HEBREOS 6:11 - Xochapa Mixteco

¹¹ Yakan kua kúni nde ná chikaa ni iin iin ndo ndee kundikun ni ndo ichí Ndioxi nda kivi sindiꞌi. Saa chi kivi ikán kua niꞌi ndo ya ndátun ndo niꞌi ndo nuu ra.

HEBREOS 6:11 Referans Kwoze

HEBREOS 3:6

Sundi Jesucristo, xaꞌa ya kúu ra Seꞌe Ndioxi ta xáa súvi ni ra chiñu ya ta̱xi Ndioxi ndaꞌa ra, yakan xáꞌnda chiñu ra veꞌe ra. Saa yoo, ta na veꞌe Ndioxi ku yo, yoo ku yo xáꞌnda chiñu ra nuu, tá tu ndinuꞌu ni ini yo ndáa ni ini yo xíni yo Ndioxi, saa kúsini ni yo ndátun yo niꞌi yo ya taxi Ndioxi ndaꞌa yo.

2 Pedro 1:10

Yakan ndóꞌo̱, ta xíniñuꞌu ndo tuun ni kundikun ndo ichí Tata yo Jesucristo nuu ndínaꞌa ndo mií ndo, ya ka̱na ra ndóꞌo̱ saa ndi̱kaxin ra ndóꞌo̱ ya kundikun ndo ra. Tá ná ikan ndo saa ta nda iin kivi köyo ndo nuu kuachi ya ikan ndo ya väꞌa.

HEBREOS 3:14

Ta ya ndixa kua táxi Cristo ndiꞌi ya kúu mií ra ndaꞌa yo, tá tu köo síndoo yo ya tuun ni ndíkun yo ra, tá tu ndáa ni ini yo xíni yo ra tá kuꞌva ndi̱xiyo yo xiꞌin ra nda tá xaꞌa, tá sikan xa̱á yo ndikun yo ra.

HEBREOS 10:22

Xaꞌa ya ikán kua ná kuyati yo nuu Ndioxi xiꞌin ndinuꞌu nima yo, ta saa ndinuꞌu ni ini yo ná kundaa ni ini yo kuni yo ra, saa chi xa ndi̱kata ra nima yo xaꞌa ndiꞌi ya väꞌa, ta saa ndi̱kata ra ikin kuñu yo xiꞌin tikuii nduta vaꞌa ni.

El Apocalipsis 2:26

Ndiꞌi naꞌa, na kúndee nuu ya väꞌa, xaꞌa ya ndíkun na yeꞌe, ta xáa súvi na ya kúni i ndiꞌi saa kivi. Na ñaa ku na taxi i ichí ndaꞌa ya kaꞌnda chiñu na nuu ndiꞌi naꞌa, na ndóo ndiꞌi ni kúu xaꞌa ñuu ivi yóꞌó.

1 Juan 3:14

Saa chi yoo ta xaꞌa ya kúꞌvi ini yo xíni taꞌan yo yakan kúndaa ini yo tá íin yo xa ndíi ndi̱xiyo yo ta ndi̱taku yo. Chi na köo kúꞌvi ini xíni taꞌan tá íin na ndíi saa íin na nuu Ndioxi.

2 Pedro 3:14

Xaꞌa ya ñaa kua, nani ndátun yo kuu saa, ñani mani, ta yáꞌa ni vi kuenta koo ndo xiꞌin mií ndo, täxi ndo kuyakua ndo xiꞌin kuachi, vií ni koo ndo xiꞌin Ndioxi.

1 Pedro 1:21

Xaꞌa ya vaꞌa i̱kan Tata yo Jesucristo kua xa̱á ndo kándixa ni ndo Iva yo Ndioxi, ra si̱taku Tata yo Jesucristo tañu na ndíi, saa ta̱xi ni Ndioxi ya toꞌo ndaꞌa ra. Yakan kua ndátun ni ndo, saa ndáa ni ini ndo ya xaa súvi ndiꞌi ra ya ndi̱kaꞌan ra xiꞌin ndo taxi ra ndaꞌa ndo.

