Efesus 5:14 - Bible Ni Thothup

¹⁴ ya ren’en ni ka nib ndag ngalan e tamilang e ra mang tamilang. Aram fan ni kanog ni kan ga’ar, “Mu od, i gur e en ni ga be mol, mu fos u fithik’ e yam’! Me gal ram’en Kristus nga dakenam.”

Efesus 5:14 Referans Kwoze

Isaiah 60:1

Jerusalem, mu od, nge gal rama’em ni bod e yal’; Ram’en SOMOL e ke gal nga dakenam!

Isaiah 26:19

Girdi’ rodad ni karm’ad e yad ra fos bayay! Dowef rorad e ku ra sul e yafos ngay. Urngin e pi’in yad bmol u lan e low rorad e bay ra odgad miyad tangnag e felfelan’. Bod nma gal ra’en e wa’angchol ko garbeb nge kak’lingnag e fayleng, aram rogon SOMOL ni bayi faseg e pi’in karm’ad kakrom.

1 Thessalonika 5:6

Ere dab ud molod ni bod boch e girdi’; ya ngu’ud pired ni gadad be od ma ba tamilangan’dad.

Isaiah 52:1

Jerusalem, mu gel me gilbuguwam bayay! Binaw rok Got ni gab thothup, mon’ nga dakenam e mad rom nib gamog! Pi’in gathi yad e girdi’ rog e dab kurbad ngalan e yoror rom bayay.

2 Korinth 4:6

Fare Got ni ir e yog ni ga’ar, “Nge m’ug e tamilang u fithik’ e lumor!” e ku ireram e re Got ni ir e ke tamilangnag an’mad kug nanged e fla’ab rok ni be gal ram’en u owchen Kristus.

Kolose 3:1

Kan unegmed ngak Kristus kan fasegmed ko yam’. Ere mu suguyed lanin’med ko pin’en ni bay u tharmiy, ko gin nike par Kristus riy nga tagil’ u ba’ ni mat’aw rok Got.

Isaiah 51:17

Jerusalem, mu od! Mu sak’iy! Ka mu unum fare kap ko gechig ni fithik’ e damumuw rok SOMOL e ke pi’ riy ngom ni ngam unum; kam unum kem’ay, ga be thigthig.

Roma 6:13

Ma thingar dab kum paged fan bang u dowmed ngak e denen ni ngan maruwel ngay ni fan ko tin nib kireb. Machane ngam pi’ed gimed ngak Got, ni bod rogon e girdi’ ni kan chuwegrad ko yam’ kan fekdad ko yafos, mi gimed pi’med nge tafinay romed ni polo’ ngak ngan maruwel ngay ni fan ko tin nib mat’aw.

John 9:5

Ngiyal’ ni gu bay u roy u fayleng e gag e tamilang ngak e girdi’ nu fayleng.”

John 8:12

Me non Jesus bayay ngak e girdi’ ni ga’ar, “I gag e tamilang ko girdi’ nu fayleng. En nra i lekeg e ke yag e tamilang ko yafos ngak ma dabki yan u fithik’ e lumor bi’id.”

Efesus 2:5

ya nap’an ni kagadad bay u tan e gechig rok Got ni aram e gadad ba yam’ ni bochan e denen rodad me chagiydad ngak Kristus nge thapegdad ko yafos; yu daken e runguy rok Got e ir e ke thapegmed riy ngak.

1 Korinth 15:34

Mu sulweged lanin’med mi gimed tal ndab kum denengad. Ba’aray bbugithin ni nggog ma ngam tamra’gad ngay ni nge lungug: bay boch i gimed ndar nanged Got.

2 Timothy 1:10

ma chiney e kan dag kad guyed ni fan e ke yib i m’ug e en nma thapegdad ngak Got, ni aram Kristus Jesus. Ya Kristus e ke taleg gelngin e yam’, ma Thin Ni Bfel’ nike yib Kristus i weliy ngodad e ir e ke tamilang nagdad u murung’agen e yafos ndariy n’umngin nap’an.

2 Timothy 2:26

Me sulan’rad ngorad ngar milgad nga orel ko wup rok mo’onyan’, ni ir e ke kolrad ke tayrad, yad be fol ko tin ni ba’adag.

Acts 13:47

Ya ba’aray e thin ni pi’ Somol ngodad ni fa’ani ga’ar: ‘Kug tiyem ni ngam mang tamilang ngak e pi’in gathi yad piyu Israel, me gur e ngam mang kanawo’ ni ngan thap riy ngak Got ni fan ngak urngin e girdi’ nu fayleng.’ ”

Luke 1:78

Ya Got rodad e ri ba wurengan’ ma ba smunguy, ma rogon ni bayi muruwliy ngad thapgad ngak e bod e woch ni puf ram’en nga dakendad,

Luke 15:24

Ya cha’ ni fakag ney e yim’, machane chiney e ke fos; i malog, machane chiney e kan pir’eg.’ Ma aram miyad tabab ko madnom.

Efesus 2:1

Kakrom e um pired u tan e gechig rok Got ni aram e gimed ba yam’ ni bochan e denen romed ma da um folgad rok Got.