Exodus 3:17 - Bible Ni Thothup

¹⁷ Ma kug turguy ni nggu fekrad nga wuru’ yu Egypt, ni ireram e gin yibe gafgow nagrad riy, nggu fekrad nga ba nam nib madnom ma ba yong’ol e but’ riy — ni fare nam rok yu Kanaan, ngu Hitt, ngu Amor, ngu Periz, ngu Hiv, nge yu Jebus.

Exodus 3:17 Referans Kwoze

Genesis 50:24

Me ga’ar ngak pi walagen ni pumo’on, “Ke chugur ni bay gum’, machane Got e rib muduwgil ni bay i ayuwegmed, me fekmed nga wuru’ e re nam ney me pow’iymed ko fare nam ni fa’ani micheg ngak Abraham nge Isak nge Jakob ni bayi pi’ ngorad.”

Joshua 24:11

Mi gimed th’ab e lul’ ni Jordan nga barba’ ngambad nga Jeriko. Me mael piyu Jeriko ngomed, ma ku aram e n’en ni rin’ e pi Amorite ngomed, nge Perizzite, nge Kanaanite, nge Hittite, nge Girgashite, nge Hivite, nge Jebusite. Mu gu gagiyegnag ngam gelgad ngorad.

Genesis 46:4

Bay gu un ngom nga Egypt, ma bay gu fulweg e pi’in owchem ngaray. Mra taw nga nap’an ni nga mum’ ma bay Josef u to’obem.”

Genesis 50:25

Ma aram me wenig Josef ngak fapi pumo’on ni fak Israel ni ngar micheged bbugithin ngak u mit Got. I ga’ar, “Mmicheged ngog nnap’an nra ayuwegmed Got u fithik’ e runguy rok ngomed, ma gimed ra fek e yil rog nge un ngomed.”

Exodus 6:6

Ere ngamog ngak piyu Israel ni gu be ga’ar ngorad, ‘I gag SOMOL, e bay gu lagmed u tan gelngin e sib ni gimed be tay u Egypt. Bay gu pug pa’ag ngalang nib gel gelngin nggu pi’ ba gechig nib gel nga dakenrad, ma aram mu gu aywegmed.

Exodus 13:5

Kri micheg SOMOL ngak e pi chitamangimed ni kakrom nra pi’ ngomed e binaw rok piyu Kanaan, Hitt, Amor, Hiv nge piyu Jebus. Nap’an e ra fekmed SOMOL i yan ngalan fare binaw nib madnom mab yung’ol but’an, ma thingar um madnom niged e re rran ney u lan e bin som’on e pul ko yu duw.

Exodus 32:34

Mman e chiney, ngam gafaliy yu Israel ko gin ni kugog murung’agen ngom. Dab mu pag talin ni engel rog e bay i pow’iyem, machane bay bingiyal’ ni bayi taw ngay ni nggu gechignag e pi girdi’ ney ni bochan e denen ni kar ngongliyed.”

Exodus 33:3

Ngam marod nga ba nam ni pire’ ban’en riy ma ba yong’ol e but’ riy. Machane gathi bay gu un ngomed, ya gimed girdi’en ba nam ni gimed ba gelan’, ma richey mu gu li’med u kanawo’ ngam m’ad.”

Numbers 13:27

Lungurad ngak Moses, “Kug lekged fare nam ni mol’ogmad ni nggu warod ngay; ba nam nib pire’ ban’en riy ma ba yong’ol e but’ riy, ma ba’aray boch i wom’ngin e woldug riy ni kug feked.

Deuteronomy 6:3

Gimed e girdi’ nu Israel, mu telmed ngu’um folgad ko pi motochiyel ney, nge yag ni fel’ rogomed me yo’or e girdi’ romed u daken e re nam nem ni bfel’ rogon ma ba yong’ol e but’ riy, ni bod rogon nike micheg SOMOL ni Got rok e pi chitamangidad ngomed.

Deuteronomy 26:9

Me fekmad i yib ngaray me pi’ e re nam ney ngomad, nib nam ni bfel’ rogon ma ba yong’ol e but’ riy.

Joshua 9:1

Gel ni tay yu Israel e go’ nang gubin e pilung ni yad bay ko ngal u Jordan — u lan e pi burey, nga enggin e burey, nge ga’ngin dapel’ay u Mediterranean i yan nga Lebanon; ni aram e pilung nu Hit, Amor, Kanaan, Periz, Hiv, nge Jebus.

Jeremiah 32:22

Mag pi’ ngorad bbinaw ni bfel’ rogon mab yung’ol, ni bod ni mmicheg ko pi chitamangirad.

Levitikus 20:24

Machane re nam nem nib yong’ol ma ba madnom e kug micheg ni bay mu tafnayed, e bay gu pi’ ngomed. I Gag SOMOL ni Got romed, e kug faelmed nga bang u fithik’ e pi nam.

Joshua 5:6

Ya girdi’ nu Israel e uranod u daken e gi ted nem ni aningeg i ragag e duw. Nap’an ni taw ko ngiyal’nem ma urngin e pumo’on nike taw nga yangarrad ni ngar uned ko mael nra chuwgad u Egypt e karm’ad ya dar folgad ko tin ni yog SOMOL. Ya yog ngorad ndabi pagrad ngar guyed fare nam ni bfel’ rogon ma ba yong’ol e but’ riy ni fa’ani micheg ngak pi chitamangirad nra pi’ ngorad.

1 Kronicles 1:15

Hiv, Ark, Sin,

Psalms 102:21

Ma aram e fithngan e bay un weliy u Zion, ma bay ni pining e sorok ngak u Jerusalem

Jeremiah 11:5

Ma aram e gu ra tay u gil e n’en ni gu micheg ko pi chitamangirad ni gu ra pi’ ngorad fare binaw nib yong’ol ma ba madnom ni irera’ ni yad e taferad e chiney.” Mug ga’ar, “SOMOL arrogon.”

Ezekiel 20:6

Ma aram e ngiyal’ ni gu micheg ngorad ni bay gu fekrad nga wuru’ yu Egypt mu gu pow’iyrad ngab nam ni gu mel’eg ni fan ngorad, nib but’ nib yung’ol mab madnom, ni ir e th’abi fel’ u fithik’ e pi nam.