1 Korinth 7:12 - Bible Ni Thothup

¹² Ma boch e girdi’ e nggog ngorad (ni gag e gu be leamnag, machane gathi Somol e yib rok) ni be lungug: fa’anra bay be’ nib mo’on ni ir reb i girdi’en Kristus ni bay leengin nde mich Kristus u wan’, ma kabfel’ u wan’ fare pin ni ngu’ur pirew ni yow mabgol, ma thangri dabi n’ag fare pumo’on fare pin.

1 Korinth 7:12 Referans Kwoze

2 Korinth 11:17

Bmuduwgil ni thin ni nggog e chiney ni gag e gu be uf ngog e aram e gu be non ni bod rogon be’ ndariy e leam rok; ya gathi ireray e thin nike pi’ Somol ngog ni nggog.

1 Korinth 7:6

Dagur yog ngomed e re bugithin ney ni ban’en nthingar mu rin’ed, machane ban’en nrayag ni ngam rin’ed.

1 Korinth 7:25

Nggu weliy murung’agen e pi’in ndawor ra uned ko mabgol ni nge lungug: dariy bbugithin nike yib rok Somol ngog ni nggu weliy ni murung’agen e pi cha’ney, machane nggog e tin gu be finey, ya gag be’ nike runguyeg Somol mrayag ni ngan pagan’uy ngog.

1 Korinth 7:11

ma fa’anra rin’, ma thangri par ndabki un ko mabgol fa reb e nge sul ngak figirngin nge fel’ thilrow; ma be’ ni pumo’on nike mabgol e thangri dabi n’ag leengin.

1 Korinth 7:13

Ma fa’anra bay be’ ni bpin ni ir reb i girdi’en Kristus ni bay figirngin nde mich Kristus u wan’, ma kabfel’ u wan’ fare mo’on ni ngu’ur pirew ni yow mabgol, ma thangri dabi chuw fare pin rok fare mo’on.

1 Korinth 7:27

Bay le’engim fa? Ere dab mu guy rogon ni ngam n’ag. Dawor mu’un ko mabgol? Ere dab mu gay reb e bpin ni ngam le’ay.