Jeremiah 30:18 - Bible Ni Thothup

¹⁸ Be ga’ar SOMOL, “Bay gu fulweg e girdi’ rog ko fare but’ rorad me yib e marnguy rog nga daken gubin e tabnaw; Jerusalem e bay ku ni ubung bayay, ma naun ko pilung riy e bay ku ni toy.

Jeremiah 30:18 Referans Kwoze

Psalms 102:13

Bay mu sak’iy nge kireban’um ngak yu Zion; ke taw nga nap’an ni ngan runguy; irera’ ngal’an nike taw ngay.

Jeremiah 30:3

ya bay ba ngiyal’ ni bayi taw ngay ni nggu fulweg e girdi’ rog ni piyu Israel ngu Judah. Bay gu fulwegrad ko fare but’ ni gu pi’ ngak e pi chitamangirad kakrom, ma bay i milfan ngorad bayay. I Gag SOMOL e gu be non.”

Jeremiah 33:7

Bay gu gagiyegnag yu Judah nge yu Israel nge fel’ rograd, ma bay gu fal’eg taferad nge bod ko som’on.

Jeremiah 49:39

Machane tomuren e bay gu gagiyegnag e girdi’ nu Elam ngki fel’ rograd bayay. I Gag SOMOL e kugog e pi thin ney.”

Jeremiah 23:3

Ma aram e bay gu kunuy e tin bayi magey ko girdi’ rog ko pi nam i yan ni gag e kug weregrad ngay, nggu fulwegrad ko nam rorad. Ma bay yib pifakrad ni pire’ ngar yo’or gad.

Zekariah 1:16

Ere nggu sul nga Jerusalem ni nggu dag e runguy rog ko fare binaw. Tempel rog e bay ntoy bayay, ma fare binaw nu Jerusalem e bay kun ubung.”

Jeremiah 46:27

“Girdi’ rog, dab mu tamdag gad, girdi’ nu Israel, dab mu rusgad. Bay gu chuwegmed ko fare nam nib orel, ni aram fare nam ni um kalbusgad riy. Bay mu sulod nga tafenmed ngam pired u fithik’ e gapas; dabki buch ban’en romed, ma dakriy be’ ni re k’ar dugow ngomed.

Jeremiah 49:6

“Machane ra bingyal’ ma bay gu gagiyegnag yu Ammon nge fel’ rogon bayay. I Gag SOMOL e kugog e pi thin ney.”

Isaiah 44:26

Machane ngiyal’ nra yi’iynag e tapigpig rog ban’en, ma gu ra pi’ e mol’og rog ni nge yog ngak e girdi’ e tin kug leamnag, mu gu gagiyegnag e tin kug leamnag nge tin kug yi’iynag u l’ugun e tapigpig rog nge yib i m’ug nib riyul’. Kugog ngak yu Jerusalem ni bay kun sul nga ni par nga Jerusalem, ma pi binaw nu Judah e bay kun sul nga ni ngongliy rogon bayay. Pi binaw nem e bay gu fulweg nga rogon.

Jeremiah 31:4

Bay gu fal’eg rogomed bayay. Ma aram e bay ku mu sulod bayay ngam feked e pi talin e musik romed ni tambourine ngu’um churu’gad ni ka mu felfelan’gad.

Jeremiah 33:11

laman e felfelan’ nge garus nge laman e felfelan’ ko madnom ko m’agpa’. Ga ra rung’ag laman e girdi’ ni yad be tang ko ngiyal’ ni yad be fek e maligach ko ogmagaer ngalan e Tempel rog; bayi lungrad, ‘Ngan pining e magaer ngak SOMOL ni Gubin ma Rayag Rok, ni bochan e ba gol ma t’ufeg rok e dabimus.’ Bay gu fal’eg rogon e re nam ney ni bod rogon ko som’on. I Gag SOMOL e kugog e pi thin ney.”

1 Kronicles 29:19

Ma ga pi’ ngak Solomon ni fakag reb e leam ni bfel’ ni ngi i fol u gubin ban’en ni kamog ni ngan rin’, ma nge toy fare Tempel ni ku gu t’ar madlin ku gu tay.”

Jeremiah 29:14

Aram rogon ni kugog, gimed ra pir’egeg ma gu ra fulwegmed ko nam romed. Bay gu kunkunuymed u urngin e nam nge urngin yang ni ug weregmed riy, ma bay gu fulwegmed ko fare but’ ni ba’aram ni gu fekmed riy nggu pi’med nga Babylon. I Gag SOMOL e gu be non.’

Isaiah 44:28

Ke lungug ngak Cyrus, ‘Gur e bay mu gagiyeg ni pa’ag; bay mu rin’ e n’en ni gu ba’adag ni ngam rin’: bay mog ni ngan fulweg yu Jerusalem nga rogon mi ni ubung e def ko Tempel.’”

Jeremiah 31:38

Be ga’ar SOMOL, “Bayi taw nga bangiyal’ min ngongliy rogon fare binaw ni polo’ ni fan ngog, ni ngan tabab ko fare wulyang nu Hananel ni bay ko ngal ko fare garog ni Garog ko Tabthung fithingan.

Jeremiah 31:23

I SOMOL ni Gubin ma Rayag Rok, ni Got rok piyu Israel e be ga’ar, “Nap’an ni bay gu fulweg piyu Israel ko nam rorad, ma aram e bay rogned bayay u daken e nam nu Judah ngu lan e yochi binaw u rom ni bayi lungurad, ‘I SOMOL e nge fal’eg wa’athan fare burey nu Jerusalem nib thothup, ni fa gin nib thothup nma par riy.’

