Isaiah 49:23 - Bible Ni Thothup

²³ Ra par e pi pilung ni yad e ra pofed gur, ma pi le’engirad e bay ur tathuth niged gur ni bod rogon e chitiningiy. Bay ra parawgad u p’eowchem ngar ted fam; ma bay ra ted fam u fithik’ e sobut’an’. Ma aram e bay mu nang ni Gag e SOMOL; dariy be’ ni be son nageg ni nggu ayuweg nra m’ingan’.”

Isaiah 49:23 Referans Kwoze

Isaiah 60:16

Pi nam nge pi pilung e bay ur ayuweged gur Ni bod ba matin ni be tathuthnag fak. Ma bay mu nang ni Gag SOMOL e kug chuwegem u pa’ e to’ogor rom, Fare Got nu Israel nib gel gelngin e ke tem nike puf rogom.

Isaiah 60:14

Pifak e pi’in ur gafgow niged gur e bay rabad Ra siro’gad ngom ngar ted fam. Urngin e pi’in ni ur darifan niged gur e bay ra parawgad u to’oben rifrifen em. Bay rogned fithingam ni fare ‘Binaw rok SOMOL,’ ‘Zion, ni fare Binaw rok fare Got nib Thothup nu Israel.’

Isaiah 60:3

Ma pi nam e bay ra leked rama’em i yib, Ma pi pilung e bay ra leked rama’em i yib ni bod e woch ni puf ngorad!

Mikah 7:17

Bay ur sirgig gad u fithik’ e fiyath ni bod rogon e porchoyog; bay ra chuwgad ko yungi n’en ni yad be mith riy ngarbad nga tamilang ni yad be t’on ko marus. U fithik’ e marus miyad pigichel ngak SOMOL ni Got rodad.

Isaiah 45:14

I SOMOL e be ga’ar ngak yu Israel, “Gubin e falel’ nge machaf nu Egypt ngu Ethiopia e bayi mil suwon ngom, ma pumo’on ni n’un’uw nu Seba e bay ra manged sib rom; bay ra leked gur ni kanin’ e chen ngorad. Bay ra siro’gad ngom me lungurad, ‘Got e bay rom, kemus ni ir e Got.

Roma 10:11

Ya be ga’ar e babyor nib thothup, “En nra michan’ ngak Kristus e dabi kireban’.”

Psalms 25:3

Pi’in yad be toer ngom e dab ra waergad, machane pi’in nib machreg ni yad ma togopluw ngom e yad ma waer.

Revelation 3:9

Mmotoyil! Fare ulung i girdi’ nib mil farad ku Satan, ni fapi cha’ ni yad be lifith l’ugunrad ma yad be yog ni yad piyu Israel machane gathi aram rogon e bay gu gagiyeg nagrad ngarbad ra parawgad nga but’ ngar siro’gad ko rifrif u em. Ma yad gubin ni bay ra nanged ni gab t’uf rog.

Isaiah 64:4

Dariy be’ ni ka’ e guy ara rung’ag murung’agen yu gu reb e Got ni bod gur, nma ngongliy e mitney e ngongol ni fan ngak e pi’in ni kar pired ni be l’agan’rad ngak.

Isaiah 49:7

Got rok yu Israel nib thothup ni ir e ke biyuliyrad e be ga’ar ngak fa’anem nri yibe darifannag, ma be fanenikay e pi nam daken, me ir e tapigpig rok e pi pilung: “Pi pilung e bay ra guyed gur ndakuriy be’ ni ga bay u tan pa’ miyad yib ngar ted fam; ku er rogon e pi’in yad ma gagiyeg ni bay ra guyed miyad paraw nga but’ ngar ted fam.” Bayi yodoro’ ya SOMOL e ke mel’eg fare tapigpig rok; ma Got rok yu Israel nib thothup e ma tay e thin rok u gil’.

Isaiah 25:9

Nap’an nra yodrom, ma gubin e girdi’ ni bayi ga’ar, “Ir e Got rodad! Kad ted e pagan’ rodad nga daken, ma ke aywegdad ni de buch ban’en rodad. I ir e SOMOL! Kad ted e pagan’ rodad nga daken, ma chiney e kad felfelan’gad ma kad ufgad ni bochan e ke ayuwegdad.”

Psalms 34:22

I SOMOL e ra ayuweg e pogofan rok e pi tapigpig rok; ma dabi gechignag e pi’in yad ra yan ngak ni ngar nafgad nga tan pa’.

1 Peter 2:6

Ya babyor nib thothup e be ga’ar: “Kug mel’eg ba malang nri ba ga’ fan, ni ir e kug tay ni ir e re malang ni ba ga’ fan u Zion; ni en nra michan’ ngak e ri dabi kireban’.”

Roma 9:33

ni ir e be weliy e babyor nib thothup murung’agen ni be ga’ar: “Mu guyed, kug tay ngalan yu Zion ba malang ni bay i tun ay e girdi’ ngay, ba war ni ngar dol’gad ngay. Machane en nra michan’ ngak e dabi m’ingan’.”

Isaiah 62:2

Jerusalem, pi nam e bay ra guyed e pi gel ni ka mu tay! Gubin e pilung ko pi nam nem ma bay ra guyed fel’ngim. Bay ni pining reb e ngachal ngom nib be’ech, ni ba ngachal ni SOMOL e pi’.

Numbers 11:12

Gathi gag e gu sunumegrad ara gu gargelegrad! Ere mang ni kamog ngog ni nggu dinobiyrad ni bod be’ ni bpin ni be tathuthnag pifak mu gu fekrad i yan ko fare nam ni gur e mmicheg ngak pi chitamangirad ni kakrom ni bay mpi’ ngorad?

