San Juan 12:27 - Xochapa Mixteco

²⁷ Saa ndi̱kaꞌan ka Jesús, káchi ra saa: ―Ta vitin yáꞌa ni ndíꞌi ini i, saa xíka ni ini i unkua nduku i nuu Ndioxi. ¿Án vaꞌa ka kaꞌan i xiꞌin Iva i ya sikaku ra yeꞌe xaꞌa ya kundoꞌo i vitin? Ta küvi kaꞌan i saa xiꞌin ra, chi xaꞌa ya kuvi i kua vaxi i ñuu ivi yóꞌó ―káchi Jesús.

San Juan 12:27 Referans Kwoze

San Juan 12:23

Saa ndi̱kuiin Jesús káchi ra saa: ―Xa yati ni ti̱ndaa kivi ya xaa súvi i chiñu chee ni nuu xaa kaꞌnu ni Ndioxi yeꞌe Taa ra xa̱a ñuu ivi yóꞌó.

HEBREOS 5:7

Kivi ndi̱xiyo Cristo ñuu ivi yóꞌo̱ ta ndee ni xa̱ku ndaꞌvi ra nuu Ndioxi, káꞌan ndaꞌvi ra xiꞌin Ndioxi, saa chi xíni ra iindaa mií Ndioxi ku ra kúu mií ndee ya sikaku ñaꞌa ra, ya ná ndöo ra ndikaa ra ndaꞌa ndìì ya xáꞌni naꞌa. Ta xaꞌa ya xa̱a súvi ni ra ya ndi̱kaꞌan Ndioxi xiꞌin ra, saa ndaꞌvi ni ndo̱ꞌo ra nuu Ndioxi, xaꞌa ya ikán kua xi̱ni soꞌo Ndioxi ya ndi̱kaꞌan ra xiꞌin ra.

San Juan 13:21

Tá ndi̱ꞌi ndi̱kaꞌan ra saa, ta xa̱á ra kúsuchi ni ini ra, ta saa ndi̱kaꞌan ra xiꞌin nda, káchi ra saa: ―Ya ndaa káꞌan i xiꞌin ndo: Iin ndóꞌo̱ ku ndo ndixiko vata yeꞌe nuu na sáa ini xíni yeꞌe ―káchi ra xiꞌin nda.

San Mateo 26:42

Saa ke̱e tuku ra kuaꞌan ra kaꞌan ra xiꞌin Ndioxi ichí uvi, káchi ra saa: ―Tata Iva mií i, tá xíniñuꞌu i ndoꞌo ni i, ta íyo ndúvi i xaa súvi i ya kúni mií un ―káchi ra.

HEBREOS 2:14

Tá kúu seꞌe na iva siꞌí, iin nuu ku ikin kuñu ndiꞌi na ta iin nuu kuu tu nií va na. Ta saa xi̱niñuꞌu Tata yo Jesús ndu̱u ra, ra ivi taꞌan mií yo, ndi̱xiyo ikin kuñu ra ta ku̱u mií ra nií taꞌan yoo, saa ndi̱xiꞌi ra xaꞌa ya ikán kua ku̱chiñu ra si̱ndiꞌi xaꞌa ra ndee kiti nǎꞌa ya xáꞌni ndìì.

San Lucas 22:44

Ta ndíꞌi ka vi ini ra, ndinuni loꞌo káꞌan ra xiꞌin Ndioxi, ndakua ndi̱xinu titiin nuu ra. Ndoo ka vi rá kóyo vaxi nùù nuu ra. Tá íin koꞌndo nduta nií, saa íin rá kóyo nuu ñuꞌú.

San Juan 18:37

Saa ndi̱kuiin ra Pilato káchi ra saa: ―¿Án saa va, án rey ku ndixa un? ―káchi ra xiꞌin ra. Saa ndi̱kuiin Jesús káꞌan ra, káchi ra saa: ―Ya ndixa kua, saa ndixa íyo va ya. Xaꞌa ya ñaa kua ka̱ku i xa̱a i ñuu ivi yóꞌó ya ndikuiin i kaꞌan i nina ya ndaa. Ta ndiꞌi na ndíkun ya ndaa, na ñaa ku na kándixa ya káꞌan i ―káchi Jesús.

San Lucas 22:53

Ndiꞌi saa kivi ndi̱xiyo i xiꞌin ndo veꞌe ñuꞌu ta köo ya ndikan ndo xiꞌin i. Sundi vitin ti̱ndaa hora ya taxi Ndioxi ikan ndo ya kúni mií ndo, chi kiti nǎꞌa kaꞌnda chiñu nuu ndóꞌo̱ ñuu ivi yóꞌó tiempo vitin ―káchi Jesús xiꞌin nda.

1 Timoteo 1:15

Ta vaꞌa ná kundaa ini un xiꞌin ya káꞌan i xiꞌin un, chi ya ndaa ni kua, ta ndiꞌi na xíniñuꞌu kundaa ini xaꞌa ya yóꞌó: Chi Tata yo Jesucristo ku ra ki̱xi ñuu ivi yóꞌó ya sikaku ra yo ivi kuachi, ta kúni i káꞌan i xiꞌin un, xiꞌna yeꞌe ku ra ndee ni kuachi íyo nuu ndiꞌi na ivi.

San Juan 11:41

Saa si̱kutaꞌa na yu̱ú ya ndási yuꞌu kava nuu chi̱kaa na ra. Ta ndi̱koto Jesús nuu ndivi saa ndi̱kaꞌan ra, káchi ra saa: ―Tata Iva i, táxi i tixaꞌvi ndaꞌa un chi xi̱ni soꞌo un ya ndi̱kaꞌan i xiꞌin un.

San Mateo 11:25

Tiempo ikán ndi̱kaꞌan Jesús xiꞌin Ndioxi, káchi ra saa: ―Tata Iva yo, yóꞌo̱ ku ra chee nuu ndiꞌi na ñuu ivi yóꞌó xiꞌin nuu ndivi. Xáa kaꞌnu ni i yóꞌo̱ chi xa si̱naꞌa un na ndaꞌvi, na köo kúndaa ini, na íin tá íin na vali, ku̱ndaa ini na ya vaꞌa xaꞌa un. Ta ti̱seꞌe un ya vaꞌa yóꞌó nuu naꞌa, na ndíchi, na xíni ni.

San Mateo 11:26

Saa va Tata, chi saa íyo ya kúni mií un ikán un xiꞌin na ―káchi Jesús xiꞌin Ndioxi.

San Mateo 26:45

Sindiꞌi ndi̱ko koo ra nuu nda, saa ndi̱kaꞌan ra xiꞌin nda, káchi ra saa: ―¿Án kíxi yaa va ndo? ¿Án ndee ni va ndíkundee ndo? Ta vaꞌa ndikoo ndiꞌi va ndo, saa chi xa ti̱ndaa hora ya nditaxi na yeꞌe, Taa ra xa̱a ñuu ivi yóꞌó ndaꞌa naꞌa, na väꞌa.