HEBREOS 1:14 - Xochapa Mixteco14 Ta na tatun Ndioxi ta xa síin va ku na, chi na ikán ta tachi va ku na xíka na chiñu nuu ra, tíꞌvi ra na kuaꞌan na chindee na naꞌa, na sikaku ra. Gade chapit la |
HEBREOS 1:14
65 Referans Kwoze
Tá ke̱e nda ndíchi ikán kuanuꞌu nda, ta ñǔu saa ndi̱kixi ra José, saa ndi̱xani ra ndi̱tuvi iin tatun ke̱e nuu Ndioxi nuu ra káꞌan ya xiꞌin ra, káchi ya saa: ―Kuándikoo, ta ndikiꞌin un ra loꞌo kuꞌun xiꞌin un xiꞌin siꞌí ra, ta kama ni koo ndo kunu ndo kuꞌun ndo xiꞌin ra ñuu Egipto. Ikán koo ndo nda kivi ná kaꞌan i xiꞌin ndo, saa ndiko koo ndo, saa chi ndinduku ra rey Herodes ra loꞌo, chi kúni ra kaꞌni ñaꞌa ra ―káchi tatun Ndioxi ikán xiꞌin ra José.
Saa xi̱ni i iin Levo loꞌo ndíchi ri yati nuu íin tai toꞌo ikán. Ta ndíchi tai toꞌo ikán maꞌñu kumi saa ya táku xiꞌin oko kumi saa na xikuaꞌa. Ta Levo loꞌo ikán tá náꞌa kiti ndi̱xiꞌi ndi̱soko naꞌa nuu Ndioxi, saa náꞌa ri. Ta íyo uxa ndikin ri tin íyo uxa nduchi nuu ri. Ta uxa nduchi nuu ri tin uxa ndikin ri ku ya káꞌan xaꞌa uxa tachi Ndioxi, ya ti̱ꞌvi ra kuaꞌan ndiꞌi ni kúu xaꞌa ñuu ivi yóꞌó.
Ta ya ta̱xi Ndioxi ku̱ndaa ini nda ndi̱kaꞌan tuꞌun yuꞌu ra xaꞌa, ta süvi xaꞌa mií nda kua ndi̱kaꞌan ya, xaꞌa yoo kua ndi̱kaꞌan ya. Ta taꞌan ya ikán ku tuꞌun vaꞌa xaꞌa Tata yo Jesucristo ya ndi̱kaꞌan ndoso inka nda xiꞌin ndo tixin Tachi I̱í Ndioxi ya ke̱e nuu ndivi. Ta nda mií na tatun Ndioxi ta kútoo ni na kuni na ya vaꞌa ikan Ndioxi xiꞌin yo.
Ta xíka tu ini i ya xíniñuꞌu i sindiko koo i ra ñani yo, ra Epafrodito xaa ra nuu ndo. Ndee ni xa̱a chiñu ra xiꞌin i, nda tá kuꞌva íkan nda lapa ndee ni xáa chiñu nda, kuꞌva saa xa̱a chiñu ra xiꞌin i. Ta ndi̱xaꞌvi ni ndo ya ti̱ꞌvi ndo ra ki̱xi ra nuu i chi̱ndee taꞌan ra xiꞌin i, ta̱xi ra ñaꞌa ya xíniñuꞌu i ndaꞌa i.
Chiñu kúu mií i kua xáa chiñu i nuu Jesucristo. Tá káa iin sutu káa i káꞌan ndoso i tuꞌun vaꞌa xaꞌa ra xiꞌin naꞌa, na köo kúu judío, ya kuchiñu na kuyati na nuu ra. Ta saa nduu na tá íin ñaꞌa ya sóko i nuu Ndioxi, ta vaꞌa ni ndikuiso ra na, saa chi xa ndi̱kaxin mií Tachi I̱í Ndioxi na, ta xaꞌa mií ra kua ndi̱kaxin ya na.
Ta saa tu ndóꞌo̱ va ñani yo, ndo íyo ná síꞌi, ndíchi ni va ndikani ini ndo ndá kuꞌva xíniñuꞌu koo vií ndo xiꞌin ná síꞌi ndo. Ta xaa toꞌo ndo ná, saa vívií ndikani vaꞌa ini ndo koo ndo xiꞌin ná tá kuꞌva i̱í ni íyo kisi ya ndasun ni, kuꞌva saa xíniñuꞌu ndo ikan ndo xiꞌin ná. Chi iin káchi ndi̱niꞌi taꞌvi tu ná ñaa va xiꞌin ndo ya niꞌi ná ya vaꞌa nuu Ndioxi kutaku ná xiꞌin ra. Tá íkan ndo saa xiꞌin ná síꞌi ndo, ta köo ñaꞌa kasi nuu tuꞌun ya káꞌan ndo xiꞌin Ndioxi, tá káꞌan ndo xiꞌin ra, ta kuni soꞌo ra ya káꞌan ndo.
