HEBREOS 7:25 - Xochapa Mixteco

²⁵ Xaꞌa ya ikán kua vaꞌa síkaku ra yoo, yo kúyati nuu Ndioxi xaꞌa mií ra. Ta ndiꞌi saa ichí kutaku yo xiꞌin ra, saa chi ndiꞌi saa ichí táku mií ra, yakan vaꞌa káꞌan ra xaꞌa yo xiꞌin Ndioxi.

HEBREOS 7:25 Referans Kwoze

ROMANOS 8:34

Ta ¿án ndá naꞌa káꞌan xaꞌa yo kuvi yo xaꞌa kuachi yo? Nda iin naꞌa küchiñu ikan saa xiꞌin yo, chi Jesucristo ku ra xa ndi̱xiꞌi xaꞌa kuachi yo, ta ndi̱taku ra, ta vitin íyo ra ñaꞌñu kuáꞌá Ndioxi, ta íyo ra xáku ndaꞌvi ra xaꞌa yo.

1 Timoteo 2:5

Ta iindaa va ku Iva yo Ndioxi, ta iindaa ku tu taa ra si̱kitaꞌan mani yoo va xiꞌin Iva yo Ndioxi, ta taa ikán ku ra ku Tata yo Jesucristo.

Judas 1:24

Ná xaa kaꞌnu ni yo Ndioxi chi ndee ni ndee kúu mií ra ya chindee ra yoo ya ná sïndikoo yo ichí ra ya ndaa kándixa yo. Ta vaxi kivi kundita yo nuu ra nuu íyo ndiꞌi ya kaꞌnu luvi ni. Saa ndasa vaꞌa ra yoo nduu yo naꞌa, na köo ka kuachi kúu mií nuu ra, ta yáꞌa ni kusini yo kivi ikán.

San Juan 14:6

Saa ndi̱kuiin Jesús ndi̱kaꞌan ra xiꞌin ra, káchi ra saa: ―Yeꞌe ku ra ku ichí, ta yeꞌe ku mií ya ndaa, yeꞌe ku ra táxi kutaku na. Nda iin na küvi kuꞌun nuu Iva i, tá tu süvi xiꞌna nuu yeꞌe vaxi na.

Efesios 2:18

Ta vitin xaꞌa ya i̱kan Jesucristo xaꞌa yo kua vaꞌa kuchiñu ndiꞌi ndaa yo kuyati yo nuu Iva yo Ndioxi tixin ndee Tachi I̱í ra.

ROMANOS 5:2

Saa tu xaꞌa ya kándixa yo Jesucristo kua ndi̱niꞌi uun yo nuu ndi̱kiꞌvi yo ndi̱kitaꞌan vaꞌa ni yo xiꞌin Ndioxi, ta ni küxika ka yo nuu ra. Saa kúsini ni yo chi kúndaa teꞌe ini yo ya koo yo xiꞌin ra nuu kuni yo ya chee ni kúu mií Ndioxi.

HEBREOS 11:6

Tá tu köo ndáa ni ini yo xíni yo Ndioxi, ta küvi xaa síni yo ini ra, saa chi ndiꞌi yo kúyati nuu ra ta xíniñuꞌu yo kundaa ni ini yo kuni yo ra ya íyo ra, saa xíniñuꞌu tu yo kundaa ini yo ya sóko ni ra ya vaꞌa nuu ndiꞌi yo kúyati nuu ra, ndúku yo ra.

Efesios 3:20

Ta xiꞌin ndee mií Ndioxi ya íyo xiꞌin yo kua kuchiñu ikan ra ya chee ni xiꞌin yo, chi ndee ni ndee kúu mií ra ta yáꞌa ni ka va kuaꞌa ñaꞌa kuchiñu ra ikan ra nuu ya ndákan yo nuu ra án ya ndíkani ini yo xaꞌa.

