HEBREOS 4:14 - Xochapa Mixteco

¹⁴ Jesús, ra kúu Seꞌe Ndioxi ku iin sutu ra ndee ni chee, ra ndee ni kaꞌnu nuu yo. Ta ra ikán ku ra nda̱a nuu ndivi, yakan tuun ni ná kandixa yo ra, ta ná xïkuiin yo ya ndáa ini yo ra.

HEBREOS 4:14 Referans Kwoze

HEBREOS 9:24

Saa chi veꞌe ñuꞌu nuu ndee ni I̱í ndi̱kiꞌvi Jesucristo, ta süvi na ñuu ivi yóꞌó ku na ndi̱sikuaꞌa ya. Chi ya si̱kuaꞌa na ivi yóꞌó, ta tá káa copia mií veꞌe ñuꞌu ya ndee ni vaꞌa íyo mií nuu ndivi saa káa ya si̱kuaꞌa na. Ta ikán ku nuu ndi̱kiꞌvi Jesucristo ini veꞌe ñuꞌu ya ndee ni vaꞌa ikán, káꞌan ndaꞌvi ra xaꞌa yo xiꞌin Ndioxi, ya ná xaa kaꞌnu ini ra xaꞌa yo.

HEBREOS 12:2

Ta iindaa mituꞌun xaꞌa Tata yo Jesucristo kua ná kundiꞌi ni ini yo, saa chi mií ra ku ra sínaꞌa yoo ndá kuꞌva kua kundaa ni ini yo kuni yo Ndioxi, saa tu iindaa mituꞌun mií ra ku ra chíndee yoo, ndása vaꞌa ra kuꞌva ndáa ni ini yo xíni yo Ndioxi. Ta saa ndi̱xaꞌa ndee ndiꞌi ini ra ndoꞌo ni ra nuu cruzin, ta köo ndi̱kiꞌin ra kuenta xaꞌa ya kúkaꞌan nuu ra, chi kúndaa ini ra tá si̱ndiꞌi ndo̱ꞌo ra saa ta kusini ni ra. Ta vitin ndi̱kunduꞌu ra ñaꞌñu kuáꞌá Ndioxi xáꞌnda chiñu ra xiꞌin Ndioxi.

HEBREOS 10:23

Ta vitin tuun ni ná kundikun yo ra xaꞌa ya ndáa ni ini yo xiní yo ra, ta ná käka uvi ini yo nuu naꞌa xaꞌa ya ndíkun yo ra, saa chi Ndioxi ta síxinu ndiꞌi ra ya xa ki̱ndoo ra xiꞌin yo.

HEBREOS 9:12

Ta Jesucristo ndi̱kiꞌvi ra ini veꞌe ñuꞌu ikán nuu ndíkaa Cuarto ya ndee ni I̱í, ta köo ndi̱kiꞌvi ra xiꞌin nií tixuꞌu ni xiꞌin nií kiti cerra vali. Sundi xiꞌin nií mií ra kua ndi̱kiꞌvi ra. Ta iindaa mituꞌun ichí kua i̱kan ra saa, ta ya i̱kan ra saa ta ndáa yaꞌvi ni ya, chi ikán ku nuu sa̱ña ra yoo, ndi̱saña ndika yo kuaꞌan yo ndiꞌi saa tiempo, ta nda iin ka ichí küñuꞌu yo ndaꞌa ndee ya väꞌa.

HEBREOS 6:20

Chi Jesús ta xa ndi̱kiꞌvi ra, yakan vaꞌa ku̱chiñu ra xu̱na ra ichí nuu yo ya kuchiñu yo kiꞌvi yo koo yo xiꞌin Ndioxi. Ta nda iin ichí ndïꞌi xaꞌa chiñu kúu mií ra, ndiꞌi saa ichí kuu mií ra sutu, ra chee ni nuu yo, tá kuꞌva ndi̱xiyo sutu ra Melquisedec, saa íyo ra.

Efesios 4:10

Yakan ta nu̱u̱ ra ta saa nda̱a tuku ra nda ni̱nù nuu ndee ni sukun, ya kuchiñu sikutu ndiꞌi ra ndee kúu mií ra.

ROMANOS 8:34

Ta ¿án ndá naꞌa káꞌan xaꞌa yo kuvi yo xaꞌa kuachi yo? Nda iin naꞌa küchiñu ikan saa xiꞌin yo, chi Jesucristo ku ra xa ndi̱xiꞌi xaꞌa kuachi yo, ta ndi̱taku ra, ta vitin íyo ra ñaꞌñu kuáꞌá Ndioxi, ta íyo ra xáku ndaꞌvi ra xaꞌa yo.

