San Lucas 10:22 - Xochapa Mixteco

²² Ta saa ndi̱kaꞌan ka ra káchi ra saa: ―Iva i Ndioxi ta ta̱xi ra ichí ndaꞌa i xaꞌa ndiꞌi ñaꞌa. Ta nda iin naꞌa köo xíni ini yeꞌe ra kúu Seꞌe Ndioxi, iindaa mií Iva i Ndioxi ku ra xíni ini i, ta ni ini Iva i Ndioxi köo xíni na, iindaa yeꞌe ku Seꞌe ra ku i xíni ini ra, saa sínaꞌa i ra nuu na kúni mií i kuni taꞌan xiꞌin ra ―káchi Jesús.

San Lucas 10:22 Referans Kwoze

San Mateo 11:27

Saa ndi̱kaꞌan ka Jesús xiꞌin na, káchi ra saa: ―Iva i Ndioxi ta̱xi ndiꞌi ra ya vaꞌa ndaꞌa i. Ta nda iin naꞌa köo xíni yeꞌe, ra kúu seꞌe Ndioxi, iindaa mií Ndioxi ku ra xíni vaꞌa yeꞌe. Ta nda iin naꞌa köo xíni Iva i tá kuꞌva xíni yeꞌe ra, saa tu na ndi̱kaxin i taxi i kuni vaꞌa na ini ra.

San Juan 1:18

Nda iin mituꞌun naꞌa täꞌan kuni xiꞌin nuu Ndioxi. Iindaa Jesucristo Seꞌe Ndioxi, ra iin mituꞌun nuu ra, ra íyo xiꞌin ra, ra ikán ku ra xíni vaꞌa Ndioxi, ta ra ikán ku ra sínaꞌa yoo ndá kuꞌva káa Ndioxi.

San Juan 10:15

Tá kuꞌva xíni Iva i yeꞌe, saa xíni vaꞌa tu mií va i ra ta íyo tuꞌva i kuvi i xaꞌa levo sana i.

2 Juan 1:9

Ndiꞌi na síndoo ichí ya si̱naꞌa Jesucristo ta ndíkiꞌin na inka ichí kuaꞌan na, ta köo Ndioxi íyo xiꞌin na, sundi na tuun ni ndíkun ichí ya si̱naꞌa ra ta kúu mií na Iva yo Ndioxi xiꞌin Seꞌe ra.

2 Corintios 4:6

Saa chi suvi mií Ndioxi ku ra xa̱ꞌnda chiñu ya ndi̱yeꞌe ñu̱ꞌu̱ yéꞌe̱ nuu naá. Ta suvi mií ra ku ra si̱ndiyeꞌe ya nima yo ya ku̱chiñu yo ndi̱xuna ya xínituni yo, saa kua kuni yo ya luvi ni ndi̱yeꞌe ya kúu mií Ndioxi, ya ndi̱yeꞌe ya nuu Jesucristo.

1 Juan 5:20

Xíni tu yo ya ki̱xi Jesús Seꞌe Ndioxi ñuu ivi yóꞌó ta ta̱xi ra ya xínituni yo ya kundaa vaꞌa ini yo xaꞌa Ndioxi, ra ndaa. Ta iin yuꞌu ku yo xiꞌin Seꞌe ra, ra kúu Jesucristo, ra ndaa. Saa chi Jesucristo ku Ndioxi ra ndaa, ra táxi ichí ya kutaku yo xiꞌin Ndioxi ndiꞌi saa tiempo.

San Juan 17:26

Ta xa si̱naꞌa i na yóꞌó xaꞌa ndee kúu mií kivi un saa sinaꞌa ka i na. Íkan i saa ya ná koo ni ya kúꞌvi ini un xiꞌin na, tá kuꞌva kúꞌvi ni ini un xíni un yeꞌe, saa íkan tu yeꞌe va xiꞌin na, koo i xiꞌin na ―káchi Jesús ndi̱kaꞌan ra xiꞌin Ndioxi.

