1 Kronicles 9:1 - Bible Ni Thothup

¹ Urngin e girdi’ nu Israel e nni yoloy fithingrad nga babiyoren e pi tabnaw nrabad riy, ma pi chep ney e kan yoloy ngalan Fare Babyor Ni Chepin E Pi Pilung Nu Israel. Ma girdi’ nu Judah e npi’rad nga Babylon ni ngar kalbusgad ni bochan e denen rorad.

1 Kronicles 9:1 Referans Kwoze

Nehemiah 7:5

Me pi’ Got gelngin lanin’ug ni nggu kunuy e girdi’ nge tayugang’ rorad nga ta’bang ni pi tolang ko salthaw ngug guy babyoren e tabnaw rorad. Mu gu pir’eg babyoren e pi’in nsom’on nni kalbus nagrad u lan yu Babylonia ni karsulod, aram e ba’aray e tin nu gu pir’eg:

Ezra 2:59

Immoy 652 e pi girdi’en e yuke girdi’ ko Delayah, Tobiah, nge Nekoda nra chuwgad ko yochi binaw ni ba’aray: Tel Melah, Tel Harsha, Cherub, Addan, nge Immer; machane dabyag ni ngar micheged ni yad e pi’in owchen yu Israel.

Daniel 1:2

Me gagiyegnag SOMOL Nebukadnezzar nge kol Jehoyakim ni Pilung me fek boch e machaf u Tempel. Me fek boch e kalbus nge un ngak nga tempel ko pi got rok u lan yu Babylon, me tay fapi machaf ni fek ngalan e pi senggil ni yima chubgil riy u lan fare tempel ko pi got rok.

Jeremiah 39:9

Tomuren, me Nebuzaradan ni ir e ga’ ko salthaw e fek e girdi’ ni magach u lan fare binaw ni kalbus nga Babylon, nib mu’un e girdi’ ngay nra milgad ngak.

2 Kronicles 33:11

Ma aram me pag SOMOL e pi tolang ko salthaw ngar m’aged e mael nga Judah. Ngar koled Manasseh, miyad the’ e lam nga dow, ngar m’aged e chen ngak, ngan fek nga Babylon.

1 Kronicles 8:40

Pi pumo’on ni fak Ulam e go’ yad bogi salthaw nib muthan’rad miyad ba salap ko mun gat’ing. Pi pumo’on ni fak nge pi pumo’on ni fak pifak e yad 150 u gubin. Gubin e pi ngachal ni kan mu’ i yog e go’ chongin fare ganong rok Benjamin.

1 Kings 14:19

Urngin e yochi ban’en ni rin’ Jeroboam ni Pilung, ni pi mael ni i tay nge rogon ni i gagiyeg, e go’ kan yoloy ngalan e babyor ni Chepin e Pilung nu Israel.

2 Kings 24:14

Me fek Nebukadnezzar e girdi’ nu Jerusalem ko nam rok ni kar manged kalbus, nge urngin e pi tolang ni yad bay u tan pa’ Jehoyakin, nge urngin e pi’in yad ma yog e thin, ni yad 10,000 u gubin. Miki fek urngin e girdi’ ni yad ba salap ko maruwel, nge girdi’ ni yad ba salap ko mongongol wasey, kemus ni girdi’ nib th’abi gafgow e pagrad ngar pired u Judah.

2 Kings 24:15

Me fek Nebukadnezzar Jehoyakin nga Babylon nike kalbus ni ir nge chitiningin, nge pi le’engin, nge pi tolang ni yad bay u tan pa’, nge pi pumo’on nu Judah ni yad ma yog e thin.

2 Kings 24:16

Me fek Nebukadnezzar urngin e girdi’ ni yad ma tay murung’agen ban’en nga Babylonia, ni yad 7,000 u gubin, nge 1,000 e girdi’ ni yad ba salap ko maruwel, nib mu’un e girdi’ ni yad ba salap ko mongongol wasey nga fithik’rad, ni yad gubin ni ka yad ba gel nrayag ni ngar uned ko salthaw.

Ezra 2:1

Ba yo’or e kalbus nra chuwgad u Babylon ngar sulod nga Jerusalem ngu Judah, ra be’ me sul ko re binaw ni be’ riy. Pi cha’ney nge chon e tabnaw rorad e ur kalbusgad u lan yu Babylon ni ka nap’an Nebukadnezzar ni Pilung me fekrad ni kalbus i yan ngaram.

Nehemiah 11:1

Pi tayugang’ e ra pired u Jerusalem, ma tin kabay e girdi’ e ra girngiyed e pow ni nge duwgil reb e tabnaw u fithik’ yu ragag e tabnaw ni nge yan i par ngalan fare binaw nib thothup nu Jerusalem, me par e tin kabay u lan e yug binaw nge yochi binaw.

Isaiah 3:2

nge pi falu’ rorad, nge pi salthaw rorad, nge pi tapuf oloboch nge pi profet rorad, nge pi’in ma bey nge pi tolang ko am rorad,

Jeremiah 13:19

Yochi binaw u ba’ ni yimuch yu Judah e ka ni m’ag e mael ngorad; ni deryag ni nge thap be’ ngorad. Gubin e girdi’ nu Judah ma ka ni fekrad nga wuru’ e nam ni kalbus.”