HEBREOS 3:14

Ta ya ndixa kua táxi Cristo ndiꞌi ya kúu mií ra ndaꞌa yo, tá tu köo síndoo yo ya tuun ni ndíkun yo ra, tá tu ndáa ni ini yo xíni yo ra tá kuꞌva ndi̱xiyo yo xiꞌin ra nda tá xaꞌa, tá sikan xa̱á yo ndikun yo ra.

HEBREOS 2:17

Xaꞌa ya ndu̱u ra iin káchi tá kuꞌva íin mií yo na ivi yóꞌó, na kúu ñani ra. Xaꞌa ya ikán kua vaꞌa ndi̱xinu ra ndu̱u ra sutu, ra ndee ni ndinuꞌu xáa súvi ndiꞌi ñaꞌa, ta saa kúndaꞌvi ni ini ra xíni ra naꞌa. Xaꞌa ya ndi̱taxi ra mií ra ndi̱xiꞌi ra, yakan vaꞌa ku̱chiñu ra ndi̱soko ra mií ra nuu Ndioxi ya xaa kaꞌnu ini ra xaꞌa kuachi yoo, na kúu ñuu Ndioxi.

HEBREOS 10:12

Sundi Jesucristo ta iin ichí va i̱kan ra saa, iin ichí va ndi̱taxi ra mií ra xaꞌa kuachi yo, ta ya i̱kan ra saa ta köo xíniñuꞌu ra ikán tuku ra saa. Tá sindiꞌi i̱kan ra saa ta ndi̱kunduꞌu ra ñaꞌñu kuáꞌá Ndioxi xáꞌnda chiñu ra xiꞌin Ndioxi.

HEBREOS 8:1

Ta ya káꞌan i xiꞌin ndo yóꞌó kua ndee ni ndee xíniñuꞌu ndo kundaa ini ndo: Jesucristo ku ra ku sutu chee, kaꞌnu ni ra nuu yo, ta nda̱a ra ndi̱kunduꞌu ra ñaꞌñu kuáꞌá Ndioxi nuu íyo tai kaꞌnu itun toꞌo xáꞌnda chiñu ra xiꞌin Ndioxi.

Los Hechos 1:11

Saa xa̱á nda káꞌan nda, káchi nda saa: ―Ndóꞌo̱ na ñuu estado Galilea, ¿ndachu kua xíto ni ndo nuu ndivi ndíta ndo? Suvi Jesús, ra xi̱ni ndo nda̱a kuaꞌan nuu ndivi, suvi ra ñaa ku ra ndiko koo tuku, tá kuꞌva nda̱a ra kuaꞌan ra, saa kuu ndiko koo ra ―káchi nda ikán xiꞌin nda apóstol.

HEBREOS 1:8

Sundi xaꞌa Seꞌe ra, káchi ra saa: Yóꞌo̱ ku Ndioxi ta ndiꞌi saa ichí kaꞌnda chiñu un nuu na ñuu ivi yóꞌó, nda iin ichí ndïꞌi xaꞌa chiñu ya kúu mií un, ta ndǎku ni kaꞌnda chiñu un.

Los Hechos 3:21

Sundi vitin ta xíniñuꞌu Jesús koo ra nuu ndivi nda kivi ná xaa vií Ndioxi ñuu ivi yóꞌó. Nduxaa ya kindoo vaꞌa ndiꞌi ñaꞌa. Nduu ya tá ndi̱xiyo ya núnu̱ú tá täꞌan kiꞌvi kuachi ñuu ivi yóꞌó. Tá íyo ya ndi̱kaꞌan Ndioxi tixin ndiꞌi nda i̱í, nda ndi̱kaꞌan ndoso tuꞌun yuꞌu ra xinaꞌa, saa koo ya ikan ra.

San Lucas 24:51

Tá chíkaa ra ya vaꞌa na, ta saa nda̱niꞌi Ndioxi ra nda̱a ra kuaꞌan ra nuu ndivi.

San Marcos 16:19

Tá sindiꞌi Tata yo Jesús ndi̱kaꞌan ra xiꞌin nda, saa ndi̱ko koo ra kuaꞌan ra nuu ndivi i̱kan Ndioxi, ta ndi̱kunduꞌu ra ñaꞌñu kuáꞌá Ndioxi.

