Gálatas 4:5 - Xochapa Mixteco

⁵ Saa i̱kan Ndioxi ti̱ꞌvi ñaꞌa ra ki̱xi ra ya chindee ra yoo saña yo ndaꞌa ley ya ta̱a ra Moisés, ta ndi̱kuiso ra yoo ndu̱u yo seꞌe ra.

Gálatas 4:5 Referans Kwoze

HEBREOS 9:15

Xaꞌa ya yóꞌó kua ndi̱xiꞌi Jesucristo xaꞌa yo, ta si̱kitaꞌan mani ra yoo ivi yóꞌó xiꞌin Ndioxi, nuu ki̱ndoo ra iin trato ya vaꞌa ni, ya xa̱á xiꞌin yo, ta ikán ku nuu ndo̱o kuachi yo ya i̱kan yo tixin trato ya yata ki̱ndoo Ndioxi xiꞌin yo tá núnu̱ú. Ta vitin kuchiñu niꞌi ndiꞌi yo ya vaꞌa ki̱ndoo Ndioxi taxi ra ndaꞌa yo ka̱na ra kundikun ñaꞌa.

Efesios 1:5

Xaꞌa ya kúꞌvi ni ini ra xíni ra yoo kua ndi̱kaxin ra yoo, saa ndi̱kuiso ndaꞌvi ra yoo ndu̱u yo seꞌe ra tixin Jesucristo. Chi saa chi̱tuni mií ra i̱kan ra xiꞌin yo, ta kúsini ni ra xaꞌa ya i̱kan ra saa xiꞌin yo.

Efesios 1:7

Ta ya kuchiñu ra sikaku ra yoo kua cha̱ꞌvi Jesucristo xaꞌa kuachi yo xiꞌin nií ra nduta ndi̱xita nuu cruzin tá ndi̱xiꞌi ra. Saa ku̱u nuu ndi̱saña yo ki̱ndoo ndíka yo nuu ya väꞌa, ya xa̱ꞌnda chiñu nuu yo. Xaꞌa ya kaꞌnu ni ini Ndioxi kua i̱kan ra saa xiꞌin yo.

El Apocalipsis 5:9

Saa xa̱á kumi saa ya táku ikán xiꞌin oko kumi saa na xikuaꞌa, xíta na iin yaa xa̱á nuu kiti Levo loꞌo ikán, káchi na saa: Yóꞌo̱ ku un kúu mií ichí tiin un tutu ñaa. Ta kúu mií un ichí kaꞌnda un uxa saa sello kixin kúu mií ya. Saa chi yóꞌo̱ ku un ndi̱soko xiꞌin mií nuu Ndioxi, si̱tikueꞌe ni na yóꞌo̱, ta xa̱ꞌni na yóꞌo̱, ndi̱xiꞌi un. Ta xiꞌin nií un nduta ndi̱xita, cha̱ꞌvi un xaꞌa kuachi na ñuu ivi, ya kuchiñu na nduu na seꞌe Ndioxi. Cha̱ꞌvi un xaꞌa ndiꞌi ni kúu nuu naꞌa, xiꞌin ndiꞌi ni kúu na káꞌan ndá ka inka nuu tuꞌun. Saa i̱kan un xaꞌa ndiꞌi ni kúu na ndóo ndiꞌi saa ñuu vali tin ñuu naꞌnu ya ñúꞌu ndiꞌi ni kúu ñuu ivi.

HEBREOS 9:12

Ta Jesucristo ndi̱kiꞌvi ra ini veꞌe ñuꞌu ikán nuu ndíkaa Cuarto ya ndee ni I̱í, ta köo ndi̱kiꞌvi ra xiꞌin nií tixuꞌu ni xiꞌin nií kiti cerra vali. Sundi xiꞌin nií mií ra kua ndi̱kiꞌvi ra. Ta iindaa mituꞌun ichí kua i̱kan ra saa, ta ya i̱kan ra saa ta ndáa yaꞌvi ni ya, chi ikán ku nuu sa̱ña ra yoo, ndi̱saña ndika yo kuaꞌan yo ndiꞌi saa tiempo, ta nda iin ka ichí küñuꞌu yo ndaꞌa ndee ya väꞌa.

Gálatas 3:13

Chi Cristo ku ra cha̱ꞌvi xaꞌa yo nuu chiꞌña ya ta̱xi ley ya ta̱a Moisés ndaꞌa yo, chi köo ndi̱kuchiñu yo sixinu yo ya káꞌan ley ikán. Xaꞌa ya ikán kua cha̱ꞌvi Jesucristo xaꞌa yo chi ndi̱xaꞌa ndee ini ra si̱kuiso ra chiꞌña xiꞌin mií ra, saa ku̱chiñu ra ki̱ndaa ra chiꞌña sata yo. Chi saa káꞌan mií tuꞌun Ndioxi, káchi ya saa: “Ndiꞌi naꞌa, na tíkaa ikin kuñu nuu itun cruzin, ta na ndíso chiꞌña ku na”, káchi ya.

