1 John 5:6 - Bible Ni Thothup

⁶ Jesus Kristus e ir fa’anem ni yib ni ran ko tawfe rok nge racha’en ko yam’ ni tay e micheg ko ir mini’. Gathi yib ni kemus ni ran e mich rok, machane ran nge racha’. Ma fare Kan Nthothup e ke micheg nib riyul’ e ren’ey; ya fare Kan Nthothup e ir e riyul’.

1 John 5:6 Referans Kwoze

Hebrews 9:14

Ere fa’anra ireray rogon nib riyul’ e re bugithin ney, me ere ka ba ga’ e tin ni ngongliy racha’en Kristus! Ya fare Kan Nthothup ni bay i par ndariy n’umngin nap’an e ayuweg nge pi’ ir ni maligach ni bfel’ ngak Got. Racha’en e ir e ra be’echnag lanin’dad ko ngongol ndariyfan, nge yag nda pigpiggad ngak fare Got ni be par nib fos.

John 15:26

“Fare Taayuw e bay yib, ni aram fare Kan ni Thothup nma dag e tin riyul’, ni bay yib rok e en ni Chitamangiy. Bay gu pi’ rok e Chitamag nge yib ngomed, me ir e bayi weliy murung’ageg.

John 16:13

Ngiyal’ nra yib fare Kan Nthothup nma dag e tin riyul’ e bayi pow’iymed ngam nanged urngin e tin riyul’. Gathi tin be leamnag e ra weliy ngomed, ya tin ke rung’ag e ra weliy ngomed, mra weliy ngomed e pin’en ni bay yib.

Hebrews 12:24

Kambad ngak Jesus, ni ir e ke ngongliy rogon fare m’ag nib be’ech, nge fare racha’ ni kan wereg ni ir e be micheg boch ban’en ni kabfel’ boch ko tini micheg racha’en Abel.

Mark 14:24

Me ga’ar Jesus ngorad, “Ireray racha’eg ni bayi map’ nga but’ ni fan ngak bo’or e girdi’, ni ir e bayi micheg e m’ag u thilin Got nge girdi’.

John 14:17

Ir fare Kan ni Thothup, ni ir e bayi tamilangnag e tin rriyul’ u murung’agen Got. Ma girdi’ nu fayleng e dabiyag ni nge yag ngorad, ya dabiyag ni ngar guyed ara ra nanged ir. Machane gimed e gimed manang ir, ni bochan e bayi par romed ngi i par u fithik’med.

Revelation 7:14

Mu gu fulweg ngak ni lungug, “Da gu nang, i gur e ga manang.” Me ga’ar ngog, “Pi cha’nem e fapi girdi’ ni kar thapgad ngaray u fithik’ fare gafgow ni ba ga’ ntay ngorad. Kar luk niged e mad rorad kar wechwech niged nga racha’en fare Fak e Saf.

Revelation 5:9

Miyad yin’ ba tang nib be’ech ni ga’ar: “I gur e bay rogom ni ngam fek fare gi babyor ni kan bachiy ngam guchthuy fapi hang riy. Ya nli’em nga mum’, ma racha’em ni map’ u kuruth e ir e mu chuw’iy e girdi’ ngay ni ngar manged girdi’en Got, ni girdi’ u urngin e ganong, nge thin, nge gubin mit e girdi’, nge nam.

1 Peter 1:2

I mel’egmed Got ni Chitamangiy nrogon nike mu’ i turguy u wan’, ni nge ngongliymed fare Kan Nthothup rok ngam pired ni gimed ba thothup, ma gimed be fol rok Jesus Kristus me be’ech nagmed racha’en. Ngi i ayuwegmed Got ma be pi’ e gapas nga lanin’med nge yan i mus ngarogon.

Hebrews 13:20

I Got e ke faseg e Somol rodad i Jesus ko yam’, ni ir e en Ga’ ni Tagafiy e Saf ni bochan racha’en, ni ir fare m’ag ni bayi par ndariy n’umngin nap’an.

