Jeremiah 38:10 - Bible Ni Thothup

¹⁰ Me yog fare pilung ngak Ebedmelek ni nge fek dalip fapi pumo’on ni yad bay u rom ngranod ngar girngiyed gag nggu chuw u lan fare luwed ndawor gum’.

Jeremiah 38:10 Referans Kwoze

Proverbs 21:1

I SOMOL e ma gagiyegnag lanyan’ ba pilung nrib mom ni bod nma pow’iy wo’en e lul’.

Psalms 75:10

Ra buthug gelngin e pi’in kireb, machane gelngin e pi’in yad ba manigil e ra gel i yan.

Ester 8:7

Ma aram me ga’ar Xerxes ni Pilung ngak Ester ni Queen nge ngak Mordekai nib Jew, “A musapgow, kugog kan uchuluy Haman ke yim’ ni bochan e makath rok nib togopluw ngak e pi Jew, ma kug pi’ tafen ngak Ester.

Ester 5:2

Nap’an ni guy fare pilung i Ester ni Queen nib sak’iy u wean, mri felan’ nike guy, me foleg fare sog rok ngak nib gol. Me yib Ester i yib ngeb i math nga tabanggin fare sog.

Jeremiah 38:7

Machane Ebedmelek, ni be’ nu Ethiopia, nib mo’on nib tolang nma maruwel u tafen e pilung e rung’ag ni kan nguchuruyeg ngalan fare luwed. Ma ngiyal’nem e aram e bay e en ni pilung ko garog ni Benjamin fithingan ni be puf oloboch.

Jeremiah 38:9

“Pilung, n’en ke rin’ e pi girdi’ ney e ba kireb. Kar nguchuruyed Jeremiah ngalan fare luwed, nike muduwgil ni nge yim’ ko uyongol, ya, dakuriy e ggan u lan e re binaw ney.”

Jeremiah 38:11

Ma aram me fek Ebedmelek fapi pumo’on nge yan nga tafen e chugum u tafen e pilung nge fek boch e mad nike kaday me m’ag ko gaf nge nguchuruy ngog ngalan e luwed.