HEBREOS 13:21 - Xochapa Mixteco

²¹ Xaꞌa ya ikán kua káꞌan ni i xiꞌin ra ya ná chindee taꞌan ni ra xiꞌin ndo ya kuchiñu ndo xaa súvi ndo ndiꞌi ya vaꞌa kúni mií ra. Ta saa xáku ndaꞌvi ni i nuu ra ya ná chindee ra ndeꞌe ikan nde ndisaa ya kúni mií ra tixin Tata yo Jesucristo. Saa ná kunuu sukun ni ya toꞌo Tata yo Jesucristo ndiꞌi saa ichí, ndiꞌi saa kivi. Saa ná koo ya.

HEBREOS 13:21 Referans Kwoze

Filipenses 2:13

Saa chi Ndioxi ku ra chíkaa ya vaꞌa ini ndo ya kuni ndo ikan ndo ya vaꞌa, ta suvi ra chíndee ndóꞌo̱ ya xaa súvi ndo ya kúni mií ra.

2 Tesalonicenses 2:17

Ta saa ná taxi ni ra ndee ndaꞌa ndo ya koo vaꞌa ni ini ndo ta ná kana vaꞌa ndiꞌi ya káꞌan ndo xiꞌin ya íkan ndo.

Filipenses 4:13

Ta kúchiñu i xáꞌa ndee ini i xiꞌi ndiꞌi ni kúu va ya, chi Cristo ku ra táxi ndee ndaꞌa i yáꞌa i nuu iin iin ya.

1 Pedro 2:5

Ta saa ndóꞌo̱ tá káa yu̱ú táku ikán saa íin ndo, chi yu̱ú ikán kua ndee ni xíniñuꞌu ra síkuaꞌa ra veꞌe ñuꞌu i̱í ya küvi kuni yo. Ta ndóꞌo̱ ku ndo xáa chiñu ini veꞌe ñuꞌu ikán chi tá íin sutu nda i̱í, saa íin ndo xáa chiñu ndo ini ya, ta tixin Jesucristo kua sóko ndo ya i̱í, ya vaꞌa nuu Ndioxi.

2 Timoteo 4:18

Ta mií Iva yo ku ra sikaku yeꞌe nuu ndiꞌi ñaꞌa väꞌa, saa kuniꞌi ra yeꞌe kuꞌun i xiꞌin ra nuu ndivi nuu xáꞌnda chiñu ra. ¡Saa ná kunuu sukun ni ya toꞌo ra, ndiꞌi saa kivi ya vaxi! Saa ná koo.

Filipenses 1:11

Saa kua ikan ni ndo ya vaꞌa, ya ndaa nuu ra, ta tixin mií Tata yo Jesucristo kua ikan ndo saa, ta saa kua kaꞌan vaꞌa ni naꞌa xaꞌa Ndioxi, ta ndikunuu vaꞌa ni ya toꞌo ra.

2 Corintios 9:8

Ta ndee ni ndee kúu mií Ndioxi ya kuchiñu chindee ra ndóꞌo̱, taxi ra kuaꞌa ni ya vaꞌa ndaꞌa ndo, ya ná koo ñaꞌa xíniñuꞌu ndo nuu ndo ndiꞌi saa ichí, ta nda ndoo ndoso ka ya nuu ndo ya kuchiñu ndo ikan ni ndo ndá ka ya vaꞌa ni xiꞌin naꞌa.

1 Pedro 4:2

xaꞌa ya íyo ndúvi na ya xaa súvi na ya kúni mií Ndioxi tiempo ya táxi ra táku ka na ñuu ivi yóꞌó, ta köo íyo ka na tá kuꞌva kúni mií ikin kuñu na.

HEBREOS 10:36

Ta xaꞌa ndee ni ini ndo tá ñúꞌu ndo nuu tindoꞌo, saa chi saa kua xáa súvi ndo ya kúni Ndioxi, ta saa niꞌi ndo ya ki̱ndoo ra taxi ra ndaꞌa ndo.

