San Lucas 19:28 - Xochapa Mixteco

²⁸ Ñaa tá sindiꞌi Jesús ndi̱tuꞌun ra tuꞌun ndíchi ikán, saa xa̱á xíka tuku ra kuandaa ra kuaꞌan ra ñuu Jerusalén.

San Lucas 19:28 Referans Kwoze

San Lucas 9:51

Ta xa kuaꞌan kúyati kivi ndiko koo Jesús kuꞌun ra nuu ndivi, ñaa chi̱kaa ini ra kuꞌun ra ñuu Jerusalén.

1 Pedro 4:1

Ta ndo̱ꞌo ni Cristo xaꞌa yo, ndi̱taxi ra ikin kuñu ra ndi̱xuꞌvi ni ra. Yakan saa xíniñuꞌu ndóꞌo̱ xaꞌa ni ndo ndee ya ndoꞌo ndo tá kuꞌva ndo̱ꞌo mií ra. Chi ndiꞌi naꞌa, na ndee ni tíxuꞌvi, ta na ikán sínaꞌa na mií na ya ndixa kua si̱ndoo ndiꞌi na ichí väꞌa i̱kan na,

HEBREOS 12:2

Ta iindaa mituꞌun xaꞌa Tata yo Jesucristo kua ná kundiꞌi ni ini yo, saa chi mií ra ku ra sínaꞌa yoo ndá kuꞌva kua kundaa ni ini yo kuni yo Ndioxi, saa tu iindaa mituꞌun mií ra ku ra chíndee yoo, ndása vaꞌa ra kuꞌva ndáa ni ini yo xíni yo Ndioxi. Ta saa ndi̱xaꞌa ndee ndiꞌi ini ra ndoꞌo ni ra nuu cruzin, ta köo ndi̱kiꞌin ra kuenta xaꞌa ya kúkaꞌan nuu ra, chi kúndaa ini ra tá si̱ndiꞌi ndo̱ꞌo ra saa ta kusini ni ra. Ta vitin ndi̱kunduꞌu ra ñaꞌñu kuáꞌá Ndioxi xáꞌnda chiñu ra xiꞌin Ndioxi.

San Lucas 18:31

Saa ku̱u ta ka̱na Jesús ndisaa uxi uvi mií nda ítaꞌan xiꞌin ra ndi̱kaꞌan ra xiꞌin nda, káchi ra saa: ―Vitin kuaꞌan yo ñuu Jerusalén, ikán ku nuu xinu ndiꞌi ya ta̱a nda ndi̱kaꞌan ndoso tuꞌun yuꞌu Ndioxi xaꞌa yeꞌe, Taa ra xa̱a ñuu ivi yóꞌó.

San Lucas 12:50

Ndíkani ni ini i xaꞌa ya ndee ni kundoꞌo i, ta xaꞌa ya ikán kua nduu i tá káa ra chíchi nuu Ndioxi. Ta nda vitin ta ndíꞌi ni ini i ndátun i nda kivi ná xinu koo tiempo ya kuu saa.

San Juan 18:11

Saa ndi̱kaꞌan Jesús xiꞌin ra Pedro, káchi ra saa: ―Chivaꞌa i̱chi un ini iín nuu ndíkaa ya. Saa chi xa saa chi̱tuni Ndioxi ya ndee ni uꞌvi tixuꞌvi i, ta yeꞌe xíniñuꞌu i xaa súvi i tindoꞌo ya uꞌvi ni yóꞌó ―káchi ra xiꞌin ra Pedro.

San Lucas 10:30

Saa ndi̱kuiin Jesús ndítuꞌun ra iin tuꞌun ndíchi ya sínaꞌa ñaꞌa ra, káchi ra saa: ―Iin ra taa ke̱e ra ñuu Jerusalén kuaꞌan ra chí ichí ya kuaꞌan ñuu Jericó. Tá kuaꞌan ra ikán ta ka̱na koo nda kuiꞌna ichí ki̱ndaa ndiꞌi nda ñaꞌa ndaꞌa ra, saa xa̱a nduvaꞌa ni nda xiꞌin ra, si̱tikueꞌe ñaꞌa nda, siloꞌo kuvi ra.