John 4:14

machane en nra unum e ran ni gu ra pi’ ngak e dabki sul e belel ngak bayay. Ya ran ni gu ra pi’ ngak e ra ngal’ ni ba alublub u fithik’ i dow, ni ir e bay i pi’ e ran ngak nma pi’ e yafos, me pi’ e yafos ngak ndariy n’umngin nap’an.”

Luke 22:20

Ma ku aram rogon ni pi’ ngorad fare kap u tomuren e abich ko blayal’, ni be ga’ar, “Re kap ney e bin nib be’ech e m’ag u thilin Got nge girdi’ ni racha’eg ni bay map’ nga but’ ni fan ngomed e ir e bayi micheg.

Matthew 26:28

ya ireray racha’eg ni ir e bayi micheg e m’ag u thilin Got nge girdi’, ni racha’eg ni bayi map’ nga but’ ni fan ngak bo’or e girdi’ ni fan e nge n’ag Got fan e denen.

Ezekiel 36:25

Bay gu atngiy e ran nib machalbog nga dakenmed nggu machalbog nagmed u urngin e meybil ni um ted ko pi liyos romed nge urngin ban’en nike taymed ni kam kirebgad u p’eowcheg.

Levitikus 17:11

Yafos ko gubin ban’en nib fos e bay u fithik’ e racha’ riy, ma arfan ni SOMOL e keyog ni urngin e racha’ ma ngan pu’og nga daken fare altar ni nge chuweg e denen ko girdi’. Racha’, ni ir e yafos, e ma chuweg e denen.

1 John 1:7

Machane fa’anra ud pired u fithik’ e tamilang — ni bod ir ni bay u fithik’ e tamilang — ma aram e kad ta’ab girdi’gad nike ta’reban’dad, ma racha’en Jesus ni Fak e ir e be be’ech nagdad u urngin e denen rodad.

Titus 3:5

me chuwegdad ko kireb nge thapegdad ngak Got. Ma gathi rin’ ni aram rogon ni gomanga bochan e ngongol ni bfel’ ni kad ngongliyed, machane bochan e be runguydad, ma aram me chuwegdad ko kireb nge thapegdad ngak Got u daken e maluk ni tay ngodad, nu daken e re maluk ney e ir e pi’ fare Kan Nthothup e bin nib be’ech e gargel nge bin nib be’ech e pangin riy ngodad.

Efesus 1:7

Racha’en Kristus ni map’ u kuruth e ir e pithigdad ko denen, me ir e n’ag Got fan e denen rodad riy. Ri ba ga’ e runguy rok Got ngodad,

John 6:55

Ya ufin u dowag e ir e bin riyul’ e ggan, ma racha’eg e bin riyul’ e garbod.

John 4:10

Me fulweg Jesus ni ga’ar, “Fa’an mang e ga manang e n’en nma pi’ Got nge en ni be ning e ran ngom ni nge unum, ma kam wenig ngak ke pi’ e ran ngom nma pi’ e yafos.”

John 3:5

Me fulweg Jesus ngak ni ga’ar, “Nggog e tin riyul’ ngom, ndariy be’ nrayag ni nge yan ko gin nsuwon Got ni fa’anra dab ni gargeleg ko ran nge fare Kan ni Thothup.

Zekariah 9:11

Be ga’ar SOMOL, “Bochan fare m’ag ni kug ngongliy u thildad, ni racha’ ko pi maligach e ke micheg, aram fan ni ribay gupag e girdi’ romed ngar chuwgad u pa’ e to’ogor rorad, ngar chuwgad u lan fare low ni mlik’ nra kalbusgad riy u wuru’ e nam.

