Jeremiah 50:19 - Bible Ni Thothup

¹⁹ Bay gu fulweg e girdi’ nu Israel nga taferad. Bay ra ked e gan ni be tugul u daken e burey ni Karmel u lan e nug nu Bashan, ma bay ra ked gubin e tin yad ba’adag ko woldug ni be tugul ko gin nib milsuwon nga Efraim ngu Gilead.

Jeremiah 50:19 Referans Kwoze

Mikah 7:14

SOMOL, mu par ni ga bod ba tagafaliy e saf u puluwon e tirom e girdi’, ni fapi girdi’ ni gur e kam mel’egrad. Yug aram rogon ni yad be par u ted, ma bay e but’ nib yong’ol ni ba liyegrad. Mu pagrad ngranod ra abich gad nga Bashan nggu Gilead nib yong’ol, ni bod ni ur rin’ed kakrom.

Jeremiah 31:6

Er rogon, bay ba ngiyal’ ni bayi taw ngay me pong e damit u daken e flang u Efraim ni be lungurad, ‘Mired! Ngdarod nga talang nga Zion, ngak SOMOL ni ir e Got rodad.’”

Mikah 7:18

SOMOL, dakuriy yugu reb e got nga bang ni bod gur; kam n’ag fan e denen rok e tin ke magey ko girdi’ rom. Damur par ni gab damumuw ni dariy n’umngin nap’an, ga ba felan’ ngay ni ga ma dag ngomad fare t’ufeg rom ni dabimus.

Ezekiel 38:8

Tomuren boch e duw ma bay gol’oeg ni nge cham ngab binaw ni aram e gin kan kunuy e girdi’ ni kan fulweg u boch e nam ngay ni yad be par ni dariy loren e mael rorad. Bayi cham ko pi burey nu Israel, ni kan pag nike n’uw nap’an ni dakriy ban’en riy, machane aram e gin bay gubin e girdi’ riy ni yad be par u fithik’ e gapas.

Ezekiel 36:33

I SOMOL ni Th’abi Tolang e be ga’ar, “Nap’an ni bay gu chuweg urngin e denen romed ngam machalboggad, mu gu gagiyeg nagmed ngam sulod ngam pired ngalan e pi binaw romed bayay mi gimed ngongliy rogon.

Ezekiel 36:24

Bay gu chuwegmed u gubin e nam mu gu fulwegmed ko nam romed.

Ezekiel 11:17

“Ere mog ngorad e n’en ni gu be yog, I gag SOMOL ni Th’abi Tolang. Bay gu kunkunuyrad ko pi nam ni gu weregrad riy, nggu fulwegrad bayay ko fare binaw nu Israel.

Jeremiah 32:37

I gag e nggu kunuy e girdi’ u gubin e nam ni gu weregrad riy u fithik’ e damumuw rog nib almarin, ni aram e nggu fulwegrad ngaray ngar pired ndariy ban’en nra buch rorad.

Jeremiah 31:25

Bay gu pasignag laniyan’ e pi’in ke aw porowrad, ma pi’in kar waer gad ni bochan e bilig e bay gu chum’er nagrad ko ggan.

Jeremiah 31:14

Ma bay gu suguy e pi prist ko tin th’abi fel’ e ggan, mu gu chum’ernag e girdi’ rog ko urngin e tin bt’uf rorad. I Gag SOMOL e kugog e pi thin ney.”

Jeremiah 30:18

Be ga’ar SOMOL, “Bay gu fulweg e girdi’ rog ko fare but’ rorad me yib e marnguy rog nga daken gubin e tabnaw; Jerusalem e bay ku ni ubung bayay, ma naun ko pilung riy e bay ku ni toy.

Jeremiah 30:10

“Girdi’ rog dab murus gad; gimed e girdi’ nu Israel, dabi aw e marus nga yal romed. Ya bay gu laegmed ko fare binaw nib palog, fare binaw ni gimed ba kalbus riy. Bay mu sulod nga tabnaw ngam pired u fithik’ e gapas; bay um pired ni dariy ban’en ni ku ra buch romed, ma dariy be’ ni ku ra k’ar marus ngomed.

