HEBREOS 2:14 - Xochapa Mixteco

¹⁴ Tá kúu seꞌe na iva siꞌí, iin nuu ku ikin kuñu ndiꞌi na ta iin nuu kuu tu nií va na. Ta saa xi̱niñuꞌu Tata yo Jesús ndu̱u ra, ra ivi taꞌan mií yo, ndi̱xiyo ikin kuñu ra ta ku̱u mií ra nií taꞌan yoo, saa ndi̱xiꞌi ra xaꞌa ya ikán kua ku̱chiñu ra si̱ndiꞌi xaꞌa ra ndee kiti nǎꞌa ya xáꞌni ndìì.

HEBREOS 2:14 Referans Kwoze

2 Timoteo 1:10

Ta vitin si̱naꞌa Ndioxi yoo ya kúꞌvi ni ini ra xíni ra yoo xaꞌa ya ti̱ꞌvi ra Seꞌe ra Jesucristo ki̱xi ra sikaku ra yoo. Ta si̱ndiꞌi xaꞌa ra ndee ya xáꞌni naꞌa, saa ta̱va túvi ra tuꞌun vaꞌa xaꞌa mií ra ya kuchiñu yo kutaku yo vitin tin ndiꞌi saa kivi ya vaxi.

ROMANOS 8:3

Ndioxi i̱kan ra ya vaꞌa xiꞌin yo, ñaꞌa ya köo ndi̱kuchiñu ley ya ta̱a ra Moisés ikan ya xiꞌin yo xaꞌa ya köo ndee kúu mií ikin kuñu yo nuu ya väꞌa. Xaꞌa ya ikán kua ti̱ꞌvi ra Seꞌe ra ki̱xi ra ñuu ivi yóꞌó, ta ndi̱xiyo ikin kuñu ra tá kuꞌva íin mií yo ivi yóꞌó. Ti̱ꞌvi Ndioxi ra ki̱xi ra ndi̱soko ra mií ra xaꞌa kuachi yo, ta saa ku̱chiñu ra si̱ndiꞌi xaꞌa ra ndee ya kúu mií kuachi yo nuu Ndioxi.

Colosenses 2:15

Ta xaꞌa ya ndi̱xiꞌi Tata yo Jesucristo nuu cruzin kua ku̱chiñu ra si̱ndiꞌi xaꞌa ra ndiꞌi nuu ndee ya xáꞌnda chiñu ñuu ivi yóꞌó. Ta nuu ndiꞌi ni kúu naꞌa ki̱ndaa ra ndee ikán ndaꞌa ndiꞌi tachi nduvaꞌa. Tá ndóꞌo naꞌa tá kuaꞌan na veꞌe kàà, núꞌni na kuaꞌan na xiꞌin ya nduxa. Ta saa i̱kan ra xiꞌin ndiꞌi ndee ikán, si̱ndiꞌi xaꞌa ndiꞌi ra ya.

San Juan 1:14

Ta Tuꞌun Ndioxi ikán, ndu̱u ya iin taa, tá íin mií yo saa ndu̱u ra, ta ndi̱xika ra xiꞌin nde ñuu ivi yóꞌó. Ta xi̱ni nde ya vaꞌa luvi ni kúu mií ra. Ta mií ya luvi ni kúu mií Ndioxi kua kúu mií ra, chi iindaa mií ra ku Seꞌe Ndioxi. Iin chútu ndaa ya vaꞌa, ya ndaa ini ra.

HEBREOS 9:15

Xaꞌa ya yóꞌó kua ndi̱xiꞌi Jesucristo xaꞌa yo, ta si̱kitaꞌan mani ra yoo ivi yóꞌó xiꞌin Ndioxi, nuu ki̱ndoo ra iin trato ya vaꞌa ni, ya xa̱á xiꞌin yo, ta ikán ku nuu ndo̱o kuachi yo ya i̱kan yo tixin trato ya yata ki̱ndoo Ndioxi xiꞌin yo tá núnu̱ú. Ta vitin kuchiñu niꞌi ndiꞌi yo ya vaꞌa ki̱ndoo Ndioxi taxi ra ndaꞌa yo ka̱na ra kundikun ñaꞌa.

1 Corintios 15:50

Vaꞌa ná kundaa ini ndo ñani yo: Chi nda iin yo ta küchiñu yo koo yo xiꞌin Ndioxi nuu xáꞌnda chiñu ra, tá ná kuu mií yo ikin kuñu yo taꞌan ya kúu mií yo táku yo ñuu ivi yóꞌó vitin. Chi ñaꞌa ya táꞌi ta küchiñu ya koo ya xiꞌin ñaꞌa ya nda loꞌo köo táꞌi.