HEBREOS 2:1

Xaꞌa ya yóꞌó kua xíniñuꞌu yo chikaa ni soꞌo yo xaꞌa tuꞌun Ndioxi ya xi̱ni soꞌo yo ya ná sïndoo yo ichí ra, ta ná kandixa ni ka yo ra.

San Marcos 1:1

Soꞌva kua ku̱u tá ndi̱tuvi tuꞌun vaꞌa xaꞌa Tata yo Jesucristo, ra kúu Seꞌe Ndioxi ra ti̱ꞌvi Ndioxi vaxi sikaku na ñuu ivi.

San Mateo 4:3

Saa ndi̱xaa kiti nǎꞌa xíto ndoso ñaꞌa ri, káchi ri saa: ―Tá tu ndixa Seꞌe Ndioxi ku yóꞌo̱, ta vaꞌa kaꞌan un xiꞌin yu̱ú yóꞌó ná nduu ya xita vaꞌa ―káchi ri xiꞌin ra.

2 Corintios 9:13

Ndúkuaꞌa naꞌa taxi tixaꞌvi ndaꞌa Ndioxi, chi kíꞌin na kuenta ya xáa súvi ndo tuꞌun vaꞌa xaꞌa Tata yo Jesucristo ya káꞌan ndoso ndo. Ta saa ndúkuaꞌa ni naꞌa táxi tixaꞌvi ndaꞌa ra xaꞌa ya ndee ni vaꞌa chíndee ndo na taꞌan ndo, ta saa chíndee tu ndo ndiꞌi va naꞌa.

2 Corintios 12:2

Ta xa íyo uxi kumi kuiya ku ya ndi̱xaꞌan i nuu ndivi, nda nuu ndivi ya uni kua ndi̱xaꞌan i. Ta köo xíni i ndá kuꞌva kua ndi̱xaꞌan i, án xiꞌin ikin kuñu i kua ndi̱xaꞌan i, án xiꞌin nima i kua ndi̱xaꞌan i, köo xíni i, iindaa mií Ndioxi ku ra xíni.

HEBREOS 3:1

Ñani yo xiꞌin kuꞌva yo, ndóꞌo̱ ku ndo ndi̱kaxin Ndioxi, saa ka̱na ra ndóꞌo̱ ta xa̱a i̱í ra ndóꞌo̱ koo ndo xiꞌin ra. Yakan kiꞌin ni ndo kuenta, chi suvi mií Jesús ku ra ku apóstol, ra ti̱ꞌvi Ndioxi vaxi xaa chiñu ra nuu ra, ta kúu tu ra sutu ra chee ni nuu ndiꞌi yo kándixa ñaꞌa.

HEBREOS 6:6

Xaꞌa ya íkan kua küvi ka ndiko koo tuku ini na, chi tá ná ikan tuku na saa, ta tá íin na xáꞌni tuku Seꞌe Ndioxi nuu cruzin va saa íin na, chi kúsiki ndaa na ra nuu ndiꞌi naꞌa.

HEBREOS 7:3

Ta tuꞌun Ndioxi köo káꞌan ya xaꞌa iva ra Melquisedec, ni xaꞌa siꞌí ra, ni xaꞌa na veꞌe ra köo káꞌan ya, ni kivi ka̱ku ra, ni kivi ndi̱xiꞌi ra köo xíni yo xaꞌa. Ta xaꞌa ya yóꞌó kua kúndaa ini yo ya kúu ra sutu tá kuꞌva íyo Seꞌe Ndioxi, chi Seꞌe Ndioxi ta ndiꞌi saa ichí, ndiꞌi saa kivi kúu ra sutu.

HEBREOS 10:29

Ta ndisaa ka vi ndee ni ndee kundoꞌo naꞌa, na kóso kava Tata yo Jesucristo, ra kúu Seꞌe Ndioxi, chi köo kíꞌin na kuenta xaꞌa nií ra, nda tá káa rá väꞌa saa káa ra nuu na, saa íkan naꞌa, na kúndasi nuu xíni Tachi I̱í Ndioxi, ra kúꞌvi ni ini xíni ñaꞌa, chi suvi xiꞌin nií Tata yo Jesucristo kua ki̱ndoo ra trato ya ikan ra ya vaꞌa xiꞌin yo.

1 Pedro 3:22

Ta nda̱a ra kuaꞌan ra nuu ndivi, índuꞌu ra ñaꞌñu kuáꞌá Ndioxi. Ta mií ra ku ra xáꞌnda chiñu nuu na tatun Ndioxi, saa xáꞌnda chiñu ra nuu ndiꞌi ndee ya íyo nuu ndivi tin ya íyo nuu ñuꞌú yóꞌó.