San Mateo 25:35 - Xochapa Mixteco

³⁵ Saa chi kivi tá ndi̱kaꞌun ini i, ta ta̱xi ndo xi̱xi i, kivi tá ndi̱ndichi i tikuii, ta ta̱xi ndo tikuii xi̱ꞌi i, saa ni kivi ke̱e i ñuu i ta ndi̱xika i inka ñuu, ta ta̱xi ndo veꞌe ndo ndi̱kixi i.

San Mateo 25:35 Referans Kwoze

HEBREOS 13:16

Ta ndïndoso ini ndo ya ikan ndo ya vaꞌa xiꞌin taꞌan ndo. Saa chindee ndo na taꞌan ndo xiꞌin ya kúu mií ndo, saa chi tá íkan ndo saa ta tá íin ya sóko ndo nuu Ndioxi saa íin ya íkan ndo, ta kúvaꞌa ni ini Ndioxi xiꞌin ya íkan ndo.

Santiago 1:27

Sundi ya vaꞌa ni va ku ichí Iva yo Ndioxi, ta ndiꞌi ndóꞌo̱, na ndíkun ra ta ya ndee ni xíniñuꞌu ndo ikan ndo nuu ra kua yóꞌó: Ná chindee taꞌan ndo xiꞌin na ndaꞌví vali, saa ná chindee taꞌan tu ndo xiꞌin ná síꞌi ná ndi̱ndoo ndaa, ta ná chindee ñaꞌa ndo xaꞌa tindoꞌo ya ndóꞌo ná, saa ná kundaa ni ndo mií ndo, ya ná ïkan ndo ya väꞌa taꞌan ya íkan na ñuu ivi yóꞌó.

ROMANOS 12:13

Saa koo ndúvi ndo ya chindee ndo na ndaꞌvi veꞌe ñuꞌu, na ñuu Ndioxi. Ta ndikuiso vaꞌa ndo naꞌa, na xáa veꞌe ndo, án ñuu yati vaxi na, án ñuu xika vaxi na, ta ndikuiso ndo na. Saa taxi ndo kuxi na, ta taxi ndo nuu kusun na.

ROMANOS 12:20

Ta saa káꞌan tuku Ndioxi, káchi ra: “Tá tu kúni kuxi naꞌa, na sáa ini xíni ndóꞌo̱, ta vaꞌa taxi ndo kuxi na. Tá tu íchi na tikuii, ta vaꞌa taxi ndo tikuii koꞌo na”. Chi tá íkan ndo saa xiꞌin na, ta tá íin ñu̱ꞌu̱ yěꞌé saa íin ya síkoyo ndo xiní na, án táxi ndo kúkaꞌan nuu na.

HEBREOS 6:10

Saa chi Ndioxi, ta vaꞌa ni ra, ndaa ni ini ra yakan ndïndoso ini ra xaꞌa chiñu ya íkan ndo, saa ndikaꞌán ini ra xaꞌa ndiꞌi ka ñaꞌa ya i̱kan ndo. Chi sínaꞌa ndo mií ndo ya kúꞌvi ni ini ndo xíni ndo ra, xaꞌa ya chíndee ndo naꞌa, na kándixa ñaꞌa. Ta nda vitin ta chíndee ka ndo na.

FILEMÓN 1:7

Ta yeꞌe, kúsini ka vi i xiꞌin un ñani yo, Filemón. Vaꞌa ka vi kúni i xiꞌin un chi xaꞌa ya kúꞌvi ni ini un xíni un na veꞌe ñuꞌu, na i̱í kua chíkaa ni un ndee xiꞌin na, vaꞌa ni kúni na.

1 Timoteo 5:10

Ta saa tu ná ndóso vaꞌa tuꞌun xaꞌa ya íkan ná ya vaꞌa, ta vaꞌa ni xi̱ndaa ná seꞌe ná, ta saa ndi̱kuiso vaꞌa ni ná na xáa veꞌe ná, ta ndi̱kata ná xaꞌa nda ñani yo xiꞌin ná kuꞌva yo, saa chi̱ndee taꞌan ná xiꞌin naꞌa tá xi̱ñúꞌu na nuu tindoꞌo, ta vaꞌa ni i̱kan ná xiꞌin ndiꞌi naꞌa.

