Exodus 20:24 - Bible Ni Thothup

²⁴ Mu ubungyed e altar rog ni but’, mi gimed tay e pi maligach ni ngan orfeg nga daken, ni bogi saf nge garbaw ni maligach ngog, nge pi maligach ko gapas u thildad. Ma gu ra yib ngomed nggu fal’eg wa’athmed u gubin yang ni kug turguy ni ngu’um meybilgad riy ngog.

Exodus 20:24 Referans Kwoze

Deuteronomy 12:5

Gi nam ni bayi par e pi ganong romed riy e bayi turguy SOMOL bang riy ni ir e ngu’um mu’ulunggad ngay ngam ted fan SOMOL mi gimed meybil ngak.

2 Kronicles 6:6

Machane chiney e ku gu mel’eg yu Jerusalem ni aram e gin ngu’un liyor ngog riy, me gur David e ngu’um gagiyegnag e girdi’ rog.’”

1 Kings 9:3

Me ga’ar SOMOL ngak, “Ku gu rung’ag e meybil rom. Re Tempel ney ni kam toy e ku gu tay nike mang Tempel rog ni ngu’un meybil ngog riy ndariy n’umngin nap’an. Bay ug matanagiy ma gu be yoror riy ni gubin ngiyal’.

2 Kronicles 7:16

ni bochan e ku gu mel’eg ma ku gu thothupnag ni irera’ e gin’en ngu’un liyor ngog riy ndariy n’umngin nap’an. Bay ug matanagiy ma gu be yoror riy ni gubin ngiyal’.

Deuteronomy 12:11

I SOMOL e bayi turguy bang ni aram e gin ni ngu’um liyorgad riy ngak, mu rom e ngam feked i yib ngak urngin ban’en ni kugog ngomed; pi maligach romed ni ngan urfiy nge yugu boch e maligach, nge ragag e pasent ko pin’en ke yag ngomed, nge pi tow’ath nib mal’eag ni kam micheged ngak SOMOL ni ngam pi’ed ngak.

Deuteronomy 16:11

Mu felfelan’ gad u p’eowchen SOMOL ni Got romed, ni gimed nge pifakmed, nge pi tapigpig, nge pi Levite, nge milekag, nge pi’in kanim’ rorad, nge pi’in ke yim’ figirngirad ni yad ma par u lan fa yoch i binaw romed. Mu rin’ed ni aray rogon ko fa ta’gin’en ni tagil’ e liyor.

2 Kronicles 12:13

Rehoboam e i gagiyeg u Jerusalem me gel gelngin ko pilung ni i tay. Ir e aningeg i ragag nge ta’reb e duw yangren me mang pilung, me gagiyeg ni ragag nge medlip e duw u Jerusalem, fare binaw nike mel’eg SOMOL u daken fare nam nu Israel ni ga’ngin ni ireram e gin nge mang tagil’ e liyor ni ngu’un tay ngak riy. Chitiningin Rehoboam e Naamah, ni be’ ko fare nam nu Ammon.

Deuteronomy 26:2

mra bigimed ma thangri dugnag e tin som’on nike yib u bmit e woldug nge bmit ngam feked i yib ko ta’gin’en tagil’ e liyor.

Ezra 6:12

Fare Got ni ir e duwgiliy ni yu Jerusalem e eram e gin ni ngu’un liyor ma yibe meybil ngak riy e mang e yigi thirif u but’ e re pilung fa re nam nra darifannag e re bugithin ney ma be guy rogon ni nge kirebnag fare Tempel u rom. I gag Darius e kugog e re bugithin ney; ma dabisiy ni ngan fol riy.”

1 Kings 8:29

Um matanagiy e re Tempel ney ni rran nge nep’, nre gin’ey ni gur e kam turguy ni ngu’un liyor ngom riy. Mu rung’ag lamag u nap’an ni gu ra sap ko re Tempel ney nggu meybil.