1 Tesalonicenses 5:23

Ta mií Ndioxi, ra táxi koo vaꞌa ni ini yo ná xaa i̱í ni ra ndiꞌi ni kúu ya vaꞌa ndo xiꞌin ya xínituni ndo xiꞌin ikin kuñu ndo. Saa ná chivaꞌa ra ndóꞌo̱, nda iin kuachi ná küu mií ndo tá kivi ná ndiko koo tuku Tata yo Jesucristo kixi ra ñuu ivi yóꞌó.

Judas 1:25

Ná xaa kaꞌnu ni yo Ndioxi chi iin mituꞌun mií ra ku Ndioxi ra ndíchi ni, ra síkaku yoo, saa ná kunuu sukun ni ya toꞌo ra nuu luvi ni íyo ra, nuu ndee ni xáꞌnda chiñu ra xiꞌin ndiꞌi ndai kúu mií ra vitin tin ndiꞌi saa kúu kivi ya vaxi. Saa ná koo.

1 Juan 2:17

Ta ñuu ivi yóꞌó xiꞌin ndiꞌi ñaꞌa kúu mií ya síkutoo ya yoo, vaxi kivi ta ndiꞌi xaꞌa ndiꞌi ya. Sundi na xáa súvi ya kúni Ndioxi ta nda iin kivi ndïꞌi xaꞌa na, kutaku na xiꞌin ra ndiꞌi saa tiempo.

1 Timoteo 1:17

Xaꞌa ya ikán kua, ¡ná xaa kaꞌnu ni yo Ndioxi, ná xaa toꞌo ni yo ra! ¡Chi nda xi̱naꞌa táku ra ta saa kutaku ra ndiꞌi saa kivi ya vaxi, nda iin yo köo kúchiñu kuni xiꞌin nuu yo ra, ta mií ra ku ra xáꞌnda chiñu nuu ndiꞌi ni kúu yo! ¡Iindaa mií ra ku Ndioxi ra ndaa ni, ra ndíchi ni! ¡Saa ná koo ya!

Efesios 2:10

Chi mií Ndioxi ku ra si̱kuaꞌa yoo. Tixin Jesucristo kua i̱kan ra saa xiꞌin yo ya ná ikan yo ya vaꞌa, ya xa chi̱tuni mií ra ikan ra xiꞌin yo. Ta saa kuchiñu yo xaa súvi yo ndiꞌi ya.

El Apocalipsis 5:9

Saa xa̱á kumi saa ya táku ikán xiꞌin oko kumi saa na xikuaꞌa, xíta na iin yaa xa̱á nuu kiti Levo loꞌo ikán, káchi na saa: Yóꞌo̱ ku un kúu mií ichí tiin un tutu ñaa. Ta kúu mií un ichí kaꞌnda un uxa saa sello kixin kúu mií ya. Saa chi yóꞌo̱ ku un ndi̱soko xiꞌin mií nuu Ndioxi, si̱tikueꞌe ni na yóꞌo̱, ta xa̱ꞌni na yóꞌo̱, ndi̱xiꞌi un. Ta xiꞌin nií un nduta ndi̱xita, cha̱ꞌvi un xaꞌa kuachi na ñuu ivi, ya kuchiñu na nduu na seꞌe Ndioxi. Cha̱ꞌvi un xaꞌa ndiꞌi ni kúu nuu naꞌa, xiꞌin ndiꞌi ni kúu na káꞌan ndá ka inka nuu tuꞌun. Saa i̱kan un xaꞌa ndiꞌi ni kúu na ndóo ndiꞌi saa ñuu vali tin ñuu naꞌnu ya ñúꞌu ndiꞌi ni kúu ñuu ivi.

1 Juan 3:22

Ta saa ndá ñaꞌa ndúku yo nuu ra ta taxi ra ya ndaꞌa yo, saa chi xáa súvi yo ya káꞌan ra xiꞌin yo. Ta íkan yo ya vaꞌa nuu ra tá kuꞌva kúni mií ra.

HEBREOS 13:16

Ta ndïndoso ini ndo ya ikan ndo ya vaꞌa xiꞌin taꞌan ndo. Saa chindee ndo na taꞌan ndo xiꞌin ya kúu mií ndo, saa chi tá íkan ndo saa ta tá íin ya sóko ndo nuu Ndioxi saa íin ya íkan ndo, ta kúvaꞌa ni ini Ndioxi xiꞌin ya íkan ndo.

