Jeremiah 33:6 - Bible Ni Thothup

⁶ Machane bay gu golnag e re binaw ney nge girdi’ riy mu gu chuweg e m’ar rorad. Bay gu pi’ e gapas ngorad nge yan i mus nga rogon ma dabi buch ban’en rorad.

Jeremiah 33:6 Referans Kwoze

John 10:10

Ma fare moro’ro’ e be yib ni kemus ni bochan e nge iring e saf, me li’ ngem’ me kirebnag. Me gag e ku gub ni bochan e nge yag e yafos ngorad, ni yafos nike yan i mus ngarogon.

Isaiah 30:26

Pul e ra ga’ ra’en nge bod e yal’, ma ra’en e yal’ e ra ga’ ni medlip yay nga ra’en ni immoy, ni bod ga’ngin e tamilang u medlip e rran ni kan puthuy nga ta’reb e rran. Ran’ey e ra yodroy ko ngiyal’ nra taflay nge golnag SOMOL e maad’ad ni tay ko girdi’ rok.

Psalms 67:2

ya nge nang e fayleng ni polo’ e tin nib magan’um ngay, me nang urngin e pi nam e ayuw ni ga ma pi’!

Isaiah 58:8

“Mi gimed fel’ u wan’ug ni bod ram’en e yal’ ni gal nga dakenmed ni kadbul, me papey nge fos e yungi n’en nike maad’ad u dowmed. Ma aram e gubin ngiyal’ ni bay ug par romed ngu’ug ayuwegmed; i gag ni gu bay romed e bay gu mang yoror ngomed.

Hosea 6:1

Be ga’ar e girdi’, “Ngad sulod ngak SOMOL. Ke popofdad, machane ku bayi faseg e maad’ad rodad; ke maad’ad ngodad; machane bayi m’ag e mad ko yungi n’en nike maad’ad u dowdad.

Isaiah 66:12

Be ga’ar SOMOL, “Bay gu pi e fla’ab ngomed ni dariy n’umngin nap’an; fla’ab ko pi nam e bayi map’ ngomed ni bod ba lul’ ndar mlik. Bay mboded bbitir ni be tathuthnag e chitiningin, ni be dibey be ayweg u fithik’ e t’ufeg.

1 Peter 1:3

Ngad pininged e magaer ngak Got ni ir e Chitamngin e Somol rodad i Jesus Kristus! Ya bochan e ri be runguydad me pi’ e yafos nib be’ech ngodad ni fan e faseg Jesus Kristus ko yam’. Ireray fan ni kad nanged ni tin ke l’agan’dad ngay e bay yib i m’ug nib riyul’,

Isaiah 54:13

“I gag e bay gu machibnag e girdi’ rom, mu gu pi’ e fel’ rogon nge gapas ngorad.

Hosea 7:1

“Nap’an ni gu ra leamnag ni nggu golnag e girdi’ rog nu Israel mug fal’eg rograd bayay, ma tin gu be guy e kemus ni leam rorad nge pangirad ni kireb. Yad be dumpumrad ngorad, ma yad be mab naun ngu’ur mororo’gad, ma yad be og ko girdi’ u kanawo’.

Jeremiah 17:14

SOMOL, mu gol nigeg ngarug gol; ma ga lageg nggu par ni dabi buch ban’en rog. Ri gur e gu ma pining e sorok ngom!

Mikah 4:3

Bay i triggiliy e malu’ag thin u thilin e pi nam, pi nam nib ga’ mab gel ntin ba chugur nge tin mal’af. Bay ra pirdi’iyed e pi saydon rorad ngemang kuwa nima gi’ e but’, miyad pirdi’iy e pi sarey rorad nge mang yaer nifen bugul e ew. Pi nam e dakriy bi’id ni yad ra mael bayay, ara rfal’eged rogorad bayay ni ngar maelgad.

Isaiah 55:7

Pi’in kireb e ngongol rorad e ngar paged, miyad thiliyeg rogon e leam ni yad be tay. Miyad sul ngak SOMOL, ni Got rodad; ya ri ma runguy e girdi’, ma ba gur ni ma n’ag fan ban’en u wan’.