Roma 5:5

Re pagan’ ney e dabi m’ing lanin’dad riy, ya Got e ke pu’og e t’ufeg rok nga fithik’ i lanin’dad u daken fare Kan Nthothup, ni ir e tow’ath rok Got ngodad.

Isaiah 52:15

Machane chiney e bpire’ e nam ni bay ra ngatgad ngak, pi pilung e bay ra ngatgad ngak ni ka ra paged langrad. Bay ra guyed miyad nangfan ban’en nda ur nanged.”

Psalms 138:4

SOMOL, gubin e pilung nu fayleng e bay ra pininged e sorok ngom, ya kar rung’aged e tin kam micheg.

Psalms 68:31

Pi owchen reb e nam nga reb e bay rabad u Egypt; piyu Ethiopia e bay ra tininged pa’rad ngalang ngar meybilgad ngak Got.

Joel 2:27

Ma gimed piyu Israel e bay mu nanged ni gu ba’ u fithik’med, me Gag SOMOL, e Gag e Got romed, ma dakuriy yugu reb e Got ngabang. Girdi’ rog e gathi bay kun darifannagrad bayay.

Psalms 69:6

Dab mpageg ngug girengiy e tamra’ nga daken e pi’in gur e yad be toer ngom, i gur SOMOL ni Got ni Gubin ma Rayag Rom ni Th’abi Tolang! Dab mu pageg nggu girengiy e may’fan nga daken e pi’in yad ma meybil ngom, I gur Got nu Israel!

Genesis 43:26

Fa’ani yib Josef nga tabinaw, miyad fek fapi tow’ath i yib ngak ngalan e naun, marbad ra siro’gad ngak nge yan i math owcherad nga but’.

Genesis 27:29

Ma pi nam e ngar manged tapigpig rom, ma girdi’en e pi nam e ngu’ur siro’gad ngom. Ma ga par ni gur e masta rok e girdi’ rom, mi i siro’ ngom e pi’in ni owchen e chitinam. Ma pi’in yad ra yibilayem ni nge buch wa’atham, e nge buch wa’athrad, ma pi’in yad ra yibilayem ni nge fel’ wa’atham, e nge fel’ wa’athrad.”

Exodus 6:7

Bay gu taymed ni gimed girdi’eg, mu gu par ni kug mang Got romed. Ma bay mu nanged ni gag SOMOL ni Got romed ko ngiyal’ ni bay gu lufmed ko sib ni um ted u lan yu Egypt.

Isaiah 14:1

I SOMOL e bayi kirban’ bayay ko girdi’ rok nu Israel me mel’egrad ni nge mil farad ngak. Bayi pagrad ngar pired bayay u lan e nam rorad, ma girdi’ u bang e bay rabad ngar pired rorad.

Isaiah 14:2

Pire’ e nam ni bayi ayweg e girdi’ nu Israel ngar sulod ko fare nam ni pi’ SOMOL ngorad, mu rom e bayi pigpig e pi nam riy ngak piyu Israel ni bod e sib. Pi’in nra koled piyu Israel e bayi mang yu Israel e kolrad e chiney, ni girdi’ nu Israel e bay ur gagiyeg niged e pi’in ur gafgow niged yad.

Isaiah 26:8

Gamad be falwok u lanin’um ma gur e lagan’ romad; i gur e gubin tabon lanin’mad.

Isaiah 29:22

Ere chiney e SOMOL, ni Got rok piyu Israel, ni ayuweg Abraham ko gafgow, e be ga’ar, “Girdi’ rog, dab ku mu pired nib m’ay famed, ma dabki awat owchamed ko tamra’ bingyal’.

Isaiah 41:20

Girdi’ e bay ra guyed miyad nang ni Gag SOMOL e kug yodoromnag. Bay ra nanged ni fare Got nib thothup rok yu Israel e ke yodoromnag.”

Isaiah 43:10

“Gimed e girdi’ nu Israel, gimed e mich rog; kug duwgiliymed ni ngam manged ba nam ni tapigpig rog, ni fan e ngam nanged gag mu gu mich u wun’med, me tamilangan’med riy ni kemus ni Gag e Got. Dakuriy yu gu reb e got nga bang; immoy ndariy, ma ku dariy ni bayib.

Isaiah 45:17

Machane SOMOL e ke chuweg yu Israel u pa’ e to’ogor rok, ma felfelan’ rok yu Israel nike gel e bayi par ni dariy n’umngin nap’an; ma girdi’ rok e dab kun darifan nagrad.’”

Isaiah 52:6

Machane bayi taw nga bangiyal’ ma bay mogned ni Gag e Got, ma kug welthin ngomed.”

Ezekiel 37:6

Bay gu tay e ufin nga dowmed, mu gu ing e biyach u wuru’. Bay gu pi’ e pogofan romed nggu fasegmed bayay. Ma aram e bay mu nanged ni Gag e SOMOL.”

Isaiah 50:7

Machane moning ni yad be tay ngog e dariy ban’en nra rin’ ngog, ya SOMOL ni Th’abi Tolang e be pi’ e ayuw ngog. Kug athamgil, ya gu manang ndabiyag ni nge yan i aw ndariy fag,

Matthew 25:16

Ma fare tapigpig ni kan pi’ lal biyu’ e salpiy ni wasey nib gol ngak e yan ni kachingiyal’ nem nge maruwel ko fare salpiy ni kan pi’ ngak ngki yagnag reb e lal i biyu’ riy.