Zekariah 12:6

“Rofen nem e bay gu tay e fa yuke girdi’ nu Judah ni bod ba nifiy u loway fa lan bang i flang nike el wom’ngin e grain riy. Bay rthanged mit e girdi’ u gubin e pi nam nib liyegrad. Ma girdi’en yu Jerusalem e bay ur pired ni dabi buch ban’en rorad.

Psalms 78:69

Me toy e Tempel rok u rom ni bod tafen u tharmiy; ni ngongliy nib mayluy ni bod e fayleng, ni dariy bingyal’ nra buch ban’en riy.

Nehemiah 7:4

Fare binaw nu Jerusalem e ba ga’, machane de yo’or e girdi’ ni urpired u langgin, ma dawor i yo’or e naun ni kan toy u langgin e ngiyal’nem.

Psalms 85:1

SOMOL, ri gab gol ko nam rom. Ka mu fla’abnag yu Israel bayay.

Zekariah 14:10

Fagi binaw ni ga’ngin ni mus u Geba ko lel’och, nge mada’ nga Rimmon ko yimuch e bay ni pacheg nge ta’reb foyen. Yu Jerusalem e bayi tolang ngak urngin e pi binaw nib liyeg. Fare binaw nu Jerusalem e tabab ko fare Garog ni Benjamin nge mada’ ko fare Garog ni Tabthung, ko fa gin ni immoy ba garog riy kakrom, miki yan ko fare Wulyang rok Hananel, nge mada’ ko fare n’en ni yima udiy e wayin rok e en pilung riy.

Jeremiah 31:40

Ma fare loway ni ga’ngin ni yima yin’ e yam’ ngay nge dow, nge urngin yang e ted ni bay nga talang ko lul’ ni Kidron nge yan i mada’ ko fare garog ni Garog ko Os fithingan ko ngek e bayi par nib thothup ni fan ngog. Ma re binaw nem e gathi bay kun buthug e naun riy ara ni kirebnag bayay.”

1 Kronicles 29:1

Me weliy David ni Pilung ngak fare ulung i girdi’ ni gubin ni ga’ar: “Fakag i Solomon e ir e cha’ nike mel’eg Got, machane dawri ilal ma dawori yo’or ban’en nike nang rogon. Maruwel ni ngan rin’ e rib ga’, ni bochan e gathi ba naun ni tafen e pilung ni girdi’, ya ba tempel ni fen SOMOL ni Got.

Psalms 48:3

I Got e ke dag ni ir e matnag u lan fare binaw ni kan yororiy ni fan ko mael.

Psalms 48:13

mu yaliyed fapi rungrung mi gimed sikengnag e pi yoror ni fan ko mael, ya ngam ga’argad ngak e bin migid e mfen:

Psalms 122:7

Manga yigi aw e gapas u lan e yoror rom, me par e pi tafen e pilung rom ndabi buch ban’en rok e pi’in yad be par riy.”

Jeremiah 29:11

Yi go’ gag e gumnang e tin ku gu tanomnag ni fan ngomed, tanom ni nggu man’og nagmed ma gathi nggu gafgow nagmed, pi tanom nem e nge yag ngomed e tin u mu nameged.

Jeremiah 32:15

I SOMOL ni Gubin ma Rayag Rok, ni fare Got rok yu Israel, e keyog ni naun, nge flang, nge milay’ ni grape e bay kun chuw’iy bayay u lan e re binaw ney.”

Ezekiel 36:11

Bay gu yo’ornag e girdi’ nge garbaw. Bay mu yo’orgad nga rogon ni umed nsom’on, ma bay i yo’or pifakmed. Ma bay gu pagmed ngam pired u rom ni bod ni um pired ko som’on, ma bay ggelnag e fla’ab romed. Ma aram e bay mu nanged ni Gag fare SOMOL.

Amos 9:14

Bay gu fulweg e girdi’ rog ko nam rorad. Ma bay ra ngongliyed rogon lan e pi binaw rorad ni kan kirebnag miyad par riy; bay ra yunged yungi milay’ ni grape ngu’ur unumed e wayin riy; bay ra yunged yung i woldug ngu’ur ked wom’ngin e tin yad be yung.

Zekariah 1:12

Ma aram me ga’ar fare engel, “SOMOL ni Gubin ma Rayag Rok, kam par ni gab damumuw ngak yu Jerusalem nge pi binaw nu Judah nike gaman medlip i ragag e duw e chiney. Fin wi’in e ra taw ngay ma fin mu dag ngorad e runguy rom?”

Zekariah 12:7

“I Gag SOMOL e bay gu pi’ gelngin e pi salthaw nu Judah ngar gelgad nsom’on, ya nge dab ni leamnag ni pi’in owchen David nge girdi’ nu Jerusalem e yad ba sorok boch ngak piyu Judah.

Psalms 102:14

Pi tapigpig rom e ba t’uf yu Zion rorad, ni yug aram rogon nike mogothgoth; ke kireban’rad ngak, ni yug aram rogon nike puth.

Jeremiah 32:44

Girdi’ e bayi chuw’iy, ma bay ni ngongliy babyoren ngan sayin ngay min pag e hang nga daken u p’eowchen e girdi’ ni nge mang mich riy. Ran’ey e yira rin’ u lan tafen Benjamin, ngu lan gubin e pi binaw nib liyeg yu Jerusalem, nge yochi binaw nu Judah, nge yochi binaw u fithik’ e burey, nge tin u enggin e burey, ngu ley ni yimuch yu Judah. Bay gu fulweg e girdi’ ko binaw rorad. I Gag SOMOL e kugog e pi thin ney.”