Revelation 1:5

mi Jesus Kristus ni fa’anem nib yul’yul’ ni i weliy murung’agen Got ngak e girdi’, ni ir e bin ni m’on i Fak Got, ma ku ir e som’on ni faseg Got ko yam’ ndab ki yim’, ni ku ir e be gagiyegnag urngin e pilung nu fayleng e ngi i ayuwegmed ma be pi’ e gapas nga lanin’med. Gadad ba t’uf rok ma ke pithigdad ko denen rodad u daken racha’en ni map’ u kuruth

1 Peter 3:21

Re ran nem e be yip’ fan e tawfe, ma tawfe e be yip’ fan ni kam thapgad ngak Got e chiney, ma gathi bochan e alit u dowmed ni kan maluknag, machane bochan e tin kamogned ngak Got u fithik’ e tafinay ni bfel’. Tawfe e be yip’ fan ni kam thapgad ngak Got u daken e fos ko yam’ ni tay Jesus Kristus,

Hebrews 10:29

Ere ra yan i di’in e en ni be darifannag e en ni Fak Got ni be dag ko ngongol rok ndariyfan u wan’ e racha’ ko m’ag rok Got ni ir e machalbognag fa’anem, ni en ni ir e ke tagannag laniyan’ fare Kan Nthothup nma ayuwegdad? Mu tafinay niged feni gel e gechig ni bay tapgin ni ngan pi’ ngak!

Hebrews 9:7

machane kemus ni Prist ni Th’abi Ga’ e be yan ngalan e bin tomur e senggil ko tent, nma rin’ ni aram rogon nra reb e duw ma ta’ab yay. Ma fek e racha’ nge yan i pi’ ngak Got ni fan ko denen rok nge fan ko denen nike ngongliy e girdi’ ndar nanged ni yad be denen.

Kolose 1:4

Ya kug rung’aged rogon fene rib mich Kristus Jesus u wun’med, nge rogon fene rib t’uf romed urngin e girdi’ rok Got.

Roma 3:25

I pi’ Got Kristus Jesus ni racha’en ni map’ u kuruth e ir e nge yag ni nge n’ag Got fan e denen ko girdi’ riy, ni yira n’ag u daken e michan’ rorad ngak Kristus. I pi’ Got Kristus ni fan e nge yag ni dag Got rogon nib mat’aw nge rogon nma mat’awnag e girdi’ ngak. Kakrom e gum’an’nag Got ir, ngi i fek owchen ko denen rok e girdi’;

Acts 8:36

Ma nap’an ni yow be yan u daken e re pa’ i kanawo’ nem miyow yib ngabangi ban’en ni bay e ran riy, me ga’ar fa’anem nib tolang, “Ba’aray e ran. Mang ndab ntawfe nigeg?”

John 14:6

Me fulweg Jesus ngak ni ga’ar, “I gag e kanawo’, me gag e tin riyul’, me gag e yafos; dariy be’ nrayag ni nge yan ngak e en ni Chitamangiy ya kemus ni gag e ra yan rog ngak.”

1 John 4:10

Ba’aray rogon ni gadad ba t’uf rok Got: gathi ud pired nib t’uf Got rodad, ya ud pired ni gadad ba t’uf rok me l’oeg Fak nge yib, nu daken Fak e nge n’ag Got fan e denen rodad riy.

1 Timothy 3:16

Rib muduwgil ni yira ngat ko n’en nib riyul’ ni ir e ke michan’dad ngay: I yib i m’ug nike bod ya’an e girdi’, ma Kan Nthothup e dag nib mat’aw, ma pi engel e ra guyed. Ma kan machibnag murung’agen ko pi nam i yan, me michan’ e girdi’ nu fayleng ngak, min fek nga tharmiy.

Matthew 3:16

Ma nap’an ni yugni tawfenag Jesus, me yib u fithik’ e ran nga talang. Me mab e tharmiy ngak, me guy fare Kan Thothup rok Got ni be yib u lang i yib nga but’ ni bod ba bulogol me yib i par nga daken.