El Apocalipsis 1:18

Yeꞌe ra táku, ra ndi̱xiꞌi ta ndi̱taku i, saa kutaku i ndiꞌi ni kúu kivi ya vaxi. Ta yeꞌe ku i xáꞌnda chiñu nuu ya xáꞌni ndìì án ya náni Hades nuu xáꞌnda chiñu ndee yóꞌó.

ROMANOS 14:9

Jesucristo ku ra ndi̱xiꞌi ta ndi̱taku ra, xaꞌa ya ikán kua ndu̱u ra, Ra Chee, Ra Xáꞌnda chiñu nuu ndiꞌi naꞌa, na táku xiꞌin na ndíi.

HEBREOS 2:18

Tá kúu mií ra, yaꞌa ni ndee xi̱ndikaa ra nuu tindoꞌo, ndi̱xiyo ni ñaꞌa xi̱to ndoso ya ra, yakan vaꞌa kúndaa ini ra ya ndóꞌo yo tá kivi ñúꞌu yo nuu tindoꞌo, chi ndee ni ndee kúu mií ra ya chindee ra yoo, tá vaxi ya väꞌa xíto ndoso ya yoo.

El Apocalipsis 2:10

Ta ndóꞌo̱ ku ïꞌvi ndo nuu tindoꞌo ya uꞌvi ni vaxi nuu ndo. Saa chi íyo naꞌa, na kúni xaa súvi ya kúni kiti nǎꞌa án kiti Timiaꞌa, kiti Satanás. Tiin na sava ndóꞌo̱ taan na veꞌe kàà, nuu koto ndoso na ndóꞌo̱ án ya ndixa kua kándixa ndo yeꞌe. Ta ndoꞌo ni ndo uxi kivi. Ta káꞌan ni i xiꞌin ndo ya ná síndikoo ndo ichí i, ndinuꞌu ni ini ndo kandixa ndo yeꞌe, nda kivi tá ná kuvi ndo. Saa ndikiꞌin ndo ya vaꞌa taxi i ndaꞌa ndo nuu kutaku ndo xiꞌin i ndiꞌi saa kivi ya vaxi.

HEBREOS 4:15

Saa chi sutu ra ínuu nuu yo ku ra ta kúndaꞌvi ni ini ra xíni ra yoo, xaꞌa ya xíni ra köo ndee ini yo, köo ndaku ini yo nuu ya väꞌa, chi tá káa níí ya ndóꞌo yoo, saa ndi̱xiyo tu ya ndo̱ꞌo mií va ra, xi̱to ndoso ni ya väꞌa ra, sundi nda iin kuachi köo ndi̱kiꞌvi ra.

Gálatas 4:4

Sundi tá ndi̱xinu kivi ya chi̱tuni mií Ndioxi ti̱ꞌvi ra Seꞌe ra ki̱xi ra ñuu ivi yóꞌó, saa ka̱ku ra tixin iin ñaꞌa, ta xa̱a súvi ndiꞌi ra ya káꞌan ley ya ta̱a ra Moisés.

San Juan 12:24

Ya ndaa káꞌan i xiꞌin ndo iin ndikin trigo, ya köo chíꞌi na ta köo táꞌi ya, yakan köo ndúkuaꞌa ya, ndóo iindaa mií ya. Sundi tá ná chiꞌi na ya, taꞌi xeꞌe sata ya ta nduta ya, saa kua ndúkuaꞌa ni ka ya.

El Apocalipsis 20:2

Saa ti̱in tatun ikán kiti ko̱ó nǎꞌa, ri kúu ko̱ó yata. Ri ikán ku kiti nǎꞌa ri ínuu nuu ndiꞌi tachi nduvaꞌa, ta Satanás ku kivi ri ikán. Saa ka̱tun tatun ri xiꞌin cadena níꞌi ya, ya kunuꞌni ri iin mil kuiya.

El Apocalipsis 12:9

Ta tatun ya íyo xiꞌin Ndioxi ta̱va ya kiti koó nǎꞌa xiꞌin ndiꞌi tachi nduvaꞌa ya íyo xiꞌin ri. Ta̱va ya ri ki̱ꞌin ñaꞌa ya si̱koyo ya nda nuu ñuꞌú. Ta kiti ko̱ó nǎꞌa ikán ku ko̱ó yata ni, ta inka kivi ri kua Satanás án kiti Timiaꞌan. Ta suvi mií ri ku ri síndaꞌvi ndiꞌi ni kúu na ñuu ivi.

