HEBREOS 9:11 - Xochapa Mixteco

¹¹ Sundi Jesucristo ta xa ki̱xi ra ñuu ivi yóꞌó, ta vitin ra ikán ku ra kúu sutu ra chee ni nuu yo. Chi ki̱xi ra ya taxi ra ndiꞌi ya vaꞌa kúu mií Ndioxi ndaꞌa yo. Ta vitin íyo ra xáa chiñu ra veꞌe ñuꞌu ya chee, ya luvi ni íyo nuu ndivi, ya ndee ni ka vaꞌa ku ya ikán nuu ya íyo ñuu ivi yóꞌó, saa chi süvi na ivi yóꞌó ku na ndi̱sikuaꞌa ya, Ndioxi ku ra si̱kuaꞌa ya.

HEBREOS 9:11 Referans Kwoze

2 Corintios 5:1

Ta xa kúndaa vaꞌa ini yo chi ikin kuñu yo ya kúu mií yo ñuu ivi yóꞌó, ta tá íyo veꞌe manta ya ndíꞌi xaꞌa va saa íyo ya. Sundi tá ná ndiꞌi xaꞌa ya yóꞌó, ta xa íyo inka veꞌe ikin kuñu yo ya xa̱á si̱kuaꞌa Ndioxi nuu ndivi. Ta ya ikán ta köo ndíꞌi xaꞌa ya, ndiꞌi saa ichí koo ya chi süvi na ñuu ivi yóꞌó ku na ndi̱sikuaꞌa ya.

HEBREOS 10:1

Saa chi ley Ndioxi ya ta̱a ra Moisés, ta tá káa copia ya xa̱na ni náꞌa ya sínaꞌa xaꞌa ndiꞌi ñaꞌa ya vaꞌa taxi Ndioxi ndaꞌa yo kivi vaxi, saa káa ya. Chi ley ikán ta xa̱ꞌnda chiñu ya nuu naꞌa ya soko na kiti sana na nuu Ndioxi tá nuu kuiya. Ta nda iin ichí köo ndi̱kuchiñu ya ndasa vaꞌa ya nima na ivi, ta ni küchiñu ya.

San Marcos 14:58

―Ndeꞌe ta xi̱ni soꞌo nde ndi̱kaꞌan ra, káchi ra saa: “Yeꞌe ta sindiꞌi xaꞌa i veꞌe ñuꞌu kaꞌnu yóꞌó ya si̱kuaꞌa na ivi, ta tixin kivi uni sixinu i inka ya, ta süvi taꞌan ya síkuaꞌa na ivi yóꞌó koo ya”, káchi ra ―káchi nda xaꞌa Jesús.

1 Juan 5:20

Xíni tu yo ya ki̱xi Jesús Seꞌe Ndioxi ñuu ivi yóꞌó ta ta̱xi ra ya xínituni yo ya kundaa vaꞌa ini yo xaꞌa Ndioxi, ra ndaa. Ta iin yuꞌu ku yo xiꞌin Seꞌe ra, ra kúu Jesucristo, ra ndaa. Saa chi Jesucristo ku Ndioxi ra ndaa, ra táxi ichí ya kutaku yo xiꞌin Ndioxi ndiꞌi saa tiempo.

HEBREOS 2:17

Xaꞌa ya ndu̱u ra iin káchi tá kuꞌva íin mií yo na ivi yóꞌó, na kúu ñani ra. Xaꞌa ya ikán kua vaꞌa ndi̱xinu ra ndu̱u ra sutu, ra ndee ni ndinuꞌu xáa súvi ndiꞌi ñaꞌa, ta saa kúndaꞌvi ni ini ra xíni ra naꞌa. Xaꞌa ya ndi̱taxi ra mií ra ndi̱xiꞌi ra, yakan vaꞌa ku̱chiñu ra ndi̱soko ra mií ra nuu Ndioxi ya xaa kaꞌnu ini ra xaꞌa kuachi yoo, na kúu ñuu Ndioxi.

Los Hechos 7:48

Vani si̱kuaꞌa ra Salomón veꞌe ñuꞌu ikán xaꞌa Ndioxi, sundi Ndioxi ra chee, ra kaꞌnu, ta köo íyo ra ini veꞌe ñuꞌu ya si̱kuaꞌa na ivi yóꞌó. Tá káchi ra xiꞌin iin ra ta̱a tuꞌun yuꞌu ra xinaꞌa:

2 Juan 1:7

Kuenta ni koo ndo chi xa kuaꞌa ni na vata íyo ñuu ivi yóꞌó, ta na ñaa ta köo xíin na ndikuni na Jesucristo ya ki̱xi ra ñuu ivi yóꞌó ta ndu̱u ra ra ivi taꞌan mií yo ivi yóꞌó. Ndiꞌi na köo xíin ndi̱kuni ñaꞌa ta na ñaa ku na vata, na sáa ini xíni Jesucristo.