1 Timoteo 6:16

Ta iin mituꞌun mií Ndioxi ku ra táku ndiꞌi saa kivi, köo xíꞌi ra yáꞌa ni vi yéꞌe̱ nuu íyo ra, yakan nda iin na köo kúchiñu kuyati nuu ra. Ta nda iin naꞌa täꞌan kuni xiꞌin nuu na ra, ta ni küvi kuni na ra. Ná ndikiꞌin ni ra ikán ya toꞌo, ta saa ná xaa kaꞌnu ni ndiꞌi naꞌa ra, saa chi yáꞌa ni ndee kúu mií ra, ta ndiꞌi saa kivi kuu mií ra ya! Saa ná koo.

1 Timoteo 5:10

Ta saa tu ná ndóso vaꞌa tuꞌun xaꞌa ya íkan ná ya vaꞌa, ta vaꞌa ni xi̱ndaa ná seꞌe ná, ta saa ndi̱kuiso vaꞌa ni ná na xáa veꞌe ná, ta ndi̱kata ná xaꞌa nda ñani yo xiꞌin ná kuꞌva yo, saa chi̱ndee taꞌan ná xiꞌin naꞌa tá xi̱ñúꞌu na nuu tindoꞌo, ta vaꞌa ni i̱kan ná xiꞌin ndiꞌi naꞌa.

1 Tesalonicenses 3:13

Ta káꞌan ni nde xiꞌin Ndioxi ya ná chindee ra ndóꞌo̱ koo tuun ni tuꞌun ra nima ndo, saa nduu ndo naꞌa, na i̱í ni, na köo nda iin kuachi kúu mií nuu Iva yo Ndioxi. Ta saa kua koo ndúvi ndo, tá ná ndiko koo tuku Tata yo Jesucristo kixi ra xiꞌin ndiꞌi na ñuu ra, na i̱í.

Colosenses 4:12

Saa tu ra Epafras, ra ñuu mií ndo, tíꞌvi ni ra tuꞌun mani xaa nuu ndo. Ta ndiꞌi saa ichí ndee ni káꞌan ra xaꞌa ndo xiꞌin Ndioxi ya ndee ni ná koo vaꞌa ndo, ta ná kuaꞌnu ni ka ndo xiꞌin tuꞌun Ndioxi ya kundaa vaꞌa ini ndo xiꞌin ya, saa xaa súvi ndo ya kúni mií Ndioxi.

Colosenses 3:17

Ta ndiꞌi ñaꞌa íkan ndo án ya káꞌan ndo, ta vaꞌa ikan ndo ndiꞌi ya xaꞌa ya chinuu vaꞌa ndo tuꞌun mií Tata yo Jesús, saa taxi ni ndo tixaꞌvi ndaꞌa Iva yo Ndioxi.

Filipenses 4:18

Ndixaꞌvi ni ndo xaꞌa ya ti̱ꞌvi ndo ndaꞌa i chi̱ndee ni ndo yeꞌe chi vitin ta xa íyo ndiꞌi ya xíniñuꞌu i, köo ka ya kúmani nuu i, nda ndóo ndoso ka ya nuu i, saa chi xa ndi̱kiꞌin i ya ti̱ꞌvi ndo vaxi xiꞌin ra Epafrodito, ñani yo. Ta tá káa ya luvi xáꞌan sóko ndo nuu Ndioxi saa káa ya, ta Ndioxi kúsini ni ra xiꞌin ndo.

Efesios 2:18

Ta vitin xaꞌa ya i̱kan Jesucristo xaꞌa yo kua vaꞌa kuchiñu ndiꞌi ndaa yo kuyati yo nuu Iva yo Ndioxi tixin ndee Tachi I̱í ra.

San Mateo 28:20

Saa sinaꞌa ndo na ya ná xaa súvi ndiꞌi na ya ndi̱kaꞌan i xiꞌin ndo. Ta ná kundaa ini ndo, chi yeꞌe, ta ndiꞌi saa kivi koo i xiꞌin ndo, iin saa nda ná ndiꞌi xaꞌa ñuu ivi ―káchi Jesús xiꞌin nda xi̱taꞌan xiꞌin ra. Saa ná koo.