1 Timoteo 3:16

Ta saa ná kundaa ini ndo chi nda vitin ta ndee ni ndee ya ndaa si̱naꞌa Tata yo Jesucristo nuu yo kándixa ñaꞌa, ta soꞌva íyo ya: Tata yo Jesucristo ta ndu̱u ra taꞌan mií yo ivi yóꞌó, ta ki̱xi ra ñuu ivi yóꞌó. Ta Tachi I̱í Ndioxi kua ndíkuiin xaꞌa ra. Ta xi̱ni na tatun Ndioxi ra. Saa ndi̱kaꞌan ndoso nda xi̱ndikun sata ra xaꞌa ra nuu ndiꞌi naꞌa, na köo kúu judío. Ndiꞌi ni kúu xaꞌa ñuu ivi yóꞌó íyo naꞌa, na kándixa ra. Saa ndi̱kiꞌin tuku Iva yo Ndioxi ra, nda̱a tuku ra kuaꞌan ra nuu ndivi.

San Mateo 25:41

Sindiꞌi saa kaꞌan i xiꞌin naꞌa, na väꞌa, na ndóo ñaꞌñu ítín i, kachi i saa: “¡Kuátaꞌa ndo nuu i, ndóꞌo̱ ndi̱tavi chiꞌña ku ndo! Kuáꞌan ndo ndaya, nuu xíxi ñu̱ꞌu̱ ndiꞌi saa kivi ta köo ndáꞌva ya. Chi ikán ku nuu ndi̱kuaꞌa kuꞌun kiti nǎꞌa xiꞌin ndiꞌi tachi nduvaꞌa ndikun ñaꞌa.

San Mateo 16:17

Saa ndi̱kaꞌan Jesús xiꞌin ra: ―Ná kusini ni un Simón, seꞌe ra Jonás, saa chi süvi naꞌa, na ñuu ivi yóꞌó ku na ndítaxi ya xínituni un. Iva i Ndioxi, ra íyo nuu ndivi ni̱nù ku ra i̱kan saa xiꞌin un ―káchi Jesús xiꞌin ra.

1 Corintios 1:28

I̱kan Ndioxi saa xiꞌin ndo ndi̱kaxin ra ndóꞌo̱ na vita ini, ndóꞌo̱ köo ndáa yaꞌvi nuu na ñuu ivi yóꞌó. I̱kan ra saa xiꞌin ndóꞌo̱ ya ná kundaa ini na ya kúndasi ni nuu ra ndiꞌi ñaꞌa ya ndee ni ndáa yaꞌvi nuu mií na.

HEBREOS 2:17

Xaꞌa ya ndu̱u ra iin káchi tá kuꞌva íin mií yo na ivi yóꞌó, na kúu ñani ra. Xaꞌa ya ikán kua vaꞌa ndi̱xinu ra ndu̱u ra sutu, ra ndee ni ndinuꞌu xáa súvi ndiꞌi ñaꞌa, ta saa kúndaꞌvi ni ini ra xíni ra naꞌa. Xaꞌa ya ndi̱taxi ra mií ra ndi̱xiꞌi ra, yakan vaꞌa ku̱chiñu ra ndi̱soko ra mií ra nuu Ndioxi ya xaa kaꞌnu ini ra xaꞌa kuachi yoo, na kúu ñuu Ndioxi.

HEBREOS 10:5

Yakan kua ndi̱kaꞌan Jesucristo saa xiꞌin Ndioxi tá ki̱xi ra ñuu ivi yóꞌó, ka̱chi ra saa: “Köo kúni un kaꞌni na kiti soko na nií ri nuu un, ta ni ya soko na ndá ka ñaꞌa nuu un, köo kúni un. Sundi ta̱xi un ikin kuñu i ndaꞌa i ya nditaxi i mií i ndaꞌa un.

HEBREOS 10:10

Xaꞌa ya i̱kan Jesucristo ndi̱taxi ra mií ra ndi̱xiꞌi ra xaꞌa yo, ta xaꞌa ya ikán kua ndu̱u yo na ií, na vaꞌa nuu Ndioxi, saa chi Jesucristo ta xa̱a súvi ra ya kúni mií Ndioxi. Ta nda iin ichí köo xíniñuꞌu tuku ra ikan ra saa.

1 Pedro 1:20

Tá täꞌan ka xikoo xaꞌa ñuu ivi yóꞌó vi kua ndi̱kaꞌan Iva yo Ndioxi xaꞌa Tata yo Jesucristo ya kuvi ra xaꞌa kuachi yo ñuu ivi yóꞌó. Saa tá xa kuaꞌan kúyati kivi sindiꞌi saa kua ti̱ꞌvi Ndioxi Tata yo Jesucristo ki̱xi ra ñuu ivi yóꞌó xaꞌa ya vaꞌa yoo chi kúꞌvi ni ini ra xíni ra yoo.