HEBREOS 9:24

Saa chi veꞌe ñuꞌu nuu ndee ni I̱í ndi̱kiꞌvi Jesucristo, ta süvi na ñuu ivi yóꞌó ku na ndi̱sikuaꞌa ya. Chi ya si̱kuaꞌa na ivi yóꞌó, ta tá káa copia mií veꞌe ñuꞌu ya ndee ni vaꞌa íyo mií nuu ndivi saa káa ya si̱kuaꞌa na. Ta ikán ku nuu ndi̱kiꞌvi Jesucristo ini veꞌe ñuꞌu ya ndee ni vaꞌa ikán, káꞌan ndaꞌvi ra xaꞌa yo xiꞌin Ndioxi, ya ná xaa kaꞌnu ini ra xaꞌa yo.

HEBREOS 7:19

Chi ley ikán, ta köo ndi̱kuchiñu ya ndasa vaꞌa ya naꞌa nuu Ndioxi. Xaꞌa ya ikán kua ta̱xi ra inka ya ndee ni ndáa yaꞌvi ndaꞌa yo, ta tixin ya ikán kua vaꞌa kuyati yo nuu Ndioxi vitin.

San Juan 14:13

Ta ndiꞌi ya ndúku ndo nuu Iva i Ndioxi xiꞌin kivi i, ta xaa súvi i ya xiꞌin ndo. Xaꞌa ya ikan i xiꞌin ndo kua ndikunuu vaꞌa ni ya toꞌo Iva i Ndioxi tixin yeꞌe kúu Seꞌe ra.

HEBREOS 5:7

Kivi ndi̱xiyo Cristo ñuu ivi yóꞌo̱ ta ndee ni xa̱ku ndaꞌvi ra nuu Ndioxi, káꞌan ndaꞌvi ra xiꞌin Ndioxi, saa chi xíni ra iindaa mií Ndioxi ku ra kúu mií ndee ya sikaku ñaꞌa ra, ya ná ndöo ra ndikaa ra ndaꞌa ndìì ya xáꞌni naꞌa. Ta xaꞌa ya xa̱a súvi ni ra ya ndi̱kaꞌan Ndioxi xiꞌin ra, saa ndaꞌvi ni ndo̱ꞌo ra nuu Ndioxi, xaꞌa ya ikán kua xi̱ni soꞌo Ndioxi ya ndi̱kaꞌan ra xiꞌin ra.

HEBREOS 13:15

Ta vitin, xaꞌa ya íyo Jesucristo nima yo kua ná xaa kaꞌnu ni yo Ndioxi ndiꞌi saa kivi, chi tá íkan yo saa ta tá íin ñaꞌa ya sóko yo nuu Ndioxi saa íin ya vaꞌa kána koo yuꞌu yo káꞌan yo, yakan kua ná xaa kaꞌnu yo Iva yo Ndioxi.

HEBREOS 7:16

Ta ra ikán ku Tata yo Jesucristo, ta köo ndi̱nduu ra sutu tá kuꞌva káꞌan ley xaꞌa nda sutu, sundi ndu̱u ra sutu xaꞌa ya ndee ni ndee kúu mií ra ya kutaku ra ndiꞌi saa kivi, chi nda iin ichí ndïꞌi xaꞌa ra.

HEBREOS 2:18

Tá kúu mií ra, yaꞌa ni ndee xi̱ndikaa ra nuu tindoꞌo, ndi̱xiyo ni ñaꞌa xi̱to ndoso ya ra, yakan vaꞌa kúndaa ini ra ya ndóꞌo yo tá kivi ñúꞌu yo nuu tindoꞌo, chi ndee ni ndee kúu mií ra ya chindee ra yoo, tá vaxi ya väꞌa xíto ndoso ya yoo.

Filipenses 3:21

Ta ndinama ra ikin kuñu yo ya vita ni kúu mií yo, saa nduu ya tá káa ikin kuñu mií ra, ya luvi ni. Ta xiꞌin ndee kúu mií ra ya xáꞌnda chiñu ra nuu ndiꞌi ñaꞌa kua ndisama ra yoo.

