Isaiah 5:26 - Bible Ni Thothup

²⁶ I SOMOL e be pi’ e pow ni be pining ba nam nib palog nga orel. Ni be felger nagrad ni ngarbad u tungun e fayleng. Ma yad e ray ni karbad ni papay ni kemus payngirad.

Isaiah 5:26 Referans Kwoze

Zekariah 10:8

“Bay gu pining e girdi’ rog ngar mu’ulung gad nga ta’bang. Bay gu aywegrad ni dabi buch ban’en rorad ma bay gu yo’or nagrad ni bod farad yo’or kafram.

Isaiah 7:18

“Ra taw ko ngiyal’nem, me falgernag SOMOL yu Egypt ni ngarbad ni yad bod e lal ko fa yu pa’ i lul’ nrib orel ni yib ko fare lul’ ni Nile fithingan, ma ku bayi yodoromnag yu Assyria ngarbad ngaray ko nam rorad ni yad bod e ngul.

Isaiah 18:3

Ngam motoyilgad, gimed gubin e girdi’ nma par u fayleng! Mu sap niged bangi flak ni pow, ni ngan tining u daken p’ebgul e burey. Mi gimed motoyil nga lingan e rapa!

Deuteronomy 28:49

Bayi pag SOMOL ba nam nrib palog nga taban e fayleng nge togopluw ngomed, ba nam ndam nanged fan lungurad. Bay rab ra garpowgad nga dakenmed ni bod e manuw.

Isaiah 11:12

I Somol e bay i n’uf bang i flak ngalang ni nge dag ko pi nam ni be kunkunuy bayay nga ta’bang fapi girdi’ nu Israel ngu Judah nra werwergad ko fa aningeg i tabthung ko fayleng.

Malaki 1:11

Girdi’ u gubin yang u fayleng e yad be liyor ngog. Gubin yang ni yad be urfiy e incense riy ngar pi’ed ngog ma yad be pi’ e tin ni bfel’ e maligach. Yad gubin ni yad be liyor ngog!

Habakkuk 1:8

“Pi os rorad e bmachreg ko gamanman ni leopard, ma kabgel e damumuw rorad ko gamanman ni wolf nike yib e bilig ngorad. Pi girdi’en e yan u os rorad e rabad u bang nib orel; tungun ay e pi os rorad e be ker e but’. Yad be ngolol nga but’ ni bod e arche’ ni eagle ni nge og ko n’en ni nge longuy.

Joel 2:7

Yad ra cham ni bod girdi’en e mael; ma yad ra gararaw nga daken e yoror ni bod e salthaw. Yad gubin ni bay ranod u puluwrad nga m’on ndab ra thiliyeged e gin yad be sor ngay,

Lamentations 4:19

Ra tulfed gamad nib pay ni bod e arche’ ni eagle nike ngalol u lang nga but’. U ra gayed gamad u fithik’ e yochi burey; mug gin gad ma kan kolmad u daken e ted.

Jeremiah 51:27

“Mu daged e pow riy ni arme ngan cham! Mu thoyed e rappa’ ya nge yag ni rung’ag e pi nam! Mu gafaliyed e pi nam nge cham nga Babylon! Moged ko pi salthaw nu Ararat, Minni, ngu Ashkenaz ni ngar cham gad. Ngan duwgiliy be’ ni nge ga’ ni ir e nge girengiy e mael. Mu kunyed e os nib yo’or ni bod ba ran’ i asam’ning.

Jeremiah 5:15

Gimed e girdi’ nu Israel, I SOMOL e be pining ba nam nib orel ni nge cham ngomed. Ba nam nib gel ma ba kakrom, ni ba nam ni da mananged lungun.

Jeremiah 4:13

Amsap, pi to’ogor e karbad ni bod yungi manileng. Chariot rorad e bod e nanyor, ma pi os rorad e ba machrag ko arche’ ni eagle. Kad mu’gad! Riya’ gadad!

Isaiah 39:3

Ma aram me yan fare profet i Isaiah ngak Hezekiah ni Pilung me fith ni ga’ar, “Ke yib e pi pumo’on ney u uw nge mang e krogned ngom? Me fulweg Hezekiah ni ga’ar, “Karbad u Babylon nib binaw nib palog.”

Isaiah 30:16

Ya kam leam niged ni ngam afgad nga daken e pi os romed nib machreg ngam milgad rok e pi to’ogor romed. Ma soromed, ya rib mudugil ni bay mmilgad! Gimed be leamnag nib machreg e pi os romed, machane pi’in bay ra lol’iged gimed e ka yad ba machreg boch ngomed!

Isaiah 13:5

Yad be yib u bogi nam nib palog u tungun e fayleng. SOMOL e be yib u fithik’ e damumuw rok ni nge gathay e nam ni ga’ngin.

Isaiah 13:2

U p’ebgul e burey nib tamilang mag girengiy e flak ko mael ngalang! Ma ga tolul ko pi salthaw ni kam tining pa’am ngalang ni pow ni ngar oggad ko garog ko fare binaw nib tolngan’ e girdi’ riy.

Psalms 72:8

Gagiyeg rok e yan u bang e day nga bang e day, me tabab ko lul’ ni Eufrates nge yan i taw nga tungun e fayleng.

Psalms 60:4

Ka mu ginaeng e pi’in bay madgum u wan’rad, ya nge yag nra thaygad ko riya’.

Isaiah 10:3

Mang e gimed ra rin’ ko ngiyal’ ni nge gechig nagmed Got? Ma ba mang e gimed ra rin’ ko ngiyal’ nra girengiy e riya’ u reb e nam nga dakenmed? U uw e gimed ra mil ngay ni ngam pir’egged e ayuw riy? Ma uw e gin gimed ra mithag talinmed ngay?

Isaiah 13:3

I SOMOL e pining e salthaw rok nib falu’ ma ba m’uthan’rad ni ngar chamgad ko fare mael nib thothup ngar gechig naged e pi’in ba damumuw ngorad.

Isaiah 13:4

Motoyil ko mayngar u p’ebgul e pi burey — ni laman e girdi’ nib yo’or, lungun e pi nam nge pi pilung ni be mokun. I SOMOL ko yu raba’ i salthaw e be t’ar madilen e yu raba’ i salthaw rok ni ngan mael.

Isaiah 31:9

Emperor rorad e bayi mil nike rus, ma pi tolang ko salthaw e bayi gel e marus ngorad ngar n’iged e yungi flak ni yad ma fek ko mael.” I SOMOL e be non, fare SOMOL ni yima liyor ngak u Jerusalem, ma nifiy rok e be gak’ u rom ni fan ko maligach.

Ezekiel 38:17

I gur e cha’ ni gu weliy murung’agem kakrom, gu weliy u daken e tapigpig rog, ni fapi profet nu Israel, ni pi rran ni bay i yib e bay gu tay be’ ni nge cham nga Israel.” I SOMOL ni Th’abi Tolang e be non.