San Lucas 16:23 - Xochapa Mixteco

²³ ’Ta tíxuꞌvi ka vi ra ndíkaa ra nuu ñúꞌu na ndíi. Saa si̱kuꞌun nuu ra ndi̱koto ra, ta xi̱ni ra, ra Lázaro íyo ra xiꞌin ra Abraham.

San Lucas 16:23 Referans Kwoze

2 Pedro 2:4

Saa chi nda na tatun Ndioxi ta köo ndi̱xaa kaꞌnu ini ra xaꞌa na tá ndi̱yaꞌa na nuu ra i̱kan na ya väꞌa ta ti̱ꞌvi ra na kuaꞌan na ndaya, ta̱an ra na ini yavi nuu naá ni, ta ikán kuñuꞌu na nda kivi ná xaa nani ra kuachi xiꞌin na ñuu ivi.

San Lucas 16:28

Chi ndóo ka uꞌun ñani i, ta ná kuꞌun loꞌo ra ndituꞌun ra xiꞌin nda ya ná ndiko koo ini nda ta kïxi nda nuu ndíkaa i yóꞌó chi tíxuꞌvi ni i”, káchi ra.

San Mateo 23:33

¡Seꞌe ko̱ó ku ndo, chi íkan ndo tá íkan ko̱ó kueꞌe! ¡Ta ni köo ka kuꞌva sikaku ndo mií ndo ya küꞌun ndo ndaya!

San Mateo 18:9

Tá tu iin nduchi nuu ndo kua chíndaꞌa ndóꞌo̱ ndikava ndo nuu ya väꞌa, ta vaꞌa ka tava ndo ya sikana xika ndo. Kuchiñu ka ndo koo ndo xiꞌin Ndioxi tá tu köo iin nduchi nuu ndo, süvi ka vi ya íyo uvi saa ya, ta kuꞌun ndo xiꞌin ya ndaya ―káchi Jesús.

El Apocalipsis 20:10

Saa tiin na tatun Ndioxi kiti nǎꞌa, kiti si̱ndaꞌvi ni naꞌa, ta kiꞌin na ri sikana táku na nuu xitun nuu ndee ni xíxi ñu̱ꞌu̱ xiꞌin ñu̱ꞌú káꞌndi ya náni azufre. Ta nuu xíxi ni ñu̱ꞌu̱ ikán xa si̱kana tu na kiti ìyo ni káa xiꞌin ra profeta vata ra xa̱a chiñu nuu ri. Ikán ku nuu tíxuꞌvi ni na nduvi niuun saa tixuꞌvi na ndiꞌi saa kivi ya vaxi.

San Lucas 8:28

Ñaa tá xi̱ni ra Jesús ta ndi̱xaa ra si̱kusiti ra nuu ra, ndi̱ndaꞌi koꞌo ra, káchi ra saa: ―Tata, ¿unkua kúni un ikan un xiꞌin i? Chi yóꞌo̱ ku Jesús, Seꞌe Ndioxi ra kaꞌnu nuu i. Xáku ndaꞌvi ni i nuu un xäa nduvaꞌa un xiꞌin i ―káchi ra xiꞌin Jesús.

San Mateo 5:29

Xaꞌa ya ñaa kua káꞌan i xiꞌin ndo, tá tu xiꞌin nduchi nuu kuáꞌá ndo ku ya kuakiꞌvi ndo kuachi, ta vaꞌa tava ndo ya sikana ndo. Vaꞌa ka kua ná ndiꞌi xaꞌa iin ñaꞌñu ikin kuñu ndo, süvi ka vi ya ndiꞌi vaꞌa xaꞌa ndo kuꞌun ndo ndaya.

San Mateo 5:22

Ta vitin káꞌan yeꞌe xiꞌin ndo, tá ndá ndóꞌo̱ sáa ni ini xíni ndo ñani ndo, ta ndóꞌo̱ ta ìyo ni kixi tindoꞌo nuu ndo. Tá ndá ndóꞌo̱ káꞌan xiꞌin ñani ndo, ra kíꞌvi ku ra káchi ndo, ta ndóꞌo̱ ndíso ndo kuachi nuu na chiñu naꞌnu ni. Tá ndá ndóꞌo̱ távi chiꞌña ñani ndo, ta ìyo ni kuꞌun ndo ndaya nuu xíxi ñu̱ꞌu̱ xaꞌa ya káꞌan ndo saa.

1 Corintios 15:55

Yóꞌo̱, ndìì ya xáꞌni naꞌa, ¿míí chí kuaꞌan ndee un ya xáꞌni un naꞌa? Köo ka ndee kúu míí un ya kaꞌni ka un naꞌa”, káchi tuꞌun Ndioxi.

San Mateo 11:23

Ta ndóꞌo̱ na ñuu Capernaum, ¿Án ndíkani ini ndo ínuu vaꞌa ni tuꞌun ndo nda nuu ndivi, túvi ndo? Ndaꞌvi ni ndo chi nda kaꞌa ndaya nuu kunu ni̱nu̱ tiꞌvi Ndioxi ndóꞌo̱ kuꞌun ndo. Chi taꞌan yatuꞌun íkan i xiꞌin ndóꞌo̱ vitin, tá ndi̱xini na ñuu Sodoma ya ta xa ndi̱ko koo ini na xaꞌa ya väꞌa íkan na, ta ndïꞌi xaꞌa na táku na nda vitin, ndikuu.

San Mateo 8:29

Ñaa iin ndi̱ndaꞌi koꞌo uvi saa nda, káchi nda saa: ―¿Unkua kúni un ikan un xiꞌin nde, Jesús? Kïꞌvi un xiꞌin nde saa chi Seꞌe Ndioxi ku yóꞌo̱. ¿Án xa̱a un ya xaa nduvaꞌa un xiꞌin nde, yachi ka tá täꞌan tindaa tiempo? ―káchi nda xiꞌin Jesús.

San Lucas 16:24

Ñaa ndi̱ndaꞌi koꞌo ra, káchi ra saa: “¡Tata iva yo Abraham, kundaꞌvi ini un kuni un yeꞌe! Kaꞌan xiꞌin ra Lázaro ná kuꞌun ra chikaa ndaꞌa ra ini tikuii ta ná kixi ra xiꞌin rá ndiyakun ra yaa i, saa chi ndóꞌo ni ini i ndíkaa i nuu xíxi ñu̱ꞌu̱ yóꞌó”, káchi ra kuika ikán.