Efesios 4:28

Ndiꞌi naꞌa, na ku̱too sikuiꞌna, ta ná sïkuiꞌna ka na. Vaꞌa ná xaa chiñu na xiꞌin ndaꞌa na, ta saa koo ñaꞌa nuu na chindee taꞌan na xiꞌin na ndaꞌvi, na köo ñaꞌa nuu.

ROMANOS 16:23

Saa tíꞌvi tu ra ñani yo, ra Gayo, tuꞌun mani xaa nuu ndo. Veꞌe ra Gayo yóꞌó ku nuu íyo yeꞌe Pablo vitin. Ta táxi ra veꞌe ra nuu ndíkitaꞌan ndiꞌi nde veꞌe ñuꞌu. Saa tíꞌvi tu ra Erasto, ñani yo, tuꞌun mani xaa nuu ndo. Ra ikán ku tesorero, ra ndíso chiñu xiꞌin xuꞌun ñuu. Ta tíꞌvi tu ra ñani yo ra Cuarto va, tuꞌun mani xaa nuu ndo, ya káꞌan ndioxi ra xiꞌin ndo.

Los Hechos 16:15

Ta saa chi̱chi yá xiꞌin ndiꞌi na veꞌe yá. Ñaa ndi̱xikan yá ya mani nuu nde, káchi yá saa: ―Tá tu kándixa ndo ndinuꞌu ini i ndi̱kundikun i Jesús, ta naꞌa ndo koꞌyo veꞌe i kundoo ndo ―káchi yá xiꞌin nde. Ndakua sa̱xinu ya ini nde kuaꞌan nde xiꞌin yá.

Los Hechos 11:29

Saa xi̱ni soꞌo na tuꞌun Ndioxi ya ndi̱kaꞌan ra Agabo, ñaa chi̱taꞌan tuꞌun na tiꞌvi na xuꞌun kuꞌun ndaꞌa na taꞌan na ndóo Judea. Tá kuꞌva náni ndaꞌa iin iin na, saa íyo ya ta̱xi na.

Los Hechos 10:31

Ndi̱kaꞌan ra xiꞌin i, káchi ra saa: “Tata Cornelio, xi̱ni soꞌo Ndioxi ya káꞌan un xiꞌin ra saa xi̱ni ra ya íkan un xiꞌin na ndaꞌvi.

Los Hechos 4:32

Ndiꞌi kúu na kándixa Jesús vaꞌa ni ndi̱xiyo na xiꞌin taꞌan na. Iin yuꞌu ndi̱xiyo ndiꞌi na xiꞌin taꞌan na, nda tá káa ñaꞌa ndiꞌi na saa ndi̱xiyo ya, iin ndi̱xiyo ndikaꞌnu ndiꞌi ñaꞌa na.

San Juan 13:29

Ta sava nda ndi̱kani ini ya kuꞌun ra sata ra ñaꞌa kuniñuꞌu nda viko án ná taxi ra xuꞌun ndaꞌa na ndáꞌvi, káꞌan nda, chi mií ra ku ra ndíso ñaꞌa ñúꞌu xuꞌun.

San Lucas 11:41

Saa ndóꞌo̱, tá chíndee ndo na ndaꞌvi ta ndinuꞌu ini ndo taxi ndo ñaꞌa ndo ndaꞌa na. Ta saa kua kindoo vaꞌa ndo nuu Ndioxi.

San Marcos 14:7

Na ndaꞌvi ta ndiꞌi saa kivi koo na xiꞌin ndo, ta kuchiñu ndo chindee ndo na ndá kivi kúni mií ndo, sundi yeꞌe, ta süvi ndiꞌi saa kivi koo i xiꞌin ndo.

San Mateo 26:11

Ndiꞌi saa ichí koo na ndaꞌvi xiꞌin ndo, sundi yeꞌe, ta süvi ndiꞌi saa ichí koo i xiꞌin ndo.

San Mateo 25:40

Saa ndikuiin yeꞌe, rey, kaꞌan i xiꞌin na, kachi i saa: “Ya ndaa káꞌan i xiꞌin ndo, kivi i̱kan ndo ya vaꞌa xiꞌin na ndíkun yeꞌe, vani ndaꞌvi ni na, ta süvi xiꞌin na ikán ndi̱xaa ndo ya vaꞌa, sundi xiꞌin yeꞌe i̱kan ndo ya vaꞌa”, kachi i xiꞌin na ―káchi Jesús.