San Juan 9:16 - New Testament in Mixtec Diuxi-tilantongo

¹⁶ Xijan kuu xa n‑ka jaꞌan dava se fariseu: —Ñadu Ianyuux n‑kida xa n‑kida‑s xaꞌa, chi ña chinuu‑s kɨu ndetatu‑ro. Ko dava‑s n‑ka jaꞌan: —¿Janda kuaꞌa‑s xa kada‑s milagru, nux kuu‑s se kida kuechi? Ñayo‑s n‑xani ini ɨɨn nuu.

San Juan 9:16 Referans Kwoze

San Juan 10:19

Xaxeꞌe tnuꞌu yaꞌa, te ɨnka vuelta ña n‑ka xani ini ɨɨn nuu se Israel.

San Juan 7:43

Xijan kuu xa xaxeꞌe mee‑ia, ñatu n‑kuu ɨɨn nuu ñayiu xyuku ijan.

San Juan 7:12

Te ijan xyuku kueꞌe xa kueꞌe ñayiu. Ka ndatnuꞌu‑i xa ka kakuneꞌe‑i Jesús, ko naꞌi ni. Dava‑i n‑ka jaꞌan: “Se vaꞌa kuu‑s”, ko dava‑i n‑ka jaꞌan: “Ña ndaa, chi dandaꞌu‑s ñayiu yaꞌa.”

San Juan 3:2

Ɨɨn xakuaa n‑xe kotoniꞌni‑s Jesús, te n‑jaꞌan‑s: —Maestru, ka xini‑da xa n‑tundaꞌa ñaꞌa Ianyuux mee‑n xa dakuaꞌa ñaꞌa‑n. Ni ɨɨn ñayiu ma kuaꞌa xa kada‑i milagru kida mee‑n, nux ña tuu mee‑n xiꞌin Ianyuux.

San Mateo 12:2

N‑ka xini se fariseu, te n‑ka jaꞌan‑s nuu Jesús: —Kundeꞌa xa ka kida se dakuaꞌa‑n. ¿Nakuenda ka kida‑s ɨɨn xa ña xejoon Ianyuux xa kada‑ro kɨu kuu sabado?

San Juan 15:24

Nux ña n‑kida‑r milagru ñayo ɨnka ñayiu nuncas ña n‑kida n‑kuu, ma tekuechi‑i anu mee‑i. Ko vitna, xa n‑ka xini ñaꞌa‑i mee‑r, te dani xa n‑ka xini‑i Taa‑r tuku. Xá n‑ka xini uꞌu ñaꞌa‑i mee‑r, te dani xa n‑ka xini uꞌu‑i Taa‑r tuku.

San Juan 14:11

Io xa jandixa koio‑n xa kunduu mee‑r xiꞌin Taa‑r te kunduu Taa‑r xiꞌin mee‑r. Io xa jandixa‑n xaxeꞌe tnuꞌu‑r, a juini ña kuaꞌa‑n xa jandixa‑n xaxeꞌe tnuꞌu‑r, ko io xa jandixa‑n xaxeꞌe tniu kida‑r.

San Juan 9:24

Vuelta kuu uu n‑ka nakana‑s se n‑xo kuu se kuaa. N‑ka xiaꞌan‑s: —Koo xañuꞌu nuu Ianyuux te jaꞌan ndaa. Ka xini‑r xa se nani Jesús kuu se kida kuechi.

San Juan 6:52

Xijan kuu xa n‑ka jantnaꞌa tnuꞌu se Israel. N‑ka xijan tnuꞌu‑s: —¿Nanda kuaꞌa se yaꞌa xa taxi‑s yɨkɨ kuñu‑s xa kaxi‑ro?

San Juan 5:36

Ko io ɨnka, kaꞌnu ka dada Sua, jaꞌan ndaa xaxeꞌe‑r. N‑taxi Taa‑r tniu daxinokava‑r. Tniu kida‑r jaꞌan ndaa xaxeꞌe‑r xa n‑tundaꞌa ñaꞌa Taa‑r.

Hechos 14:4

Ñatu ɨnuu n‑ka xani ini ñayiu ñuu jan. Dava‑i n‑ka nujuiin xiꞌin xiꞌin ñayiu Israel, dava‑i n‑ka nujuiin xiꞌin xiꞌin se n‑tundaꞌa ñaꞌa Jesús.

San Mateo 12:10

N‑ka xitoyuꞌu se fariseu Jesús chi n‑ka kuu‑s xa tekuechi neñuu‑s‑ia. Ka xiaꞌan‑s: —¿Io vaꞌa xa ndadavaꞌa‑ro ñayiu kuꞌu kɨu sabado a?

San Lucas 13:14

Yo n‑kiti ini se kida veñuꞌu nuu Jesús chi n‑ndadavaꞌa‑ia ñayiu kɨu ka ndetatu ñayiu Israel. Te n‑jaꞌan‑s nuu ñayiu xyuku ijan: —Maxku kixi‑n xa ndvaꞌa koio‑n kɨu ka ndetatu‑ro. ¿Nakuenda ñatu ka kixi‑n kɨu ka kidatniu‑ro? —kuu‑s, xiaꞌan‑s.

San Juan 2:11

Duꞌa n‑kuu milagru kiꞌna nuu n‑kida Jesús. Ñuu nani Caná distrito Galilea, n‑dandeꞌa Jesús ñayiu xa taxnuni‑ia nuu ntdaa xa io. Te n‑ka jandixa ñaꞌa se dakuaꞌa‑ia.

San Juan 5:10

Xijan kuu xa n‑ka jaꞌan se fariseu nuu se n‑ndvaꞌa: —Kɨu ndetatu‑ro kuu. Jaꞌan tnuꞌu taꞌu tniu xa ni ɨɨn ñayiu maxku kaneꞌe‑i yuu‑i kɨu ndetatu‑ro.

San Juan 7:23

Ka xaꞌnde‑s ñɨɨ nuu ii ɨɨn seyɨjɨn, juini kɨu ndetatu‑ro kuu, xa kada koio‑n xa jaꞌan tnuꞌu n‑chidotnuni Moisés. ¿Nax kuu xa ka kiti ini‑n nuu mee‑r xaxeꞌe xa n‑ndadavaꞌa‑r ɨɨn se kuꞌu kɨu ndetatu‑ro?