Isaiah 24:14 - Bible Ni Thothup

¹⁴ Pi’in rfosgad e bay ra tang niged e felfelan’. Ma pi’in bay ko ngal e bay ra weliyed feni sorok SOMOL,

Isaiah 24:14 Referans Kwoze

Zekariah 2:10

Ke ga’ar SOMOL, “Mu tang niged e felfelan’ gimed piyu Jerusalem! Arme kugub ni nggu par u fithik’med!”

Jeremiah 33:11

laman e felfelan’ nge garus nge laman e felfelan’ ko madnom ko m’agpa’. Ga ra rung’ag laman e girdi’ ni yad be tang ko ngiyal’ ni yad be fek e maligach ko ogmagaer ngalan e Tempel rog; bayi lungrad, ‘Ngan pining e magaer ngak SOMOL ni Gubin ma Rayag Rok, ni bochan e ba gol ma t’ufeg rok e dabimus.’ Bay gu fal’eg rogon e re nam ney ni bod rogon ko som’on. I Gag SOMOL e kugog e pi thin ney.”

Jeremiah 31:12

Bay rabad ngar tang niged e felfelan’ u daken e burey ni Zion, miyad felfelan’ ko pi tow’ath rog ngorad, ni grain nge wayin nge gapgep ni olive, nge saf nge garbaw. Bay ra pired ni yad bod bangi milay’ ni bfel’ rogon ni yibe tarannag, ma aram e bayi yag ngorad gubin e tin ba t’uf rorad.

Jeremiah 30:19

Girdi’ nma par u rom e bay ra tang niged e og magaer nge sorok; ma bay ra tolul gad ngalang ko felfelan’. Fal’eg wa’ath rog ngorad e ngar yo’or gad; towa’ath rog ngorad e bay un tay farad.

Isaiah 54:1

Jerusalem um par ni bod be’ ni bpin ndariy e bitir rok. Machane chiney e rayag ni ngam tang ma ga be garusnag e felfelan’. Ya chiney e bayi yag e bitir ngom nib pire’ boch ngak be’ ni bpin ni der chuw figirngin u charen!

Isaiah 51:11

Pi’in mu lagrad ko gafgow e bay ra tawgad nga Jerusalem u fithik’ e felfelan’, yad be tang ma yad be garusnag e felfelan’. Bay ra pired ni yad ba felfelan’ ndariy n’umngin nap’an, ni ka ra pufgad ni urun ko kirban’ nge gafgowan’.

Isaiah 44:23

Lan e lang, mu tolulnag e felfelan’! Yungi n’en nib to’ar u fayleng, mu tolulgad. Pi burey nge urngin kaen e gek’iy ko yungi gerger, mu garus niged e felfelan’! I SOMOL e ke biyuliy e girdi’ rok nu Israel, ni aram e ke dag feni gel nge feni sorok.

Isaiah 40:9

Jerusalem, mman nga daken e burey nib tolang; mu weliy e re thin ney ni bfel’! Zion, mu tolul ni ba ga’ lamam; mu weliy e re thin ney ni bfel’! Mu non ni ba ga’ lamam, ma dab mu rus. Mog ngak e pi binaw nu Judah ni fare Got rorad e be yib!

Isaiah 35:10

Ma bay ra tawgad nga Jerusalem nike felan’rad, ni yad be tang ma yad be tolulnag e felfelan’. Ma bay ur pired ni yad be felfelan’ ndariy n’umngin nap’an, ndabki yib e kireban’ nge gafowan’ ngorad.

Isaiah 35:2

Ted ni desert e bayi tang ma be tolulnag e felfelan’; bayi bod feni fel’ ya’an e Burey nu Lebanon, ma ba yong’ol e but’ riy ni bod e ted u Karmel ngu Sharon. Gubin e girdi’ ni bayi guy e muluplup rok SOMOL, nge feni ga’ nge feni gel gelngin.

Isaiah 27:2

Rofen nem e bayi yog SOMOL fare milay’ rok ni grape nib felan’ ngay ni nge ga’ar,

Isaiah 26:1

Bayi taw nga reb e rran nra yin’ e girdi’ e re tang ni ba’aray u lan yu Judah: Binaw romad e ba gel! Got e ir e ma n’uf e pi rungrung riy.

Isaiah 25:1

SOMOL, I gur e Got rog; Bay ug liyor ngom mu gu mathangeluwolnag fithingam. Kam ngongliy bogi maang’ang; ri ga ba yul’yul’ u rogon ni ga be rin’ e pin’en ni ka mu tanomnag kakrom.

Isaiah 48:20

Mu chuw u Babylon, mman nike puf rogom! Mu tolulnag murung’agen u fithik’ e felfelan’; muruwliy ngan nang u gubin yang: “I SOMOL e ke ayweg yu Israel ni tapigpig rok!”

Isaiah 60:5

Bay mu guy ni aray rogon me yib e felfelan’ ngom; Bayi mithmith gumircha’em nib gel ni bochan e felfelan’. Fel’ rogon ko pi nam e bay ni fek i yib ngom; Fel’ rogon rorad e bayi th’ab lan e day nge yib ngom.

Jeremiah 51:10

Be ga’ar SOMOL, “Girdi’ rog mu tolulgad ni nge lungmed, ‘I SOMOL e ke gagyelnag ni gadad bmat’aw. Darod nga doged ko girdi’ nu lan yu Jerusalem e n’en nike rin’ SOMOL ni Got rodad.’”