Isaiah 2:4

Bayi gapaseg thilin e pi nam ni gang’. Bay ra ama niged e pi saydon rorad ngar ngongliyed talin e maruwel riy nma gi’ e but’ nge pi sarey rorad nge mang yar ni yima th’ab papa’ngin e woldug ngay. Pi nam e dab ku ra maelgad bayay, ma dab ku ra fal’eged rogorad bayay ni fan ko mael.

Psalms 37:11

machane pi’in ba sobut’anrad e bay ra pired u daken e nam, nge felan’rad nike yo’or ban’en rorad ma yad ba gapas.

Deuteronomy 32:39

“‘I Gag, ma kemus ni go’ Gag e Got; dakuriy yugu reb e got ngabang. Gu ma thang e pogofan ma gu ma pi’ e pogofan, gu ma maad’ad nigey ma gu ma faseg e maad’ad, ma dariy be’ nrayag ni nge togopluw ko tin gu ma rin’.

Efesus 6:23

I Got ni Chitamangiy nge Somol Jesus Kristus e ngu’ur pi’ew e gapas nge t’ufeg ngak urngin pi walagdad ni girdi’en Kristus, nib chagil ngay rogon nib mich Kristus u wun’uy.

Psalms 72:7

Mange yigi par ni be gel feni mat’aw u n’umngin nap’an e yafos rok, mi i man’og u n’umngin nap’an ni bay e pul ni be mat ram’en.

Exodus 34:6

Me th’ab SOMOL p’eowchen Moses me non ni ba ga’ laman ni ga’ar, “I Gag SOMOL, i gag ba Got ni gub sug ko murnguy mma kirban’ug, ma ba sowath ni gu ma damumuw ma gu ma dag e t’ufeg rog nib ga’ ma gub yul’yul’.

Isaiah 39:8

Me Hezekiah ni Pilung e leamnag ni fan e ran’ey e gapas nge dariy ban’en nra buch u n’umngin nap’an e yafos rok, aram me fulweg ni ga’ar, “Fare thin ni kamog ngog ni yib rok SOMOL e ba manigil.”

Jeremiah 3:22

Msulod, gimed urngin e pi’in ka mu pi’ed keru’med ku SOMOL; ra gol nagmed me gagiyeg nagmed ngam yul’yul’gad ngak. Gimed be ga’ar, “Arogon, ngu sulod ngak SOMOL ni bochan e ir e Got romad.

Malaki 4:2

Machane gimed e pi’in gimed be fol rog e rayib gelngig nma ayuwegey nga dakenmed ni bod ram’en e yal’, me gol nagmed. Ra puf mat’awmed ma gimed ra felfelan’ ni bod rogon pifak e garbaw nni bing e chum rorad ngranod nga wuru’.

Psalms 147:3

Ma be golnag laniyan’ e pi’in ke kireban’rad ma be taflaynag e maad’ad rorad.

Eklesiastes 3:3

nge ngal’an ni ngan thang e pogofan nge ngal’an ni ngan gol nigey; nge ngal’an ni ngan buthug nge ngal’an ni ngan toy.

Isaiah 57:18

“Kug guy rogon ni yad be ngongol, machane bay ggol nagrad. Bay gu pow’iyrad mu gu ayuwegrad, ma bay gu fel’eg laniyan’ e pi’in ke kireban’rad.

Isaiah 57:19

Ma bay gu pi’ e gapas ngak gubin e girdi’, ni tin yad ba chugur nge tin yad bpalog! Bay gu golnag e girdi’ rog.

Jeremiah 29:11

Yi go’ gag e gumnang e tin ku gu tanomnag ni fan ngomed, tanom ni nggu man’og nagmed ma gathi nggu gafgow nagmed, pi tanom nem e nge yag ngomed e tin u mu nameged.

Mikah 7:20

Bay mu dag fanam yul’yul’ nge fare t’ufeg rom ni dabimus ngak e girdi’ rom, ni pi’in owchen Abraham nge Jakob, ni bod rogon ni mmicheg ngak e pi chitamangimad kakrom.