Tito 2:15 - Xochapa Mixteco

¹⁵ Ta ya yóꞌó kua xíniñuꞌu un sinaꞌa un na ñani yo. Ta xa íyo ichí ta̱xi Tata yo Jesucristo ndaꞌa un ya xaꞌa un ndee xiꞌin na, saa ndaꞌi un xiꞌin na tá väꞌa íkan na. Ta nda iin na ná kündasi nuu kuni yóꞌo̱.

Tito 2:15 Referans Kwoze

2 Timoteo 4:2

ya ná chikaa ni un ndee ya kaꞌan ndoso un tuꞌun ra xiꞌin naꞌa ndiꞌi saa kivi. Koo ndúvi un kaꞌan un xiꞌin na tá kivi vaꞌa ni kúni un án tá väꞌa kúni un. Ta teꞌe kaꞌan un xiꞌin na, sinaꞌa un na ya ná kundaa ini na xaꞌa ya väꞌa kéꞌe na, ta kaꞌan xiꞌin na ná sindoo na ya, saa xaꞌa ni un ndee xiꞌin na ya ná kundikun vaꞌa na ichí Tata yo Jesucristo. Ta toꞌo kaꞌan un xiꞌin na sinaꞌa un na, kaꞌnu koo ini un xiꞌin na.

Tito 1:13

Ta ya ndaa ni ndixa kua ndi̱kaꞌan ra xaꞌa na, yakan yóꞌo̱, ta ndee koo ini un xiꞌin na ndaꞌi un xiꞌin na ya ná ïkan na ya väꞌa, sinaꞌa un na, ya ná kutuun tuꞌun Ndioxi nima na ta ná kundaa ni ini na ra.

1 Timoteo 5:20

Tá tu ya ndixa kua íyo kuachi nda ta köo xíin nda sindoo nda ya väꞌa íkan nda, ta vaꞌa kaꞌan un xiꞌin nda nuu chútu ndiꞌi na veꞌe ñuꞌu ya ná sindikoo nda ya väꞌa íkan nda. Ta saa ku íꞌvi naꞌa ya ná ïkan na tá kuꞌva íkan nda.

San Mateo 7:29

Saa chi sínaꞌa ra, nda tá kuꞌva sínaꞌa iin taa ra kúu mií chiñu ndee ni, ta köo sínaꞌa ra tá kuꞌva sínaꞌa nda maestro nda sínaꞌa ley Ndioxi ya taa ra Moisés xinaꞌa.

San Marcos 1:22

Ta ndi̱kanda ni ini naꞌa xíni soꞌo na ya káꞌan ra, chi káꞌan ra tá káꞌan iin ra kúu mií chiñu ndee ni, ta köo káꞌan ra tá kuꞌva káꞌan nda maestro nda sínaꞌa ley ya ta̱a ra Moisés.

San Lucas 4:36

Ta ndiꞌi na xi̱ni ya ndo̱ꞌo ra ikán ndi̱kanda ni ini na. Ñaa ndindakan tuꞌun taꞌan na, káchi na saa: ―¿Ndá ndee kua kúu mií ra yóꞌó yakan vaꞌa kúu mií ra ichí xáꞌnda chiñu ra nuu tachi nduvaꞌa ta kándixa ñaꞌa ya ―káchi na.

San Marcos 1:27

Ta ndi̱kanda ka vi ini na xi̱ni ya ikán, ñaa xa̱á na ndákan tuꞌun taꞌan na, káchi na saa: ―¿Ndá ndee kua kúu mií ra yóꞌó kua? Xa síin va ku ya sínaꞌa ra, ndee ni va ndee kúu mií ra, chi nda tachi nduvaꞌa xíni soꞌo káꞌan ra ―káchi na xiꞌin taꞌan na.

1 Corintios 16:11

Xaꞌa ya ñaa kua kündasi nuu nda iin ndo kuni ndo ra, vívií koo ndo xiꞌin ra, chindee taꞌan ndo xiꞌin ra ná ndiko koo ra xiꞌin ya vaꞌa nuu íyo i. Saa chi yeꞌe xiꞌin nda ñani yo, nda íyo xiꞌin i, ndátun nde ra ndiko koo ra.

1 Pedro 4:11

Ta ndóꞌo̱ ndi̱niꞌi ya vaꞌa xínituni ke̱e nuu Ndioxi ya kaꞌan ndoso ndo, ta vaꞌa kaꞌan ndoso ndo tá kuꞌva kúni mií Iva yo Ndioxi. Ta saa ndóꞌo̱ ndi̱niꞌi ya vaꞌa chindee taꞌan ndo xiꞌin inka naꞌa, ta vaꞌa chindee taꞌan ndo xiꞌin na xiꞌin ndiꞌi ndee ya ta̱xi Iva yo Ndioxi ndaꞌa ndo. Ta ndiꞌi ya íkan ndo, ta vaꞌa ikan ndo ya, ya xaa kaꞌnu ndo Ndioxi tixin Tata yo Jesucristo, ra ndee ni ndee ku mií xiꞌin ya luvi ni kúu mií ra, ta saa koo ra ndiꞌi saa kúu tiempo. Saa ná koo.