“Bayi par yu Egypt ni bod bangi ted ni desert, ma yu Edom e ke kireb ndakuriy ban’en ni bfel’ ngay, ni bochan e rchamgad ko nam nu Judah ngar li’ed e girdi’ riy, ni dariy ban’en ni kar bucheged.

Ezekiel 7:18

Bay ron’ed e mad ni tutuw nga dakenrad miyad t’on nreb. Bay ni puy piyan lolugrad, ma bayi ma’ farad ni yad gubin.

Lamentations 4:21

Um minmin gad, gimed e girdi’ nu Edom ngu Uz; ma gimed be felfelan’ e chingiyal’ n’ey ni ku rayag. Ya ku be yib e biromed e riya’; gimed mabay kum thigthiggad ni dariy e mad u dakenmed ni kam tamra’gad.

Jeremiah 51:51

Gimed be ga’ar, ‘Kandariyfan nagdad ma kan tamra’ nagdad; kug nanged ni kari m’ay gelingmad ni bochan e pi milekag e yad e ke gel farad ko yungin nib thothup u lan fare Tempel.’

Jeremiah 49:13

I gag e kug micheg ni fare binaw nu Bozrah e ra tamdag ya’an me par ni bangi daken e ted; girdi’ e bayi moningnag mu u roged fithingan nike mang ba yaba’. Gubin e yochi binaw u charen e ra mogothgoth ni dabki fel’ bi’id. I Gag SOMOL e kugog e pi thin ney.”

Jeremiah 3:25

Thingar da thiggad nga but’ u fithik’ e tamra’ nge mang m’ayfan rodad e upnguydad. Gadad nge pi chitamangidad kakrom e gubin ngiyal’ ni u da denengad nib togopluw ngak SOMOL ni Got rodad, ni da ud folgad ko tin ni yog.”

Psalms 132:18

Bay gu upunguy e pi to’ogor rok ko tamra’, ma gin bayi gagiyegnag e bayi fel’ rogon me mon’og.”

Psalms 109:29

Mang e yigi mathrow e pi to’ogor rog ko tamra’; mang e yug ro’ned e tamra’ nga dakenrad ni bod ba wuru’ e mad nib n’uw.

Psalms 69:7

Thin nib tagan e yibe yog ngog ni bocham, ma kug mathrow ko tamra’.

Genesis 27:11

Me ga’ar Jakob ngak e chitiningin, “Ga manang ni Esau e be’ nib mak’ piy downgin, me gag e de mak’ piy dowag.

Deuteronomy 23:7

“Dab mu dabuyed e pi Edomite; ya gimed girdi’. Ma dab mu dabuyed e pi Egyptian; ya immoy bangiyal’ ni um pired u daken e but’ rorad.

Proverbs 10:6

Be’ nib manigil e ra i fel’ wa’athan. Ma welthin rok be’ nib kireb laniyan’ e ma upnguy e kireb rok.

Deuteronomy 23:8

Pi’in owcharad e rayag ni ngar manged boch girdi’en SOMOL ko bin dalip e mfen i yan ngaram.

Proverbs 17:5

Fa’anra um dariyfannag e girdi’ ni gafgow, ma ga be darifannag Got ni ir e sunmiyrad. Yira gechig nagem ni fa’anra i felfelan’um ko gafgow nike aw ngak be’.

Jeremiah 12:14

I SOMOL e be ga’ar, “Bay ban’en ni nggog u murung’agen e pi’in yad bbuguliyoror yu Israel ni yad e ka ra kireb niged fare but’ ni gu pi’ ngak e girdi’ rog nu Israel. Bay gu chuweg e pi’in kireb ko nam rorad ni bod ba ke pan nni pug, ma bay gu ayweg piyu Judah u pa’rad.

Lamentations 4:22

Zion e ke pi’ puluwon e denen rok; i SOMOL e dabki ta’mad ni kalbus u milekag nib n’uw nap’an. Machane gur Edom, e bayi gechig nigem SOMOL; nge pug ngalang ngonglem ni kireb.