San Juan 17:2

Chi yóꞌo̱ ku ra ta̱xi ichí ndaꞌa i xaꞌa ndiꞌi na ñuu ivi na ta̱xi un ndaꞌa i yóꞌó, ya ná taxi i ichí ndaꞌa na kutaku na ndiꞌi saa kivi.

San Mateo 28:18

Saa ku̱yati Jesús nuu nda, ta ndi̱kaꞌan ra xiꞌin nda, káchi ra saa: ―Ndaꞌa yeꞌe ta̱xi Ndioxi ichí xaꞌa ndiꞌi ni kúu ñaꞌa ya íyo nuu ndivi tin ya íyo ñuu ivi yóꞌó.

San Juan 13:3

Xa xíni Jesús ya ta̱xi ndiꞌi Iva ra ñaꞌa ndaꞌa ra, ta xíni ra ke̱e ra nuu Ndioxi, ta saa ndiko koo ra kuꞌun ra.

San Juan 3:35

Iva yo Ndioxi ta kúꞌvi ni ini ra xíni ra Seꞌe ra, yakan kua ta̱xi ndiꞌi ra ñaꞌa ndaꞌa Seꞌe ra.

HEBREOS 2:8

Ndiꞌi ni kúu ñaꞌa ta̱xi un ndaꞌa ra ndáa chiñu ra xiꞌin ya. Ta nda iin ñaꞌa köo ndi̱sindoo mií Ndioxi, ta̱xi ndiꞌi ra ya ndaꞌa ra. Vani ndi̱kundiso chiñu ra xiꞌin ndiꞌi ni kúu ya, ta saa ni íyo ka sava ya täꞌan xinu.

Efesios 1:21

Ta̱xi Ndioxi ichí ndaꞌa Cristo ya kaꞌnda ra chiñu nuu tá kúu ndiꞌi na chiñu naꞌnu xiꞌin na chee xáꞌnda chiñu ñuu ivi yóꞌó án chiñu naꞌnu ya chee xáꞌnda chiñu nuu ndivi tiempo vitin xiꞌin tiempo ya vaxi.

1 Corintios 15:24

Tá si̱ndiꞌi si̱taku ra naꞌa ikán, saa sindiꞌi xaꞌa ra ndiꞌi ndee ya xáꞌnda chiñu nuu na ñuu ivi yóꞌó, xiꞌin ndiꞌi ndee ya kúu mií na kúnaꞌnu xáꞌnda chiñu, xiꞌin ndiꞌi ñaꞌa ya xáꞌnda chiñu nuu ndivi. Saa nditaxi ra ichí ya kúu mií ra ndaꞌa Iva yo Ndioxi.

San Juan 17:10

Ta ndiꞌi na ndíkun yeꞌe kuenta un ku na, saa tu na ndíkun yóꞌo̱ va kúu na kuenta i, ta xáa kaꞌnu ni na yeꞌe.

San Juan 17:5

Tata Iva i Ndioxi, vitin xaa kaꞌnu un yeꞌe, taxi un koo i xiín un nuu luvi ni ndi̱xiyo i xiꞌin un yachi tá täꞌan xikoo ñuu ivi yóꞌó.

San Mateo 11:25

Tiempo ikán ndi̱kaꞌan Jesús xiꞌin Ndioxi, káchi ra saa: ―Tata Iva yo, yóꞌo̱ ku ra chee nuu ndiꞌi na ñuu ivi yóꞌó xiꞌin nuu ndivi. Xáa kaꞌnu ni i yóꞌo̱ chi xa si̱naꞌa un na ndaꞌvi, na köo kúndaa ini, na íin tá íin na vali, ku̱ndaa ini na ya vaꞌa xaꞌa un. Ta ti̱seꞌe un ya vaꞌa yóꞌó nuu naꞌa, na ndíchi, na xíni ni.