2 Tesalonicenses 3:13

Ta saa ndóꞌo̱, ñani yo xiꞌin kuꞌva yo, káꞌan nde xiꞌin ndo ya ná künaa ndo íkan ndo ya vaꞌa ndiꞌi saa kivi.

ROMANOS 15:13

Ta vitin káꞌan i xiꞌin mií Ndioxi ra chíkaa ndee ini ndo ya kundatun ndo ya vaꞌa ikan ra xiꞌin ndo. Ná taxi ni ra ya kúsini ni ndo, saa ná koo vaꞌa ni ini ndo. Ta saa ná ndundee ni ka ya kándixa ndo ya ndátun ndo niꞌi ndo tixin ndee Tachi I̱í ra.

1 Tesalonicenses 4:10

Ya ndixa kua kúꞌvi ni ini ndo xíni ndo ndiꞌi na taꞌan yo, na ndóo ndiꞌi ñuu ya ñúꞌu estado Macedonia. Saa xíkan ni nde ya mani nuu ndo kuꞌvi ni ka ini ndo kuni taꞌan ndo iin iin ichí.

1 Tesalonicenses 1:5

Chi tá kivi ndi̱kaꞌan ndoso nde tuꞌun vaꞌa xaꞌa ra xiꞌin ndo, ta köo ndi̱kaꞌan nde tuꞌun mií nde xiꞌin ndo. Sundi xiꞌin ndee Tachi I̱í Ndioxi kua ndi̱kaꞌan nde xiꞌin ndo, saa ndinuꞌu ni ini nde kándixa nde ya ndaa kua ndi̱kaꞌan nde xiꞌin ndo. Ta xi̱ni mií ndo ndá kuꞌva ndi̱xiyo nde tá kivi xi̱ndoo nde xiꞌin ndo xaꞌa ya kúꞌvi ni ini nde xíni nde ndóꞌo̱.

Colosenses 1:5

Íkan ndo saa ndáa ni ini ndo Ndioxi, saa kúꞌvi ni ini ndo xíni ndo ra chi ku̱ndaa teꞌe ini ndo ya niꞌi ndo ñaꞌa nuu ra, ya chi̱vaꞌa ra xaꞌa ndo nuu ndivi. Chi xa ku̱ndaa teꞌe ni ini ndo tá xi̱ni soꞌo ndo tuꞌun vaꞌa ya ndaa ni xaꞌa Tata yo Jesucristo.

Filipenses 3:15

Ta kuꞌva saa ná ndikani ini ndiꞌi yo xa xa̱ꞌnu tuꞌun Ndioxi nima. Tá ndá tu ndóꞌo̱ köo ndíkani ini kuꞌva saa, ta xa síin ndíkani ini ndo, ta mií Ndioxi ku ra sinaꞌa ndóꞌo̱ ndá kuꞌva ndikani ini ndo.

Gálatas 6:9

Ta ná künaa yo ya chíꞌi yo ya vaꞌa, ná xaꞌa ni yo ndee ikan yo saa ndiꞌi kivi, saa tá ti̱ndaa tiempo ta niꞌi ni yo ya vaꞌa xaꞌa ya íkan yo saa.

1 Corintios 15:58

Ñani mani, xaꞌa ya ñaa kua xíniñuꞌu ndo ndee ni ndee kundikun ndo ichí Ndioxi, xaꞌa ni ndo ndee ta ndïko koo ini ndo ya íkan ndo saa, iin tuun saa chikaa ini ndo xaa chiñu ni ndo xaꞌa Tata yo, saa chi chiñu íkan ndo nuu ra, ta süvi ya uun ku ya.