Ñani mani xiꞌin kuꞌva yo, ndóꞌo̱ ku ndo kúꞌvi ni ini i xíni i, ta kuni soꞌo ndo ya kaꞌan i xiꞌin ndo: Ndioxi ku ra ndi̱kaxin na ndaꞌvi ndóo ñuu ivi ya ná nduu na naꞌa, na ndinuꞌu ni ini ndáa ini xíni ra xiꞌin ndiꞌi nima na, ta saa ndikiꞌin na ya ndi̱kaꞌan ra taxi ndaꞌa na kúꞌvi ini xíni ra, saa koo na kaꞌnda chiñu na xiꞌin ra.
Ta ndee ni ka chiñu ya ta̱xi Ndioxi ndaꞌa Tata yo Jesucristo nuu chiñu ya ku̱u mií nda sutu naꞌnu ni ñuu ivi yóꞌó. Ta vaꞌa ni ka ya ta̱xi ra ndaꞌa Tata yo Jesucristo chi si̱kitaꞌan mani ra yoo ndi̱kitaꞌan vií yo xiꞌin Ndioxi, yakan vaꞌa ni ka ke̱e yo xiꞌin ya yóꞌó nuu ya yata, ya ki̱ndoo Ndioxi xiꞌin ra Moisés xi̱naꞌa.
Tá tu xíniñuꞌu kuvi i xaꞌa Cristo, ta xa íyo ndúvi va i ikan i saa, ta kúsini ni i chi kuvi i nuu Ndioxi ya soko i mií i nuu ra, ta nduu i tá kuꞌva káa nduta, rá sóko na nuu ra, nuu chindee taꞌan i xiꞌin ndo sixinu i ya sóko ndo nuu ra xaꞌa ya ndee ni kándixa ndo ra. Xaꞌa ya ñaa kua kúsini ni i ikan i ndá ka ñaꞌa xaꞌa ndo.
Ta xaꞌa ya kúu yo seꞌe Ndioxi, yakan niꞌi yo ñaꞌa ya taxi ra ndaꞌa yo, tá kuꞌva íkan iin taa, ndítaꞌvi ra ñaꞌa ra xiꞌin seꞌe ra. Saa chi̱tuni Iva yo Ndioxi ikan ra xiꞌin ndiꞌi yo kúu seꞌe ra. Ta ndiꞌi ya vaꞌa ta̱xi ra ndaꞌa seꞌe ra Jesucristo, iin káchi saa niꞌi yo ya xiꞌin ra nuu ndivi nu̱nù. Tá tu xáꞌa ndee ini yo ndoꞌo yo xaꞌa ra, ta saa niꞌi tu yoo va ya vaꞌa xiꞌin ra nuu ndivi.
Xaꞌa ya ndíchi ni xi̱ní mií na ñuu ivi yóꞌó túvi na, yakan kua köo ndi̱xiin na kandixa na Ndioxi. Xaꞌa ya ikán kua vaꞌa ka si̱kaku Ndioxi naꞌa, na kándixa tuꞌun ya ndi̱tuꞌun nde xaꞌa Jesucristo xiꞌin na. Vani kuaꞌa ni naꞌa ndíkani ini xaꞌa tuꞌun ya ndi̱kaꞌan nde xiꞌin na, tuꞌun kíꞌvi va kua túvi na.
Tá tu saa ndo̱ꞌo na tiempo ikán, ta ndisaa ka vi yo ndóo vitin ndee ni ka tixuꞌvi yo, tá tu köo xíin yo kundikun yo ichí nuu kaku yo ya táxi Ndioxi ndaꞌa yo. Saa chi ya yóꞌó kua ndixa ni ka chee íkan Ndioxi xiꞌin yo. Ta xiꞌna mií Tata yo Jesucristo ku ra ndi̱kaꞌan xiꞌin naꞌa xaꞌa ichí ikán, sindiꞌi, ndi̱kaꞌan na ikán xiꞌin yo, chi xi̱ni na ya ndaa kua ndi̱kaꞌan ra, yakan ndi̱kani na ya nuu yo.
Piblisite