1 Kings 13:2 - Bible Ni Thothup

² Me non fare profet nib togopluw ko fare altar, ni nge fol ko tin keyog SOMOL ngak ni ga’ar “Altar, altar, ba’aray e n’en ni be yog SOMOL: Bay bbitir ni bay ni tunguy fithingan ni Josiah, ni bay ni gergeleg ngalan fare tabnaw rok David. Ir e bayi li’ nge yim’ u dakenam e pi prist ni yad be pigpig ko fapi altar rok e pi’in ndar nagned SOMOL ni yad ma pi’ e maligach u dakenam, ma bayi urfiy yilen e girdi’ u dakenam.”

1 Kings 13:2 Referans Kwoze

Ezekiel 36:1

I SOMOL e ga’ar, “Fak e girdi’, mu non ko pi burey nu Israel ngamog ngorad ni ngar motoyilgad ko thin ni Gag SOMOL

Luke 19:40

Me fulweg Jesus ni ga’ar, “Nggog ngomed ni fa’an yad ra th’ab gulungrad, mra mang malang e tolul.”

Ezekiel 38:4

Bay gu cheleg u but’, nggu the’ e lam nga ydodan, ngug girengiy nge gubin raba’ e salthaw rok ngar chuwgad. Ni pi salthaw rok, nib mu’un e os rorad ngorad nge pi’in nma yannag e os ni kar chuwgad ko mad ni ta’reb rogon, ni gathiyad bilich, nge urngin e salthaw ni be fek e shield ni bay e saydon u pa’rad.

Ezekiel 36:4

Ere chiney e ngan motoyil ko tin nggog i Gag SOMOL ni Th’abi Tolang ngomed e pi burey nge yochi burey, nge gimed e pi lul’ nge loway, nge gimed e yungi n’en ni kan n’ag ni dakriy e fel’ riy, nge gimed e pi binaw u ted ni kan giliwnag ni be moning nagmed e pi nam nib liyegmed.

Jeremiah 22:29

A nam, nam, nam! Mmotoyil ko n’en nike yog SOMOL:

Isaiah 58:1

Be ga’ar SOMOL, “Mu tolul nge mus ga’ngin lungum! Mu weliy ngak yu Israel ni girdi’ rog e denen rorad!

Isaiah 46:10

Gog ko tabolngin e tin bay ko tungun; kab kakrom mu gog e tin bayib. Mu gog ni tin kem’ay i leamnag rog e dabiyag ni nge thil; ya gu ra rin’ urngin e tin kem’ay i leamnag rog.

Isaiah 42:9

Pin’en ni kug yi’iynag e ke yib i m’ug e chiney nib riyul’. Chiney e nggu weliy ngomed boch ban’en nib be’ech u m’on ndawori m’ug.”

Isaiah 1:2

I SOMOL e ga’ar, “Fayleng nge lanelang, mu telmew ko n’en ni gu be yog i gag SOMOL! Fapi bitir ni ug chuguluyrad e kar togopluwgad ngog.

2 Kronicles 34:1

Josiah e meruk e duw yangren me mang pilung nu Judah, me gagiyeg u Jerusalem ni guyey nge ta’reb e duw.

1 Kings 13:32

Fapi thin ni yog SOMOL ngak ni nge yog nib togopluw ko fare altar nu Bethel mab togopluw nga gubin yang ni yima meybil riy u lane yochi binaw nu Samaria e rra yib i m’ug nib riyul’.”

Deuteronomy 32:1

“Fayleng nge lanelang, mu telmew ko thin rog, mu uthumew telmew ko tin nggog.

2 Kronicles 34:3

U lan e re duw ni gaman e meruk ngay nike pilung Josiah, nnap’an ni kab pagel, me tabab i liyor ngak Got rok e ga’ rok ni aram David ni Pilung. Ma aningeg e duw nga tomuren me tabab i gathay yungin ntagil’ e tayfan rok e pi’in ndar nganged Got, nge pi pow rok Asherah ni fare got ni bpin, nge urngin e liyos.

Jeremiah 1:2

U lan fare duw ni gaman e ragag nge dalip e duw ngay ni Josiah ni fak Amon e ir e pilung u Judah, me non SOMOL ngak Jeremiah.