San Juan 14:16

Ta yeꞌe nduku i ya mani nuu Iva i, ya ná tiꞌvi ra Tachi ra koo ya xiꞌin ndo Sindiko ya ini ndo, ta koo ya xiꞌin ndo ndiꞌi saa ichí.

2 Timoteo 1:12

Xaꞌa ya káꞌan ndoso i tuꞌun vaꞌa xaꞌa ra kua ndóꞌo ni i vitin. Sundi köo kúkaꞌán nuu i xaꞌa ya ndóꞌo i. Chi yeꞌe, ta xa kúndaa teꞌe ini i unku ra ndáa ni ini i xíni i, ta ndee ni ndee kúu mií ra ya chindee ra yeꞌe ya xaa súvi i ndiꞌi chiñu ya ta̱xi ra ndaꞌa i xaa súvi i.

HEBREOS 7:24

Sundi Jesús ta sutu ra táku ndiꞌi saa tiempo ku ra, yakan nda iin ichí ndïꞌi xaꞌa chiñu ra ya kúu ra sutu.

Efesios 3:12

Xaꞌa ya ndáa ni ini yo xíni yo Tata yo Jesucristo kua vaꞌa ndi̱niꞌi yo ichí kuyati yo nuu Ndioxi kaꞌan yo xiꞌin ra xiꞌin ndinuꞌu nima yo.

HEBREOS 7:8

Ta vaꞌa ná koto yo, ndiꞌi nda sutu nda kúu seꞌe sikua ra Leví, ta nda ivi taꞌan mií yo ku ndiꞌi nda, chi ndiꞌi nda ikán ta xíꞌi nda tá kuꞌva xíꞌi yoo, ni kuꞌva saa ndi̱xiyo nda ta ndi̱kuiso nda iin iin ñaꞌa tixin ya uxi ya kíꞌin na ñuu nda xáa chiñu na. Sundi ra Melquisedec, ta káꞌan tuꞌun Ndioxi xaꞌa ra ya táku ra íyo ra nda vitin.

ROMANOS 5:10

Chi yachi tá íin yo ka̱nitaꞌan xiꞌin Ndioxi saa ndi̱xiyo yo, xaꞌa ya köo ndi̱xaa súvi yo ya káꞌan ra xiꞌin yo. Vani saa i̱kan yo, ta saa ni si̱kitaꞌan mani ra yoo xiꞌin mií ra, xaꞌa ya ti̱ꞌvi ra Seꞌe ra Jesucristo ki̱xi ra ndi̱xiꞌi ra xaꞌa yo. Ta ndisaa ka ví vitin sikaku ra yoo, chi xa ndi̱kitaꞌan mani yo xiꞌin ra.

1 Corintios 1:21

Xaꞌa ya ndíchi ni xi̱ní mií na ñuu ivi yóꞌó túvi na, yakan kua köo ndi̱xiin na kandixa na Ndioxi. Xaꞌa ya ikán kua vaꞌa ka si̱kaku Ndioxi naꞌa, na kándixa tuꞌun ya ndi̱tuꞌun nde xaꞌa Jesucristo xiꞌin na. Vani kuaꞌa ni naꞌa ndíkani ini xaꞌa tuꞌun ya ndi̱kaꞌan nde xiꞌin na, tuꞌun kíꞌvi va kua túvi na.

HEBREOS 2:9

Sundi xíto yo ya nda̱sa ni̱nu̱ Ndioxi Jesús uvi ndaa kivi nuu na tatun ra. Ta vitin ndi̱niꞌi ni ra ya vaꞌa ndi̱kunuu sunkun ni ya toꞌo ra, xaꞌa ya ndo̱ꞌo ni ra ndi̱xiꞌi ra, chi kúꞌvi ni ini Ndioxi xíni ra yoo yakan ta̱xi ra ndi̱xiꞌi Jesús xaꞌa ya vaꞌa ndiꞌi yo.