Galatia 3:8 - Bible Ni Thothup

⁸ Dawori taw ngay ma keyog e babyor nib thothup ni Got e bayi mat’awnag e pi’in gathi yad piyu Israel ngak u daken e michan’ rorad ngak. Aram fan ni machibnag e babyor nib thothup ngak Abraham e Thin Ni Bfel’ ni yib rok Got u m’on riy ndawori taw nga nap’an ni ba’aray ni ga’ar: “U dakenam e bayi fal’eg Got wa’athan urngin e girdi’ nu fayleng riy.”

Galatia 3:8 Referans Kwoze

Genesis 12:3

Gu ra fal’eg wa’athan e pi’in yad ra fal’eg wa’atham, ma gu ra bucheg wa’athan e pi’in yad ra yibilayem ni nge kireb wa’atham. Urngin e nam nu fayleng e bay i fel’ wa’athrad ni bocham.”

Genesis 22:18

Ma urngin e nam nu fayleng ni bay ra weniggad ngog ni nggu fal’eg wa’athrad ni bod rogon ni kug fal’eg wa’athan e pi’in ni owchem, ni bochan e kamfol ko tin kugog ngom ni ngam rin’.”

Genesis 28:14

Pi’in owchem e bay ra boded urngin e fiyath nu fayleng. Ma bay ra ga’ niged e nam rorad i yan ko lel’och, nge yimuch, nge ngek, nge ngal, ma urngin e pi nam nu fayleng e bay i fel’ wa’athrad ni bocham nge bochan e pi’in owchem.

Genesis 26:4

Bay gu yo’ornag e pi’in bayib ni owchem ni bod rogon e t’uf u lanelang, mug pi’ ngorad ga’ngin e gi but’ ney. Ma urngin e nam nu fayleng ni bay ra ninged ngog ninggu fal’eg wa’athrad ni bod ni kug fal’eg wa’athan e pi’in owchem.

Genesis 18:18

Pi’in owchen e bay ra manged reb e nam ni ba ga’ ma ba gel, ma urngin e nam nu fayleng e bay i fel’ wa’athrad ni bochan.

Hebrews 4:2

Ya kad rung’aged fare Thin Ni Bfel’ ni yib rok Got, ni bod rogon ni rung’ag fapi cha’nem. Rrung’aged e thin rok Got ma de fel’ rogorad ko re thin nem, ya fa’an rrung’aged ma da i michan’rad ngay.

Galatia 3:22

Machane fare babyor nib thothup e keyog ni girdi’ ko re fayleng ney ni polo’ e yad bay u tan gelngin e denen, ni bochan e pi arorad nra michan’ ngak Jesus Kristus e rayag ngorad fare tow’ath ni ognag Got nra pi’ ngak e pi’in ke mich Jesus Kristus u wun’rad.

Galatia 3:16

Ere Got e ognag ngak Abraham e tin ni nge pi’ ngak Abraham nge ngak be’ ni bay sum ni owchen Abraham. Ma de yog ni ga’ar, “nge ngak e pi’in bay ra sumgad ni owchen Abraham,” ni fan e re bugithin nem e bo’or e girdi’. Machane rogon ni yog e ga’ar, “nge ngak be’ ni bayi sum ni owchen Abraham,” ni fan e re bugithin nem e kemus nta’abe’, ni aram Kristus.

John 7:38

Ni bod rogon ni be yog e babyor nib thothup ni be ga’ar, ‘En nra gu mich u wan’ e ra yib e ran u yu pa’ i lul’ nge yib i map’ u lan ngorongoren nga but’, ni ran nma pi’ e yafos.’ ”

Genesis 49:10

Fare sog ko pilung e dabi chuw rok Judah, ma ku dabi chuw fa lay i ren ni fen e gagiyeg u thilin e rifrif u ay; nge mada’ ko ngiyal’ ni bay yib e en ir e fen, ma bay i fol e girdi’ rok.

Revelation 11:15

Me thoy fa bin medlip e engel e rappa rok, me yan lamay ni ba ga’ u lan e tharmiy ni be lunguy, “Ke yib gelngin Somol rodad nge Messiah rok ni ngar gagiyegnigew e girdi’ nu fayleng, ma bayi gagiyegnag ndariy n’umngin nap’an!”

Roma 9:30

Ere mang e nga dogned? Nga dogned ni pi’in gathi yad piyu Israel ni bogni’ nda ur guyed rogon ni ngar mat’awniged yad ngak Got e mat’awnagrad Got ngak u daken e michan’ rorad ngak Jesus Kristus;

Roma 9:17

Ya ga’ar e babyor nib thothup ngak Farao, “Kug pilungnigem ni ba’aray fan, bochan e nggu maruwel ngom nge yag ni gu dag gelngig, min nang fithingag u fayleng ni polo’.”

Isaiah 65:9

Bay gu tow’athnag puyu Israel, ni pi’in nib mu’un ko ganong rok Judah, ma pi’in owchrad e bayi milfan e pi burey rog ngorad. Girdi’ rog ni gu mel’eg, ni yad ma pigpig ngog e bay ra pired u rom.

Galatia 4:30

Machane mang e tin ni be yog e babyor nib thothup? Be yog ni be ga’ar, “Mu n’ag fare pin nib sib nge fak ni pumo’on; ya fak fare pin nib sib e dab ra f’othew fak fare pin nde sib tafen e chitamangirow.”

Acts 2:35

nge yan i mada’ ko ngiyal’ ni bay gu tay e pi to’ogor rom nga tan e rifrif u em ni nge mang tagil’ e magif ko rifrif u em.’

John 7:42

Ya be yog fare babyor nib thothup ni fare Messiah e be’ ni owchen e ganong rok David, ma yira gargeleg u lan yu Bethlehem, ni fare binaw ni i par David riy.”

Isaiah 6:13

Ni mus ni fa’anra ragag e girdi’ me magey ta’abe’ riy u daken e re nam ney, ma ku er rogon ir ni bay ni thang e pogofan rok; ra bod muchun ba ke gek’iy ni oak ni kan th’ab.” (Fare muchun e be yip’ fan ni bay ki sum e girdi’ rok Got bayay.)

Psalms 72:7

Mange yigi par ni be gel feni mat’aw u n’umngin nap’an e yafos rok, mi i man’og u n’umngin nap’an ni bay e pul ni be mat ram’en.

John 19:37

Ma ku bay ni kan yoloy u lan e babyor nib thothup ni ga’ar, “Bay i changar e girdi’ ngak e en ni kar kurufed.”

Jeremiah 4:2

ma aram e rayag ni ngam mowgad u fithingag. Ma aram e gubin e nam e bay roged ngog ni nggu tow’ath nagrad, ma bay ra pininged e sorok ngog.”