Isaiah 45:21 - Bible Ni Thothup

²¹ Mu feked e oloboch romed i yib nga tafen e puf oloboch, me puruy’ e pi’in ta ayuw u tafen e puf oloboch. I mini’ kakrom e i yi’iynag e n’en ni nge taw ngay? Gathi Gag fare SOMOL, ni fare Got ni ayuweg e girdi’ rok? Dakuriy yugu reb e got ngabang.

Isaiah 45:21 Referans Kwoze

Isaiah 45:5

“I Gag e SOMOL; dakuriy yugu reb e got ngabang. Gelngim ndabisiy ni nge yag ngom e bay gu pi’ ngom, ni yugu aray rogon nda mu nangeg.

Isaiah 43:11

“Kemus ni Gag e SOMOL, kemus ni gag e rayag rog ni nggu ayuwegmed u pa’ e to’ogor romed.

Isaiah 43:9

Mpininged e pi nam ngarbad ko pufthin. Bin ngan e pi got rorad e rayag rok ni nge yog e tin bay fini yib? Mini’ e arorad e yi’iynag e pin’en ni be m’ug e chiney? Pi got nem e ngar feked e pi mich rorad ngarbad ngar micheged ni yad e sororad, ngar micheged ni thin rorad e ba riyul’.

Zefaniah 3:17

Fare SOMOL ni Got romed e be par romed; ni gelngin e be gel nagmed. Bayi felfelan’ SOMOL ngomed, ma fithik’ e t’ufeg rok e bayi pi’ reb e yafos nib be’ech ngomed. Bayi tang ma be felfelan’ ngomed,

Isaiah 48:14

“Mu’ulunggad ngam motoyilgad, ni gimed gubin! Dariy reb e got ni yag ni nge yi’iynag ni fare mo’on ni gu mel’eg e ra cham nga Babylon; ni bayi rin’ e n’en ni gu ba’adag ni nge rin’.

Isaiah 45:25

I Gag SOMOL e bay gu chuweg urngin e pi’in owchen Jakob u pa’ e to’ogor rorad, ma bay ra pininged e magaer nge sorok ngog.

Isaiah 45:18

I SOMOL e sunumiy lanelang, i ir e en ir e Got! I ir e sunumeg e fayleng, ke ngongliy rogon ke par. De ngongliy nge tay ni bangi ted ndariy ban’en riy ma der tugul ban’en riy, ya tay ni ngi i par e girdi’ riy. Ir e ga’ar, “I Gag e SOMOL, ma dariy yugu reb e got ngabang.

Isaiah 45:14

I SOMOL e be ga’ar ngak yu Israel, “Gubin e falel’ nge machaf nu Egypt ngu Ethiopia e bayi mil suwon ngom, ma pumo’on ni n’un’uw nu Seba e bay ra manged sib rom; bay ra leked gur ni kanin’ e chen ngorad. Bay ra siro’gad ngom me lungurad, ‘Got e bay rom, kemus ni ir e Got.

Isaiah 43:3

Ya Gag e SOMOL ni Got rom, ni fare Got nib thothup nu Israel ni ir e ma chuwegem u pa’ e to’ogor rom. Bay gu tay yu Egypt nga luwam ni fan e ngan pagem; bay gu tay yu Ethiopia nge yu Seba nga luwam.

Isaiah 63:1

“Mini’ e cha’nem ni be yib u Bozrah ko binaw nu Edom? Mini’ e cha’nem nike yin’ e mad ni row nrib gamog, ni be yib ni bay gelngin nib gel?” Ir SOMOL ni bay gelngin nira ayuw, nike yib ni nge yog nike gel.

Isaiah 48:3

Be ga’ar SOMOL ngak yu Israel, “Kakrom e u gog ko mang e nge buch; mu gu gagiyegnag nge taw ngay nib tomgin.

Isaiah 41:26

I mini’ e aromed ni ka’a yi’iynag nra yodro’ ni arrogon, me yag ni gogned e sorok ngak ni dawor i yodrom? Dariy bigimed nike yog bbugithin ni murung’agen; dariy be’ ni rung’ag ni mogned ta’ab bugithin!

Psalms 96:10

Mogned ngak urngin e nam ni nge lungumed, “I SOMOL e ir e pilung! Fayleng e kan tay nga tagil’ ndabiyag ni ngan mithmitheg; rib yal’uw rogon ni bayi pufthinnag e girdi’.”

Psalms 26:7

Gu be yon’ tangin e ogmagaer ni gu be weliy murung’agen urngin e gafarig rom ni rib manigil.

Zekariah 9:9

Gimed e girdi’ nu Zion, mfelfelan’gad, mfelfelan’gad! Gimed e girdi’ nu Jerusalem, mu garus niged e felfelan’! Mu sapgad, pilung romed e be yib ngomed! Be yib nib felfelan’ ya ma gel ko pi to’ogor rok, machane ba sobut’an’, ma ke yib nike af nga daken ba dongki, ke af nga daken ba fak e dongki.

Jeremiah 50:2

“Mu weliy fapi thin ngak e pi nam! Ngam weliy i yan! Mu dag e pow riy ma ga be weliy fapi thin! Dab mu tay nib mith! Ke thay pa’ yu Babylon! Fare got rok ni Marduk e ke wearwear! Pi liyos rok yu Babylon e ka ni tamra’nag; ma fapi ya’an bogi n’en ni kan toy nib sonogor e kan bilbilig!

Zefaniah 3:5

Machane SOMOL e ka be par u lan fare binaw; n’en nib mat’aw e be rin’ ya dariy e ngiyal’ nma rin’ ban’en nib kireb. Dariy reb e kadbul nde rin’ e tin nib mat’aw ko girdi’ rok. Ma girdi’ u rom nde mat’aw e go’ kireb e yad be rin’ ni dariy e ngar tamra’gad.

Acts 15:18

Ireray rogon nike yog Somol, ni ir e ke gagiyegnag e re bugithin ney kan nang ni kakrom.’

Psalms 83:18

Mang e yugur nanged ni kemus ni gur e SOMOL, ni gur fare tagagiyeg Nib Th’abi Tolang u polo’ e fayleng.

Isaiah 19:20

Galin’ey e bay i mang pow u lan yu Egypt ni bay SOMOL ni Gubin ma Rayag Rok u rom. Nap’an nra gafgow e girdi’ u rom miyad pining SOMOL ni nge ayuw, ma ra pi’ be’ ni nge aywegrad.

Isaiah 60:16

Pi nam nge pi pilung e bay ur ayuweged gur Ni bod ba matin ni be tathuthnag fak. Ma bay mu nang ni Gag SOMOL e kug chuwegem u pa’ e to’ogor rom, Fare Got nu Israel nib gel gelngin e ke tem nike puf rogom.

Hosea 13:4

Be ga’ar SOMOL, “I Gag SOMOL ni Got romed, ni gag e gu pow’iymed nga wuru’ yu Egypt. Re ngiyal’ i nem e dariy reb e Got romed kemus ni Gag. Yi go’ gag e ta’ayuw romed.

Zekariah 14:7

ma ku dabki nep’. Yug bay i par nib rran, ni mus ko ngiyal’ nma nep’ riy. Re ngiyal’ nra yodrom e pin’ey e kemus ni go’ SOMOL e manang.

Zekariah 14:9

Ma aram e bayi mang SOMOL e pilung u fayleng ni ga’ngin; gubin e girdi’ e bay ra liyor gad ngak ni ir Got miyad nang ni ku ireram fithingan.