1 Corintios 13:13

Tá kuꞌva káꞌan i saa íyo va ya, sundi uni nuu ya yóꞌó ku mií ya ndïꞌi xaꞌa: ya ndee ni ndáa ini yo xíni yo Ndioxi, xiꞌin ya kándixa yo ya sixinu Ndioxi ya ndi̱kaꞌan ra taxi ra ndaꞌa yo, saa tu ya kúꞌvi ni ini ta̱xi ra ndaꞌa yo. Sundi ya ndee ni ka ndee ndáa yaꞌvi nuu uni ya yóꞌó kúu ya, kúꞌvi ni ini ta̱xi Ndioxi ndaꞌa yo kuꞌvi ini yo kuni yo inka naꞌa.

San Mateo 24:13

Sundi ndiꞌi na köo ndiko koo ini xaꞌa ya kuaꞌan na ichí i, na ikán ku na kaku.

1 Juan 3:19

Ta xaꞌa ya kúꞌvi ini yo xíni taꞌan yo kua ndínaꞌa yo mií yo ya kúu yo kuenta ya ndaa, ta ndikundee ini yo xiꞌin ndee ya táxi Ndioxi ndaꞌa yo.

Colosenses 2:2

Saa ná taxi ni Ndioxi ndee ndaꞌa ndo ya xaꞌa ni ndo ndee xiꞌin taꞌan ndo xaꞌa ya kúꞌvi ni ini ndo xínitaꞌan ndo. Xaꞌa ya ñaa kua ndítuꞌun ni i xiꞌin ndo, ndíkani i nuu ndo chi kúꞌvi ni ini i xíni i ndóꞌo̱. Ta vaꞌa ná taxi ra ndukuika ni ndo xiꞌin ya ndíchi ni chi̱tuni Ndioxi ndi̱xiyo sěꞌe yachi, chi ya ndi̱xiyo sěꞌe ikán ku mií Tata yo Jesucristo.

Colosenses 1:23

Saa nduu ndo tá tu tuun ni kándixa ndo tuꞌun vaꞌa xaꞌa Tata yo Jesucristo tá tu ná sïndikoo ndo tuꞌun ra ya ndee ni teꞌe xi̱ni soꞌo ndo. Ta xa ndiꞌi ni kúu xaꞌa ñuu ivi xi̱ni soꞌo na xaꞌa tuꞌun ra, taꞌan ya ikán kua káꞌan ndoso yeꞌe Pablo.

ROMANOS 12:8

Ta sava tuku yo ndi̱niꞌi taꞌvi xaꞌa yo ndee xiꞌin naꞌa, ta kuꞌva saa ná ikan yo xiꞌin na. Tá sava tuku yo ndi̱niꞌi taꞌvi ya siniꞌi yo ñaꞌa nuu inka na, ta kuꞌva saa ná ikan yo xiꞌin na, ná ikan yo ya xiꞌin ndinuꞌu nima yo. Tá sava tu yo ndi̱niꞌi taꞌvi ya kunuu yo nuu naꞌa, ta kuꞌva saa ná ikan yo xiꞌin na, ndinuꞌu ini yo ná ikan yo saa. Tá sava tuku yo ndi̱niꞌi taꞌvi ya kundaꞌvi ni ini yo kuni yo naꞌa, ta kuꞌva saa ná kundaꞌvi ni ini yo ikan yo saa xiꞌin na ta ná kusini ni yo.

Gálatas 5:5

Sundi ndeꞌe ta tixin Tachi I̱í ra kua kúndaa teꞌe ini nde ya ndikuiso Ndioxi ndeꞌe nuu ra, nduu nde tá íin naꞌa, na köo ka kuachi kúu mií nuu ra, xaꞌa ya ndáa ni ini nde xíni nde Jesucristo.

San Lucas 1:1

Tata Teófilo, xa kuaꞌa ni va naꞌa ku̱ni ta̱a ikun ndiꞌi ya ndee ni ndaa i̱kan Tata yo Jesús tañu yo.