Jeremiah 23:3

Ma aram e bay gu kunuy e tin bayi magey ko girdi’ rog ko pi nam i yan ni gag e kug weregrad ngay, nggu fulwegrad ko nam rorad. Ma bay yib pifakrad ni pire’ ngar yo’or gad.

Jeremiah 3:18

Bayi un Israel ngak Judah, ngar ta’reb gow, ngarbow ko lel’och ngar sulow ko fare binaw ni gu pi’ ngak e pi chitamangimed kakrom ni nge par ni tafara.”

Isaiah 35:2

Ted ni desert e bayi tang ma be tolulnag e felfelan’; bayi bod feni fel’ ya’an e Burey nu Lebanon, ma ba yong’ol e but’ riy ni bod e ted u Karmel ngu Sharon. Gubin e girdi’ ni bayi guy e muluplup rok SOMOL, nge feni ga’ nge feni gel gelngin.

Isaiah 33:9

But’ ko re nam ney e dakunir muruwliy ma kann’ag. Geargear nu Lebanon e ke mororoy, fare loway nu Sharon nib yong’ol e but’ riy e ke bod bangi ted ni desert, mu lan yu Bashan ngu daken e Burey ni Karmel e be mulmul yuwan e gek’iy riy nga but’.

Tang Ko Pitang 6:5

Mu chefeg e changar rom rog nga orel; ya be fek e fan rog. Piyan lolgem e be churu’ ni bod ba ran’ i kaming ni be ’og i yib nga p’ening ko burey nu Gilead.

Joshua 17:15

Me fulweg Joshua ni ga’ar, “Fa’anra kaygu myo’orgad ma dakumur fel’gad u daken fare gi binaw ni go’ burey u Efraim, me’ere mmarod ngalan e pi loway ngam tamilang niged bang ngam pired riy u tafen e piyu Periz nge pi Refaim.”

Numbers 32:1

Gal ganong rok Ruben nge Gad e ba yo’or e gamanman rorad. Nap’an e raguyed feni fel’ e binaw nu Jazer ngu Gilead ko chugol garbaw,

Jeremiah 30:7

Yaran e gafgow e nge anog; ni dariy reb e rran nrayag i ta’reb nag ngay — ni aram e ngiyal’ ni nge ngochngochan’ e girdi’ rog, machane yad ra fos.”

Jeremiah 46:27

“Girdi’ rog, dab mu tamdag gad, girdi’ nu Israel, dab mu rusgad. Bay gu chuwegmed ko fare nam nib orel, ni aram fare nam ni um kalbusgad riy. Bay mu sulod nga tafenmed ngam pired u fithik’ e gapas; dabki buch ban’en romed, ma dakriy be’ ni re k’ar dugow ngomed.

Jeremiah 50:6

“Girdi’ rog e yad bod e saf ni pi’in ma gafaliyrad e ra paged yad ngar malobochgad u lan e pi burey. U ra derawgad ni bod e saf u reb e burey nga reb, ni da ku ra nanged e gin bay taferad riy.

Ezekiel 47:18

“Mathil ko ngek e tabab ko mathil rok yu Damascus nge yu Hauran me yan u rom ko yimuch ko fare Lul’ nu Jordan ni ir e mathil u thilin e nam nu Israel ko ngal, ma nam nu Gilead ko ngek, nge yan i mada’ nga Tamar ni bochi binaw nib chugur ko Dead Sea.

Zekariah 10:10

Piyu Egypt ngu Assyria e bay gu fulwegrad nga taferad ngar pired u lan e nam rorad. Ku bay gu tayrad ngalan yu Gilead ngu Lebanon ngar pired riy; ga’ngin fare gi but’ ni bay i sugnag e girdi’.

Ezra 2:1

Ba yo’or e kalbus nra chuwgad u Babylon ngar sulod nga Jerusalem ngu Judah, ra be’ me sul ko re binaw ni be’ riy. Pi cha’ney nge chon e tabnaw rorad e ur kalbusgad u lan yu Babylon ni ka nap’an Nebukadnezzar ni Pilung me fekrad ni kalbus i yan ngaram.