HEBREOS 3:1

Ñani yo xiꞌin kuꞌva yo, ndóꞌo̱ ku ndo ndi̱kaxin Ndioxi, saa ka̱na ra ndóꞌo̱ ta xa̱a i̱í ra ndóꞌo̱ koo ndo xiꞌin ra. Yakan kiꞌin ni ndo kuenta, chi suvi mií Jesús ku ra ku apóstol, ra ti̱ꞌvi Ndioxi vaxi xaa chiñu ra nuu ra, ta kúu tu ra sutu ra chee ni nuu ndiꞌi yo kándixa ñaꞌa.

San Juan 4:25

Saa ndi̱kaꞌan yá xiꞌin ra, káchi yá saa: ―Xíni i iin kivi ta kixi Taa ra Mesías. Ta káꞌan tu na xiꞌin ra Cristo va. Tá ná kixi ra ikán ta saa ndikani vaꞌa ka ra nuu nde ―káchi yá.

San Juan 1:14

Ta Tuꞌun Ndioxi ikán, ndu̱u ya iin taa, tá íin mií yo saa ndu̱u ra, ta ndi̱xika ra xiꞌin nde ñuu ivi yóꞌó. Ta xi̱ni nde ya vaꞌa luvi ni kúu mií ra. Ta mií ya luvi ni kúu mií Ndioxi kua kúu mií ra, chi iindaa mií ra ku Seꞌe Ndioxi. Iin chútu ndaa ya vaꞌa, ya ndaa ini ra.

HEBREOS 7:1

Ra Melquisedec ta ndi̱xiyo ra rey nuu na ñuu Salem, saa ku̱u tu ra sutu nuu Iva yo Ndioxi ra kaꞌnu ni. Kivi ndi̱ko koo ra Abraham tá ndi̱xaꞌan ra nuu kuachi ka̱ni taꞌan ra xiꞌin inka nda rey, ta ku̱chiñu ra nuu nda rey ikán, saa ke̱ta ra Melquisedec ndi̱kiꞌin ñaꞌa ra, saa chi̱kaa ra ya vaꞌa ra Abraham.

HEBREOS 4:15

Saa chi sutu ra ínuu nuu yo ku ra ta kúndaꞌvi ni ini ra xíni ra yoo, xaꞌa ya xíni ra köo ndee ini yo, köo ndaku ini yo nuu ya väꞌa, chi tá káa níí ya ndóꞌo yoo, saa ndi̱xiyo tu ya ndo̱ꞌo mií va ra, xi̱to ndoso ni ya väꞌa ra, sundi nda iin kuachi köo ndi̱kiꞌvi ra.

Colosenses 2:11

Ta xaꞌa ya xa ndu̱u ndo iin xiꞌin Tata yo Jesucristo kua kúu mií ndo tuni Ndioxi, ta süvi xiꞌin ndaꞌa na ivi yóꞌó kua ndíkunuu tuni Ndioxi ndóꞌo̱, chi mií Ndioxi ku ra chi̱nuu ya ndóꞌo̱. Xaꞌa ya si̱kaku Tata yo Jesucristo ndóꞌo̱ kua ndi̱saña ndo nuu ndee ya väꞌa ku̱u mií ndo ikin kuñu ndo.

San Mateo 11:3

Ndi̱xaa nda nuu ra, káꞌan nda xiꞌin ra, káchi nda saa: ―¿Án yóꞌo̱ ku ra ndátun nde tiꞌvi Ndioxi kixi sikaku na ñuu ivi yóꞌó án kundatun ka nde inka ra? ―káchi nda xiꞌin Jesús.

San Mateo 2:6

Ñuu Belén, ya ndíkaa estado Judea kuu iin ñuu ya ndáa yaꞌvi ni ka nuu ndiꞌi ñuu, chi nda ñuu ikán kixi ra xaa kuenta xiꞌin na ñuu Israel, káchi Ndioxi, nuu ta̱a nda profeta ―káchi nda ndíso chiñu nuu na judío xiꞌin ra rey Herodes.

2 Corintios 4:18

Xaꞌa ya ñaa kua köo xíka ini nde xaꞌa ñaꞌa ya vaꞌa xíto xiꞌin nuu yo, chi ya küvi kuni yo ku ya ndáa yaꞌvi ni ka nuu nde. Saa chi ñaꞌa ya xíni xiꞌin nuu yo ta kama ni va ndíꞌi xaꞌa ya, sundi ñaꞌa ya köo xíni xiꞌin nuu yo ta ndiꞌi saa va ichí íyo ya.

HEBREOS 12:27

Ta xiꞌin tuꞌun ya káꞌan ra “sitaan tuku ra”, xiꞌin ya ikán kua kúndaa teꞌe ini yo ya sindiꞌi xaꞌa ndiꞌi ra ñaꞌa ya si̱kuaꞌa ra ñuu ivi yóꞌó, ta ndisaa ya köo ndíꞌi xaꞌa kua ndoo koo.

HEBREOS 13:14

Saa chi ñuu ivi nuu ndóo yo vitin, ta köo ñuu nuu kuchiñu kundoo yo ndiꞌi saa tiempo, yakan ndátun yo koo yo ñuu xa̱á vaxi kivi, nuu ndïꞌi xaꞌa yo nda iin ichí.