San Mateo 6:13

Täxi un ndikava nde ndaꞌa ya väꞌa, chindee un ndeꞌe nuu ya väꞌa. Chi yóꞌo̱ ku ra xáꞌnda chiñu, yóꞌo̱ ku ra kúu mií ndee ta ndiꞌi naꞌa xáa kaꞌnu yóꞌo̱ ndiꞌi saa kivi ya vaxi. Saa ná koo ya”. Soꞌva kachi ndo xiꞌin Ndioxi ―káchi Jesús xiꞌin na.

El Apocalipsis 5:13

Ta saa xi̱ni soꞌo i ndiꞌi ya si̱kuaꞌa Ndioxi, ya íyo nuu ndivi tin ya íyo ñuu ivi yóꞌó xiꞌin ya íyo tixin ñuꞌú tin ya íyo ini nduta ñûꞌu, xa̱á ndiꞌi ya xáa kaꞌnu ya ra chee ra índuꞌu nuu tai toꞌo xiꞌin kiti Levo loꞌo ikán, káchi ya saa: Ná kunuu vaꞌa ni ya toꞌo ra, ta ná kaꞌan vaꞌa ni yo xaꞌa ra, chi ndee ni ndee kúu mií ra ta nda iin ichí ndïꞌi xaꞌa chiñu kúu mií ra índuꞌu nuu tai toꞌo, ta saa tu kiti levo loꞌo va, káchi ya si̱kuaꞌa Ndioxi.

El Apocalipsis 4:6

Ta suvi maꞌñu nuu ndíchi tai toꞌo ikán, xi̱ni i ndíkaa nduta ñûꞌu kuíi̱ ka vi rá, tá káa iin yuyu yéꞌe̱ nda inka ñaꞌñu ya, saa kuíi rá. Ta suvi maꞌñu nuu ndíchi mií tai toꞌo ikán ndi̱kava nduu kumi ya táku, ta kumi saa ya kúu mií ya nina nduchi nuu kándika ya tin sata ya.

HEBREOS 12:23

Ta ñuu ikán ku nuu ndi̱kitaꞌan ndo xiꞌin na núnu̱ú na kúu seꞌe Ndioxi, ta na ikán ta xa íyo kivi na nuu tutu ra, na íin tá íin tachi, na ndi̱xiyo ivi na vaꞌa ni, na ndu̱u tá íin naꞌa, na köo ka kuachi kúu mií nuu Ndioxi, na xa nda̱sa i̱í ra. Na ikán ku na xa ndi̱xaa nuu ra xaꞌa ya kúu ra, ra xáa nani kuachi xiꞌin na.

1 Tesalonicenses 4:3

Chi Ndioxi ta kúni ra ya ná nduu ndo naꞌa, na i̱í nuu ra iin iin kivi, ta ná kuxika ndo nuu ndiꞌi kuachi kini íyo ñuu ivi yóꞌó.

Colosenses 3:20

Ta saa ndóꞌo̱, na vali, xaa súvi ni ndo ya káꞌan iva siꞌí ndo xiꞌin ndo, chi tá íkan ndo saa kua xáa sií ni ndo ini Tata yo Jesucristo.

Filipenses 2:11

Ta ndiꞌi ni kúu naꞌa ndikuni ra ta kaꞌan na xaꞌa ra, kachi na saa: “Jesucristo ku ra Chee ni xáꞌnda chiñu nuu ndiꞌi yo”, kachi na. Ta saa kua ndikunuu sukun ni ya toꞌo Iva yo Ndioxi nduu chee ni ya.

Gálatas 1:5

Ta saa ná kunuu vaꞌa ni tuꞌun Ndioxi, ná kunuu sukun ni ya toꞌo ra ndiꞌi saa kúu ichí. Saa ná koo.

ROMANOS 11:36

Mií Ndioxi ku ra si̱kuaꞌa ndiꞌi ni kúu ñaꞌa ya íyo, xaꞌa mií ra si̱kuaꞌa ra ndiꞌi ya, ta ndiꞌi ya ndi̱kuaꞌa íyo ya xaa súvi ya kúni mií ra. ¡Yakan kua ná kunuu vaꞌa ni ya toꞌo ra ndiꞌi saa tiempo! Saa ná koo.

