Isaiah 63:12 - Bible Ni Thothup

¹² Bu uw SOMOL, ni rin’ u gelngin bogi maang’ang u pa’ Moses, i sey e day u maday me gafaliy e girdi’ rok u t’ay e regur ya nge gilbuguwan SOMOL ndariy n’umngin nap’an?”

Isaiah 63:12 Referans Kwoze

Exodus 15:16

Marus nge magar e mul nga dakenrad; bochan feni gel gelngin pa’am miyad duwgil u luwrad ni gowa ba malang, nge mada’ ko ngiyal’ nike yib e girdi’ rom kar thumurgad a SOMOL, ni fapi girdi’ ni kam pithigrad ko sib ni ur ted.

Psalms 78:13

I sey e day nge fekrad nga barba’; i suweg e day ngalang ni bod ruraba’ i rungrung.

Joshua 3:16

me tal e ran ko fare lul’ ndaki yan me mukun u p’ebugul e lul’ u Adam, ni fare binaw ni bay u to’oben yu Zarethan. Ma fare ran ni be yan ko re lul’ nem ngalan e Dead Sea e tal ndaki yan, me th’ab e girdi’ fare lul’ nga baraba’ u bang nib chugur nga Jeriko.

Isaiah 55:13

Yungi n’en ni go’ pan ni bay rachangalen e bayi tugul e gek’iy ni cypress riy; gek’iy ni myrtle e bayi tugul ko yungi n’en ni immoy e pan riy ni bay rachangalen. Ren’ey e ba pow ni bay i par ndariy n’umngin nap’an, ni ban’en ni ngi i puguran e pin’en ni Gag SOMOL e kug rin’.”

Psalms 80:1

Gur fare tagafaliy e saf nu Israel, mmotoyil ngomad; mu rung’ag e meybil romad, gur e tagagiyeg romad. Kam par nga tagl’im ngalang ko kerubim

Nehemiah 9:11

Mu ngongliy ba kanawo’ u fithik’ e day ni fan ngak e girdi’ rom ma ga pow’iy e girdi’ rom ngranod riy nike mlik’ e but’ riy nga barba’. Pi’in i tuluf rad e ra lumoch gad kore daynem, ni bod rogon ba malang ni ligil nga ar u lan e rigur ni be cham e day riy.

Isaiah 11:15

Bayi mliknag SOMOL lan fare Nguy ni Suez, ma ra pi’ e nifeng nib guwal nge mliknag e lul’ ni Eufrates, kemus ni medlip pa’ e lul’ nib achig e pag nrayag ni nge yan be’ u barba’ nga barba’.

Exodus 15:13

Mu par ni gab yul’yul’ ko tin ni mmicheg, ya mu gafaliy e pi girdi’ ni mu lagrad ko gafgow; gelngim e mu pow’iyrad ngay nga tafnam nib thothup.

Exodus 15:6

“SOMOL, ba’ ni mat’aw i pa’am e rib th’ab feni gel; ke tet’ar e pi to’ogor kar yochyanggad.

Roma 9:17

Ya ga’ar e babyor nib thothup ngak Farao, “Kug pilungnigem ni ba’aray fan, bochan e nggu maruwel ngom nge yag ni gu dag gelngig, min nang fithingag u fayleng ni polo’.”

Exodus 6:6

Ere ngamog ngak piyu Israel ni gu be ga’ar ngorad, ‘I gag SOMOL, e bay gu lagmed u tan gelngin e sib ni gimed be tay u Egypt. Bay gu pug pa’ag ngalang nib gel gelngin nggu pi’ ba gechig nib gel nga dakenrad, ma aram mu gu aywegmed.

Isaiah 43:16

Kakrom e ngongliy SOMOL ba kanawo’ ni yan u maday, bpa’ i kanawo’ ni yan u fithik’ e day ni be gireng nib gel.

Isaiah 51:10

Ku gur e mu mliknag e regur ma ga ngongliy e kanawo’ nge th’ab e day nga barba’, pi’in mu aywegrad e yag nra thapgad nga barba’.

Jeremiah 31:32

Dabi bod fare m’ag ni gu ngongliy u thilmad pi chitamangirad ko fa ngiyal’nem ni gu kol pa’rad nggu fekrad nga wuru’ yu Egypt. Ni yug aram rogon ni bod ni gag figirngirad, ma dar ted fare m’ag u gil’.

Jeremiah 32:20

Kakrom e um ngongliy e maang’ang nge tin un ngat ngay u lan yu Egypt, ma ga ul’ul ngay ke mada’ ko biney e rran, u lan yu Israel ngu fithik’ gubin e nam, ni aram e chiney e kan nangem u gubin yang.

Nehemiah 9:10

Ma’ang’ang nni gin ngay e mu ngongliy nib togopluw ngak Farao, nge ngak e pi tolang ni bay nga tan pa’ nge girdi’ ko nam rok, ya mu nang gelngin e gafgow ni yad be tay ngak e tirom e girdi’. Me gilbuguwam ni bod rogon e bin daba’ e rran ni ka ba gilbuguwam.

Isaiah 44:27

Bbugithin e gog me mlik’ e rigur.

Jeremiah 32:21

I rus e to’ogor romad ko maang’ang nge tin un ngat ngay, ya um maruwel nga gelngim nib gel ngam fek e girdi’ rom nu Israel nga wuru’ yu Egypt.