Jeremiah 29:14 - Bible Ni Thothup

¹⁴ Aram rogon ni kugog, gimed ra pir’egeg ma gu ra fulwegmed ko nam romed. Bay gu kunkunuymed u urngin e nam nge urngin yang ni ug weregmed riy, ma bay gu fulwegmed ko fare but’ ni ba’aram ni gu fekmed riy nggu pi’med nga Babylon. I Gag SOMOL e gu be non.’

Jeremiah 29:14 Referans Kwoze

Jeremiah 30:3

ya bay ba ngiyal’ ni bayi taw ngay ni nggu fulweg e girdi’ rog ni piyu Israel ngu Judah. Bay gu fulwegrad ko fare but’ ni gu pi’ ngak e pi chitamangirad kakrom, ma bay i milfan ngorad bayay. I Gag SOMOL e gu be non.”

1 Kronicles 28:9

Me ga’ar ngak Solomon, “Fakag, gu be yog ngom ni ngam nang e Got rok e chitamam mag pigpig ngak u polo’ i gumircha’em ngu lanin’um, ni bod ni ug rin’. Manang gubin e tafnay rom nge tin ga be ar arnag, ma fa’an ga ra sul ngak ma ra rung’ag e meybil rom. Machane fa’anra mu fek yathin, ma ra n’agem ni manemus.

Roma 10:20

Mi Isaiah e de tamdag ni fa’ani ga’ar, “Be ga’ar Somol, Ke pir’egeg e pi’in ndarir gayed gag, kug m’ug ngak e pi’in ndarir fithed murung’ageg.”

Jeremiah 30:10

“Girdi’ rog dab murus gad; gimed e girdi’ nu Israel, dabi aw e marus nga yal romed. Ya bay gu laegmed ko fare binaw nib palog, fare binaw ni gimed ba kalbus riy. Bay mu sulod nga tabnaw ngam pired u fithik’ e gapas; bay um pired ni dariy ban’en ni ku ra buch romed, ma dariy be’ ni ku ra k’ar marus ngomed.

Isaiah 45:19

Dagur mith’ag e thin rog, ara tin gu be rin’. Da gu leamnag ni nge gayeg yu Israel u bang nib wagagey urngin ban’en riy. I Gag e SOMOL, ma tin riyul’ e gu be yog; tin nib mat’aw e gu ma gagiyegnag ngan nang.”

Psalms 126:4

SOMOL, mu fal’eg rogmad bayay, nri bod e n’uw ni fulweg e ran ngalan e pi lul’ nike mlik’.

Psalms 126:1

Nap’an ni fulwegdad SOMOL nga Jerusalem, ma gowa ba lik’ay!

Psalms 46:1

I Got e ir e manaf rodad me ir gelngidad, gubin ngiyal’ nike fal’eg rogon ke par nra yib e oloboch ngodad me ayuwegdad.

Psalms 32:6

Ere urngin e girdi’ rom nib yul’yul’ ngom e thi’ngar ra meybilgad ngom ko ngiyal’ ni kari t’uf e ayuw rorad; ra yib e gafgow ni bod e ran nga daken e binaw nib machreg, ma dabi taw ngorad.

Deuteronomy 30:3

ma aram e SOMOL ni Got romed e bayi runguymed, bayi fulwegmed ngam chuwgad ko fapi nam ni weregmed riy, me gagiyeg nagmed nge fel’ rogomed bayay.

Deuteronomy 4:7

“Dariy reb e nam ngabang, ndemturug feni sorok nma chichir e birok e kan ngak ni bod rogon SOMOL ni Got rodad nma chichir ngodad ko ngiyal’ ni gadad ra wenig ngak ni nge ayuwegdad.

Zefaniah 3:20

Arme nge taw ko fa ngiyal’! Ni bay gu fulweg fapi girdi’ romed nra wear gad nga gubin e pi nam; bay gu taymed nge gilbugwamed u ga’ngin e fayleng mug fal’eg rogomed bayay.” I SOMOL e keyog e pi thin ney.

Mikah 4:12

Machane pi nam nem e dar nanged e tin be leamnag SOMOL. Dar nanged ni be leamnag ni nge kunuyrad nge gechig nagrad, ni bod rogon wom’ngin e woldug ni grain nni kunuy ngabang nga ni gunugunuy.

Jeremiah 51:10

Be ga’ar SOMOL, “Girdi’ rog mu tolulgad ni nge lungmed, ‘I SOMOL e ke gagyelnag ni gadad bmat’aw. Darod nga doged ko girdi’ nu lan yu Jerusalem e n’en nike rin’ SOMOL ni Got rodad.’”

