San Mateo 11:29 - Xochapa Mixteco

²⁹ Xaa súvi ndo ya káꞌan i xiꞌin ndo ya káa tá káa itun yuku i. Sikuaꞌá ndo tá kuꞌva íyo i, chi yeꞌe ta köo kueꞌe ini i, ndaꞌvi ni ini i, vaꞌa ni taa ku i, ikán ndo saa, ta saa kuchiñu ndo ndikundee ndo.

San Mateo 11:29 Referans Kwoze

1 Juan 2:6

Ndiꞌi na káꞌan, ítaꞌan vaꞌa na xiꞌin Jesucristo káchi na, ta xíniñuꞌu na koo na tá kuꞌva ndi̱xiyo mií Jesucristo ñuu ivi yóꞌó.

San Juan 13:15

Tá kuꞌva i̱kan i xiꞌin ndo, saa xíniñuꞌu ndo xaa súvi ndo xiꞌin taꞌan ndo.

San Mateo 7:24

Saa ndi̱kaꞌan tuku Jesús xiꞌin na, káchi ra saa: ―Ná ndituꞌun i xiꞌin ndo ndá kuꞌva íin na xíni soꞌo tuꞌun káꞌan i, nda tá káa iin taa ra ndíchi xiní, ra si̱kuaꞌa veꞌe sata kava yu̱ú teꞌe ni, saa íin na.

HEBREOS 5:9

Yakan tá sindiꞌi ra xa̱a súvi ra ndiꞌi ya ndi̱kaꞌan Ndioxi xiꞌin ra, saa kua ndi̱xinu ra ndu̱u ra taa, ra ndee ni ndixa xíniñuꞌu yo ya sikaku ra yoo koo yo xiꞌin ra ndiꞌi saa ichí tá tu xáa súvi yo ya káꞌan ra.

2 Corintios 10:1

Ta yeꞌe Pablo, ku ra káꞌan xiꞌin ndo xáku ndaꞌvi i nuu ndo xiꞌin ya vaꞌa, ya mani ta̱xi Cristo ndaꞌa i. Saa chi sava ndo káꞌan xaꞌa i ya ndee ni vita ini i tá íyo i xiꞌin ndo, sundi tá íyo xíka i nuu ndo ta ndee ni ndaku ini i, káchi ndo xaꞌa i.

San Mateo 28:20

Saa sinaꞌa ndo na ya ná xaa súvi ndiꞌi na ya ndi̱kaꞌan i xiꞌin ndo. Ta ná kundaa ini ndo, chi yeꞌe, ta ndiꞌi saa kivi koo i xiꞌin ndo, iin saa nda ná ndiꞌi xaꞌa ñuu ivi ―káchi Jesús xiꞌin nda xi̱taꞌan xiꞌin ra. Saa ná koo.

Filipenses 2:5

Tá kuꞌva ndi̱xiyo ni̱nu̱ ni ini mií Tata yo Jesucristo kivi ki̱xi ra ñuu ivi yóꞌó, kuꞌva saa xíniñuꞌu ndo koo ndo,

San Mateo 21:5

Kaꞌan un xiꞌin na ñuu Sión: “Koto ndo, vaxi ra rey ñuu ndo nuu ndo, Ra toꞌo ni ku ra, ta yóso ra burru loꞌo, iin ri loꞌo ku ri yóso ra, seꞌe kiti ndíso vee ku ri”. Soꞌva káchi Ndioxi nuu ta̱a ra profeta xinaꞌa.

2 Corintios 10:5

Ta suvi xiꞌin ndee Ndioxi kua kuchiñu nde sindiꞌi xaꞌa nde ndiꞌi tuꞌun väꞌa ya kánaꞌa naꞌa xaꞌa nde. Ta kuꞌva soꞌva kua kúchiñu nde síndiꞌi xaꞌa nde ndiꞌi ñaꞌa ya ndee ni xáa tai ini naꞌa, chi köo táxi ya kundaa ini na xaꞌa Ndioxi. Ta saa sínaꞌa nde na ya ná nditaxi ndiꞌi na ya ndíchi ndíkani ini na ndaꞌa Jesucristo, saa kua kuchiñu na xaa súvi na ya kúni mií ra.

1 Tesalonicenses 4:2

Xa xíni vaꞌa ni va ndo chiñu ya xa̱ꞌnda chiñu mií Tata yo Jesucristo nuu nde ndi̱kaꞌan nde xiꞌin ndo.

San Juan 13:17

Tá tu kúndaa ini ndo tuꞌun yóꞌó ta xáa súvi ndo ya, ta vaꞌa ni kée ndo tá tu íkan ndo saa.

San Mateo 17:5

Saa káꞌan ka ra Pedro xiꞌin ra, ñaa iin ndi̱kava nduu ndiꞌi viko yéꞌe taxan sata nda, ta tañu viko ikán xi̱ni soꞌo nda tachi Ndioxi, ndi̱kaꞌan ya xiꞌin nda, káchi ya saa: ―Ra yóꞌó ku seꞌe i, ra kúꞌvi ni ini i xíni i, ta kúsini ni i xiꞌin ra. Kuni soꞌo ndo ya káꞌan ra xiꞌin ndo ―káchi tachi Ndioxi xiꞌin nda.

2 Tesalonicenses 1:8

Ta ndiko koo ra tañu ñu̱ꞌu̱, ya ndee ni xíxi, saa xaa nduvaꞌa ni ra xiꞌin naꞌa, na köo ndi̱xiin ndikuni Ndioxi, ni köo ndi̱xíin na kuni soꞌo na tuꞌun vaꞌa xaꞌa Tata yo Jesucristo.

1 Corintios 9:21

Tá íyo i xiꞌin naꞌa, na köo ndíkun ley Ndioxi ya si̱ndoo ra Moisés, ta ndúu i tá íin na ikán, ya kuchiñu chindee taꞌan i xiꞌin na kaku na, saa chi chiñu ya xáꞌnda chiñu mií Ndioxi kua xáa súvi i xaꞌa ya ndíkun i ley mií Cristo.

Los Hechos 7:37

Suvi ra Moisés ikán ku ra ndi̱kaꞌan xiꞌin xii sikua yo: “Vaxi kivi ta tiꞌvi Ndioxi iin ta̱a, raza mií yo Israel yóꞌó koo ra tiꞌvi Ndioxi kixi ra kaꞌan ndoso ra tuꞌun yuꞌu Ndioxi xiꞌin naꞌa. Tá kuꞌva íyo yeꞌe káꞌan ndoso i tuꞌun yuꞌu ra xiꞌin ndo, saa koo ra kixi, ta kuni soꞌo ndo ya kaꞌan ra ikán xiꞌin ndo”, káchi ra Moisés xiꞌin na.

San Lucas 8:35

Ta ke̱e na ñuu xínu na kuaꞌan na koto na ya ndo̱ꞌo kini xiꞌin ra kúu mií tachi nduvaꞌa ikán. Tá ndi̱xaa na xi̱ni na xa ndu̱vaꞌa ra, xa ndi̱kaxin teꞌe ini ra ndi̱kundixi ra tikoto ra íyo koo ra xaꞌa Jesús. Ta saa ndi̱ndiꞌvi ni na.