ROMANOS 8:23

Ta süvi ndisaa ñaꞌa si̱kuaꞌa Ndioxi tíxuꞌvi, nda mií yo kándixa Jesucristo tíxuꞌvi ni. Saa chi tá táku ka yo ñuu ivi yóꞌó, ta xa ta̱xi Ndioxi Tachi I̱í ra ndaꞌa yo. Xiꞌin ya yóꞌó káꞌan ra xiꞌin yo niꞌi ka yo ñaꞌa ya ndi̱kaꞌan ra taxi ra ndaꞌa yo. Ta vitin ndátun yo tin xáku yaa mií yo, saa ndátun ni yo ya ndikuiso mani ra yoo nduu yo seꞌe ra ta saa ndasa xa̱á ra ikin kuñu yo.

Gálatas 4:7

Yakan vitin ra köo xáꞌnda chiñu ka ya ndínaꞌa na ñuu ivi yóꞌó, nuu yo. Chi vitin ra seꞌe Ndioxi ndu̱u yo tixin Jesucristo, ta xaꞌa ya ndu̱u yo seꞌe Ndioxi ta kúu mií yo ichí ndikiꞌin yo ndiꞌi ya kuika kúu mií Ndioxi.

Gálatas 3:26

Chi xaꞌa ya kándixa yo Jesucristo kua ndúu ndiꞌi yo seꞌe Ndioxi vitin.

ROMANOS 9:4

Yakan kúsuchi ni ini i xíni i na, chi seꞌe sikua ra Israel kuu na, ta Ndioxi ndi̱kaxin ra na yóꞌó ya kuu na seꞌe ra. Ta xa si̱naꞌa ra ya vaꞌa luvi ni yéꞌe̱ kúu mií ra nuu na. Ki̱ndoo ra ikan ni ra ya vaꞌa xiꞌin na, ta saa tu na seꞌe ñani sikua va ra. Ta ndaꞌa na ñuu i yóꞌó kua ta̱xi Ndioxi ley ra ya kundaa ini na ndá kuꞌva kutaku na nuu ra tin ndá kuꞌva kañuꞌu na ra ini veꞌe ñuꞌu, ta ndi̱kaꞌan Ndioxi xiꞌin na taxi ra ya ki̱ndoo ra xiꞌin na ndaꞌa na.

San Juan 1:12

Sundi tá kúu ndiꞌi na ndíkiꞌin vaꞌa ñaꞌa, ta kándixa na kivi ra. Ta ndaꞌa na ikán kua táxi ra ichí ndúu na seꞌe Ndioxi.

Tito 2:14

Chi ndi̱taxi ra mií ra ndi̱xiꞌi ra xaꞌa yo, ya yóꞌó ku yaꞌvi cha̱ꞌvi ra xaꞌa yo nuu si̱kaku ra yoo ndaꞌa ndee ya väꞌa i̱kan yo, ta nda̱sa vaꞌa ra yoo ndu̱u yo na ñuu mií ra, ya kuchiñu yo ikan yo ya vaꞌa nuu ra.

ROMANOS 8:19

Ta vitin ndiꞌi ñaꞌa si̱kuaꞌa Ndioxi ndátun ni ya, ta kúni ya ná tindaa kíi kivi ya sinaꞌa Ndioxi ya kúu yo seꞌe ra.

Efesios 5:2

Tá kuꞌva íkan Cristo xiꞌin yo, kúꞌvi ni ini ra xíni ra yoo, ta saa xíniñuꞌu ndóꞌo̱ kuꞌvi ni ini ndo kuni taꞌan ndo. Chi xaꞌa ya kúꞌvi ni ini ra xíni ra yoo kua ndi̱soko ra mií ra xaꞌa yo. Tá kuꞌva íkan naꞌa, sóko na kiti levo loꞌo nuu Ndioxi ya xíxi ri nuu ra, saa kuandaa xiko ya támi ni xáꞌan nuu ra. Ta saa i̱kan Cristo xiꞌin yo tá ndi̱xiꞌi ra, ta nda̱a xiko tami ni xaꞌan nuu Ndioxi.

Gálatas 4:21

Sava ndóꞌo̱ ñani yo, ta kúni tuku va ndo ndiko koo ndo xaa súvi ndo ley ya ta̱a ra Moisés ta ¿án köo xíni ndo unkua káꞌan ya?

San Lucas 1:68

Kaꞌnu ni ná koo Ndioxi ra chíndee yoo na Israel, saa chi vaxi ra koto ra yoo saa saña ndíka ra yoo.