Matthew 18:20

Ya gin nra gak l’agruw fa dalip ni’ ngay u fithingag, e aram e gu bay rorad ko gin’em.

1 Kings 8:43

ma ga motoyil ko meybil rok. Mu telim ngak u tharmiy ni tafnam, ma ga rin’ e tin ke wenignag ngom ni ngam rin’, ya nge urngin e girdi’ ko pi nam nu fayleng miyad nangem mu ur pired ni bay madgum u wun’rad ni bod rogon e tirom e girdi’. Miyad nang ni re Tempel ney ni kug toy e irera’ e gin ni ngu’un liyor ngom riy.

Deuteronomy 14:23

Mi gimed yan ko gin ke turguy SOMOL ni Got romed ni nguum liyorgad riy ngak; mu rom u p’eowchen e ngam ked fapi yu ragag e pasent ko grain, nge wayin, nge gapgep ni olive, nge tin nganni’ u pifak e garbaw nge saf romed. Ngu’um rin’ed ni aray rogon, ya nge mechem ngomed ngi i par madgun SOMOL ni Got romed u wun’med ni gubin ngiyal’.

Psalms 74:7

Kar bilged e Tempel rom kar paged e nifiy ngay; kar dariyfan niged e gin yima liyor ngom riy.

Nehemiah 1:9

Ma fa’an gimed ra sul ngog ngu’um folgad ko tin gog ngomed ni ngu’um rin’ed, ma gu ra fulwegmed ko gin gag e kug turguy ni ngu’un liyor ma yibe meybil ngog riy, ni yugu aram rogon ni kam wergad kam mada’gad ko gin ni mus e fayleng ngay.’

2 Samuel 6:12

Me rung’ag David ni Pilung nike fal’eg Got rogon girdi’en e tabinaw rok Obed Edom nge urngin e tin bay rok ni bochan fare Kahol ko M’ag; ma aram me yan i fek u na’un rok Obed nge fek i yan nga Jerusalem, ni ba ga’ e madnom ntay ni fan ngay.

Malaki 1:11

Girdi’ u gubin yang u fayleng e yad be liyor ngog. Gubin yang ni yad be urfiy e incense riy ngar pi’ed ngog ma yad be pi’ e tin ni bfel’ e maligach. Yad gubin ni yad be liyor ngog!

Psalms 78:68

Me mang birok Judah e mel’eg nge fare burey ni Zion nrib t’uf rok.

Deuteronomy 12:21

Ma fa’anra kayigi palog fa ta’gin’en ni tagil’ e liyor, ma aram e demturug e ngiyal’ ni gimed ba’adag, mrayag ni mu li’ed reb e garbaw ara saf nike pi’ SOMOL ngomed, mrayag ni mu koyed e ufin riy u tabnaw, ni bod ni kugog ngomed.

1 Timothy 2:8

Gubin yang ni yira mu’ulung ngay ma gub adag ni pumo’on e nge meybil riy, ni pumo’on ni kar pi’ed yad nga pa’ Got mrayag ni ngar puged pa’rad ngalang ngar meybilgad ndarir damumuwgad ara yad be tugthin.

Matthew 28:20

mi gimed fil ngorad rogon ni ngu’ur folgad u gubin e tin kugog ngomed ni ngu’um rin’ed. Ma dab mpaged talin ni gubin ngiyal’ ma gu bay romed, nge yan i mada’ nga tomuren e fayleng.”

Psalms 76:2

Tabnaw rok e bay u Jerusalem; ma ir e ma par ko Burey ni Zion.

Psalms 134:3

Manga yigi fal’eg SOMOL ni sunumiy e tharmiy nge fayleng wa’athmed u Zion!

Psalms 128:5

Mang e yigi fal’eg SOMOL wa’atham u Zion! Mang e yugum guy ni be man’og yu Jerusalem ni gubin e rran u lane yafos rom!

Genesis 12:2

Bay gu gagiyeg nge yib owchem ni pire’ ni pire’, ni yad e bay ra manged girdi’en ba nam nib ga’. Bay gu fal’eg wa’atham mu gu gagiyeg nge gilbuguwan fithingam, me fel’ wa’athan e girdi’ ni bocham.