Isaiah 55:6

Mu sulod ngak SOMOL ngu’um meybilgad ngak e chiney ni kab chugur ngomed.

Amos 9:14

Bay gu fulweg e girdi’ rog ko nam rorad. Ma bay ra ngongliyed rogon lan e pi binaw rorad ni kan kirebnag miyad par riy; bay ra yunged yungi milay’ ni grape ngu’ur unumed e wayin riy; bay ra yunged yung i woldug ngu’ur ked wom’ngin e tin yad be yung.

Deuteronomy 30:1

“Kug pagfan ngomed ni gimed e ngam duwgiliyed ko fel’wa’athan fa buchwa’athan e nge yib ngomed. Nap’an nra yib e pin’ey ngomed ni gimed be par ko pi nam i yan ni SOMOL ni Got romed e ke weregmed riy, ma nge yib ngan’med e pi thin ney ni kugog.

Deuteronomy 30:5

ngam tafnayed e re nam ney ni i par pi chitamangimed riy kakrom. Ma bayi gagiyeg nagmed nge gel e fel’ rogon romed ngam yo’orgad ngak pi chitamangimed.

Isaiah 43:5

Dab mu rus, ya gu bay rom! “Bay gu fek e girdi’ rom i yib nga taferad, ni mus u lan e ngek nib mal’af nge yan i mus ngalan e ngal nib orel.

Isaiah 43:6

Bay gog ko lel’och ni nge pagrad, mu gog ngak e yimuch ni nge dabi telrad. Ya pi nam nib orel e nge sul e girdi’ rog riy, ni gubin yang u fayleng ni ngar sulod riy.

Jeremiah 3:14

“Mu sulod ngog, gimed e girdi’ ni dam yul’yul’gad; yab mil famed ngog. Bay gu mel’eg ta’ab gimed u ra reb fa yochi binaw nge lalag’ruw i gimed u ba kan e girdi’, nggu fulwegmed ko burey nu Zion.

Jeremiah 8:3

Ma girdi’ ko re nam ni kireb ney ni magach nde yim’, ni yad be par ko yungi n’en ni kug weregrad riy, e ku yad ba’adag ni ngarm’ad ko bin ni ngar pired ni yad bfos. I Gag SOMOL ni Gubin ma Rayag Rok e gu be non.”

Jeremiah 12:15

Machane tomuren ni ku gu chuwegrad, mra yib e runguy rog nga dakenrad; mug fulwegrad ni reb e nam nge reb ko but’ rok nge binaw rok.

Ezekiel 37:21

Ma ga weliy ngorad ni Gag SOMOL ni Th’abi Tolang e bay gu chuweg e girdi’ nu Israel u lan e pi nam ni kranod ngay, bay gu kunuyrad mu gu fulwegrad ko nam rorad.

Isaiah 14:1

I SOMOL e bayi kirban’ bayay ko girdi’ rok nu Israel me mel’egrad ni nge mil farad ngak. Bayi pagrad ngar pired bayay u lan e nam rorad, ma girdi’ u bang e bay rabad ngar pired rorad.

Jeremiah 30:18

Be ga’ar SOMOL, “Bay gu fulweg e girdi’ rog ko fare but’ rorad me yib e marnguy rog nga daken gubin e tabnaw; Jerusalem e bay ku ni ubung bayay, ma naun ko pilung riy e bay ku ni toy.

Jeremiah 31:16

Mu talgad ko meyor, ngam n’iged e lu’ u owchemed. Urngin e tin ka mu ngongliyed ni fan ngak pifakmed e dabiyag ni nge yan ndab ni fulweg labgen; bay ra sulod ngar chuwgad ko nam rok e pi to’ogor.

Jeremiah 31:17

Tin ni bfel’ ni bay yib ngom e kabay nga m’on; pi bitir rom e bayi sul ngom nga tabinaw. I Gag SOMOL e kugog e pi thin ney.

Jeremiah 31:23

I SOMOL ni Gubin ma Rayag Rok, ni Got rok piyu Israel e be ga’ar, “Nap’an ni bay gu fulweg piyu Israel ko nam rorad, ma aram e bay rogned bayay u daken e nam nu Judah ngu lan e yochi binaw u rom ni bayi lungurad, ‘I SOMOL e nge fal’eg wa’athan fare burey nu Jerusalem nib thothup, ni fa gin nib thothup nma par riy.’

Ezekiel 39:25

I SOMOL ni Th’abi Tolang e ga’ar, “Machane chiney e bay gu par ni bay e marnguy rog nga daken e pi’in owchen Jakob, ni fapi girdi’ nu Israel, ma bay gu gagiyegnag ngar fla’abgad bayay. Bay gu yororiy fithingag nib thothup.