2 Pedro 3:18

Ta ndóꞌo̱ xíniñuꞌu ndo kunitaꞌan vaꞌa ka ndo xiꞌin Tata yo Jesucristo, ra síkaku yoo, ra kúꞌvi ni ini xíni yoo. Ta ná xaa kaꞌnu ni yo ra ndiꞌi saa kivi xiꞌin ndiꞌi kivi ya vaxi. Saa ná koo.

ROMANOS 16:27

Iindaa mituꞌun ku Ndioxi, ta iin mií ra ku ra ndíchi ni. Saa ná kunuu vaꞌa ni ya toꞌo ra ndiꞌi saa kivi ya vaxi, xaꞌa ya i̱kan Jesucristo. Saa ná koo.

San Juan 17:23

Yeꞌe ku ra íyo xiꞌin na yóꞌó, ta yóꞌo̱ ku un íyo xiꞌin yeꞌe, yakan vaꞌa ni nduu na iin yuꞌu xiꞌin taꞌan na, ta saa kua kundaa ini na ñuu ivi yóꞌó, ya ti̱ꞌvi un yeꞌe vaxi i. Ta kuni na ya kúꞌvi ni ini un xíni un na ndíkun yeꞌe, tá kuꞌva kúꞌvi ini un xíni un yeꞌe, saa kúꞌvi ini un xíni un na.

San Juan 7:17

Tá ndá ndo chíkaa ini xaa súvi ya kúni Ndioxi, ta vaꞌa kundaa ini ndo xaꞌa ya sínaꞌa i, án ya vaxi nuu Ndioxi kua án ya xáa xiní mií i kua káꞌan i xiꞌin ndo.

San Mateo 21:31

Ta vitin, ¿unkua túvi ndóꞌo̱? ¿Unku seꞌe ra yóꞌó xa̱a súvi ya ndi̱kaꞌan ra? ―káchi Jesús. Saa ndi̱kuiin na káꞌan na: ―Ra núnu̱ú ku ra xa̱a súvi chiñu ya kúni iva ra ―káchi na. Saa ndi̱kaꞌan Jesús xiꞌin na, káchi ra: ―Ya ndaa káꞌan i xiꞌin ndo, naꞌa na ndíkaya xuꞌun nuu gobierno ñuu Roma xiꞌin ná ñaꞌa ná xíko mií, na yóꞌó ku na xiꞌna kuakiꞌvi ichí nuu xáꞌnda chiñu Ndioxi, nuu ndóꞌo̱.

San Mateo 7:21

Saa káꞌan tuku Jesús, káchi ra saa: ―Íyo naꞌa káꞌan xiꞌin i: “Yóꞌo̱ ku ra chee, ra xáꞌnda chiñu nuu nde”, káchi na xiꞌin i. Sundi süvi ndiꞌi na ikán ku na kiꞌvi koo nuu xáꞌnda chiñu Ndioxi. Ndisaa na xáa súvi ya káꞌan Iva i Ndioxi ra íyo nuu ndivi ku na kiꞌvi koo xiꞌin ra.

San Mateo 12:50

Saa chi ndiꞌi na íkan ya kúni Iva i Ndioxi, ra íyo nuu ndivi, ta na ikán ku ñani i xiꞌin kuꞌva i tin siꞌí i ―káchi Jesús.

2 Timoteo 3:17

Ta saa kua kuchiñu nduu yo naꞌa, na xa íyo ndúvi, na xa si̱kuaꞌa xaa súvi chiñu vaꞌa nuu Ndioxi.

HEBREOS 12:28

Nuu xáꞌnda chiñu Ndioxi, nuu koo yo xiꞌin ra kua ndoo koo chi küvi kanda ya ikán kutaꞌa ya. Yakan kua ná taxi ni yo tixaꞌvi ndaꞌa ra, ta saa ná xaa kaꞌnu ni yo ra tá kuꞌva kútoo mií ra, xaꞌa ya íꞌvi yo xíni yo ra.