Apocalipsis 16:17 - New Testament in Mixtec Diuxi-tilantongo

¹⁷ N‑xodo ángel kuu uxa xa ñuꞌu koꞌo neꞌe‑ia nuu tachi. Hora ijan ni xee n‑jaꞌan do nuu katuu veñuꞌu nuu nukoo Taa‑ro Ianyuux. Duꞌa n‑jaꞌan: —N‑kuu vitna.

Apocalipsis 16:17 Referans Kwoze

Apocalipsis 21:6

Ijan dada n‑jaꞌan ka‑ia: —Xa io vitna. Ruꞌu kuu Ia daa nga io, te kutuu‑r nɨkava nɨkuita. Ñayiu yichi ndute, juñaꞌa nga‑r ndute koꞌo‑i xa na kutuu‑i nɨkava nɨkuita. Kane mee ndute ijan.

San Juan 19:30

Na n‑tɨꞌu Jesús vinagri jan, n‑jaꞌan‑ia: —¡Xá n‑daxinokava‑r tniu‑r! N‑nune dɨkɨ‑ia, te n‑xiꞌí‑ia.

Efesios 2:2

Daa n‑ka xo kida‑n xaloko xaduꞌa ná ka kida ñayiu ñatu ka jandixa Ianyuux. N‑ka xo kida‑n xa n‑xo taꞌu tniu Kuiꞌna. Taxnuni Kuiꞌna nuu dava ka xaloko, te kidatniu‑i anu ñayiu ka kuxe ini nuu Ianyuux.

Efesios 6:12

Kuenda kɨu jantnaꞌa‑ro xa ndeꞌe ka ndukundee‑ro xa maxku kada‑ro kuechi hora ka dajaꞌan ñaꞌa xaloko xiꞌin tachi loko xiꞌin mee Kuiꞌna taxnuni nuu ntdaa xaꞌa. Kuenda kɨu ka jantnaꞌa‑ro, ko ñadu ñayiu ka jantnaꞌa xiꞌin‑ro chi xaloko. Ka xikonuu‑i andɨu xiꞌin ñuñayiu, te ka taxnuni‑i nuu ñayiu loko xtuu ñuñayiu. Ñatu ka kida‑ro kuechi hora dajaꞌan ñaꞌa Kuiꞌna xa kada‑ro nux xndedi ini‑ro.

Apocalipsis 16:1

N‑teku‑da xa xee n‑jaꞌan ɨɨn xa n‑jaꞌan nde veñuꞌu jan. Duꞌa xiaꞌan xijan nuu uxa ángel jan: —Juaꞌan koio te kodo‑n xa xñuꞌu uxa koꞌo de ñuñayiu chi yo kiti ini Ianyuux nuu ñayiu.

Apocalipsis 14:17

N‑kee ɨnka ángel veñuꞌu io andɨu jan, te dɨuni ɨɨn yuchi uxu deen neꞌe‑ia.

Apocalipsis 14:15

N‑xini ntuku‑da ɨnka ángel n‑kee veñuꞌu andɨu. Xee n‑kana‑ia nuu Ia nukoo nuu vikó jan. Duꞌa xiaꞌan‑ia: —Juan kaꞌnde‑n trɨu kaa ñuñayiu xiꞌin yuchi uxu‑n, te nakueka‑n chi xa n‑yichi —kuu‑ia, xiaꞌan‑ia.

Apocalipsis 11:19

Ijan dada n‑xini‑da xa nune veñuꞌu Ianyuux io andɨu, te xiti veñuꞌu jan n‑xini‑da xatnu n‑kidavaꞌa Moisés. Xatnu ijan kaa niꞌno tutu n‑kidakutu Ianyuux xiꞌin ñayiu Israel xa n‑kida‑ia xiꞌin‑i ɨɨn tratu. N‑xeyeꞌe te ndeꞌe n‑kee taxa. Ndeꞌe n‑kaꞌndɨ. Dɨuni n‑kana dau. Ndeꞌe n‑tnaa te ndeꞌe n‑juun ñɨñɨ.

Apocalipsis 11:15

N‑tɨu ángel kuu uxa strompeta‑ia, te n‑teku‑da xa xee n‑ka jaꞌan andɨu. Duꞌa ka jaꞌan: Ñatuka taxnuni se n‑ka taxnuni, chi Ianyuux xiꞌin Jesucristu taxnuni ñuñayiu vitna. Nɨkava nɨkuita taxnuni koio‑ia.