HEBREOS 1:3

Ta ya luvi ni yéꞌe̱ kúu mií Seꞌe Ndioxi kua yéꞌe̱ mií Ndioxi. Tá káa níi mií Ndioxi saa káa níi mií Jesucristo, saa ta̱xi Ndioxi ichí ndaꞌa ra ya ndíso chiñu ra xiꞌin ndiꞌi ñaꞌa ya íyo ñuu ivi yóꞌó. Ta xiꞌin tuꞌun ra ya ndee ni ndee kua xáa chiñu ndiꞌi ya nda vitin. Saa ndi̱kata ra kuachi yo xiꞌin ndee mií ra, ta sindiꞌi nda̱a ra nuu ndivi ndi̱kunduꞌu ra ñaꞌñu kuáꞌá Ndioxi nuu tai toꞌo, xáꞌnda chiñu ra xiꞌin ra.

San Mateo 20:28

Tá kuꞌva íkan yeꞌe Taa ra xa̱a ñuu ivi yóꞌó, chi yeꞌe ta köo vaxi i ya kaꞌnda i chiñu nuu naꞌa, sundi yeꞌe ta vaxi i ya koto vií i xiꞌin na saa xaa súvi i chiñu nuu na, ta saa kua kuchiñu na saña ndika na xaꞌa kuachi na ―káchi Jesús.

Los Hechos 20:28

Ta ndóꞌo̱ ku ndo ndi̱kaxin Tachi I̱í Ndioxi ya kundiso chiñu ndo xiꞌin na veꞌe ñuꞌu. Tá íkan nda ndáa levo sana nda, saa ikan ndo. Xaa kuenta ni ndo xiꞌin mií ndo tin xaa kuenta ni ndo xiꞌin na kuaꞌan ichí Jesús. Chi na ikán ku na sa̱ta ra xiꞌin ni̱í mií ra nduta ndi̱xita nuu cruzin.

1 Pedro 3:18

Saa chi saa kua ndo̱ꞌo tu mií va Tata yo Jesucristo xaꞌa yo, ndi̱xiꞌi ra xaꞌa kuachi yo, ta iindaa ichí ndo̱ꞌo ra ndi̱xiꞌi ra, ta küvi ka ra. Ra vaꞌa ni ndi̱xiyo ra, ta ndi̱xiꞌi ra xaꞌa ndiꞌi yo ivi kuachi ya kuchiñu kundaka ra yoo kuꞌun yo nuu Ndioxi. Tá ndi̱xiꞌi ra ta ndi̱ꞌi xaꞌa ikin kuñu ra, saa tá ndi̱taku ra xiꞌin ikin kuñu ra ya xa̱á küvi kuni yo.

El Apocalipsis 14:3

Naꞌa, na kuaꞌa ni ikán ku nda taa nda ndíta nuu íyo tai toꞌo nuu íyo Ndioxi, xíta nda iin yaa i̱í xa̱á. Saa íyo kumi saa ya táku ikán xiꞌin oko kumi saa na xikuaꞌa nuu íyo tai toꞌo ikán, ta xíni soꞌo na yaa ya xíta nda ikán. Ta nda iin ka naꞌa köo xíni kata yaa i̱í xíta nda ikán. Ndisaa nda kúu iin ciento uvi xiko kumi mil ikán ku nda xíni kata ya. Ndioxi si̱kaku ra nda ikán tañu naꞌa, na väꞌa íyo ñuu ivi yóꞌó.

ROMANOS 8:14

Saa chi ndiꞌi naꞌa, na táxi xáꞌnda chiñu Tachi I̱í Ndioxi nuu na, na ñaa ku na kúu seꞌe Ndioxi.

ROMANOS 8:15

Saa chi tachi ya ndi̱kiꞌin yo ta süvi ya sindoꞌo naꞌa kua, köo xáꞌnda chiñu ya nuu yo xiꞌin ya uꞌvi, yakan köo xíniñuꞌu yo ku iꞌvi yo sitixuꞌvi Ndioxi yoo. Chi Tachi Ndioxi, ya táku ini yo vitin, ndása ya yoo seꞌe Ndioxi. Ta táxi ya kaꞌan yo xiꞌin ra, kachi yo saa: “Iva mani mií i”, kachi yo xiꞌin ra.

ROMANOS 10:4

Sundi ley Ndioxi ya xa̱ꞌnda chiñu ra nuu na Israel xinaꞌa ta si̱xinu Jesucristo ya, yakan ndiꞌi naꞌa na kándixa Jesucristo, ta Ndioxi ndása vaꞌa ra na, ndúu na naꞌa, na köo ka kuachi kúu mií nuu ra.