Deuteronomy 7:13

Bay mu pired ni gimed ba t’uf rok mi i fal’eg wa’athmed, ma be yo’ornagmed, ma be yo’or pifakmed; me fal’eg rogon e woldug romed nge yib e ggan ngay ni pire’, ni grain nge wayin nge gapgep ni olive, me pi’ e garbaw nge saf ngomed ni pire’. Bayi pi’ ngomed urngin e pi fel’ rogon ney u lan e re nam nem ni micheg ngak pi chitamangimed ni kakrom ni bayi pi’ ngomed.

Exodus 10:25

Me ga’ar Moses, “Fa’anra er rogon me gur e ngam pi’ e pi gamanman ni ngan pi’ ni maligach nge tin ngan urfiy ngan pi’ ni maligach ngak SOMOL ni Got romad.

Exodus 18:12

Ma aram me pi’ Jethro ba maligach ni ngan orfeg ni polo’ nge ku boch e maligach ni ngan pi’ ngak Got; me Aron nge urngin e pi’in yad ma yog e thin rok yu Israel e ra uned ngak Jethro ko abich ni aram e yad be liyor ngak Got.

Exodus 20:25

Ma fa’an gimed ra ngongliy e altar rog ko malang, ma dab mu flaged ko malang ni kan puy, ya fa’an gimed ra fanay e talin e maruwel ni chisel ngay ma aram e kam alit niged.

Exodus 24:5

Ma aram me l’oeg e pagel nu Israel ngar pi’ed e maligach ni ngan urfiy ni polo’, ma ku er rogon nra li’ed e garbaw ni ngan pi’ ni maligach ngak SOMOL, ni fan e nge aw e gapas u thilrad nge Got.

Exodus 27:1

“Mu ngongliyed ba altar ko gek’iy ni acacia. Re altar ney e ta’reb n’umngin nga radan, ya medlip nge baley e fit n’umngin, ma ku medlip nge baley e fit radan, ma aningeg nge baley e fit tolngin.

Levitikus 17:9

ni aram e ke ognag ngak SOMOL u bang ni gathi langan e mab ko fare Tent e yira n’ag ndabki mang reb e girdi’ rok Got.

2 Kings 5:17

Me ga’ar Naaman ngak, “Fa’anra dab mfek e tow’ath ni kug pi’ ngom, me ere mpi’ ngog boch e but’ u roy nrayag ni nge fek l’agruw i gamanman ni mule nggu fek ko nam rog, ya chiney i yan ngaram e dab kug pi’ e maligach ara gamanman ni maligach ni mo’oruf ngak yugu reb e got, ya kemus ni SOMOL e nggu pi’ ngak.

Isaiah 64:5

Bfel’ u wun’um e pi’in yad ba’adag ni ngar rin’ed e tin nib mat’aw, ni pi’in ndarir paged talin rogon nib m’agan’um ngay ni ngu’ur ngongolgad. Mu damumuw ngomad, ma gamad pi’ nga daken ngu’ug denengad; yugu aram rogom ni mpar ni kar mu damumuw ngomad, ma kayug gu pi’ed nga daken gamad be rin’ e kireb ni kab kakrom i yib.

Exodus 24:4

Me yoloy Moses nga but’ urngin e tin keyog SOMOL ni nge rin’ e girdi’ nu Israel. Me od Moses nri kakadbul, nge ubung ba altar u enggin fare burey, me suweg ragag nge l’agruw i malang, nra reb fapi malang ma fen reb fa ragag nge l’agruw i ganong nu Israel.

Psalms 101:2

Bayi fel’ pangig. Are wi’in e ga ra yib ngog? Bay gu par ni gu ba machalbog u nu’an rog

Psalms 122:2

Ere chiney e kugbad ngay, ni gamad ba sak’iy u lan e pi garog u Jerusalem!