Filipenses 3:9 - Xochapa Mixteco

⁹ Chi ndi̱kiꞌin vaꞌa Ndioxi yeꞌe, ta süvi xaꞌa ya xáa súvi i ley ra ya si̱ndoo ra Moisés kua ndi̱kiꞌin vaꞌa ra yeꞌe, xaꞌa ya ndáa ni ini i xíni i Jesucristo kua ndi̱kiꞌin vaꞌa ra yeꞌe, saa nda̱sa ra yeꞌe tá káa iin naꞌa, na köo ka kuachi kúu mií nuu Ndioxi.

Filipenses 3:9 Referans Kwoze

2 Corintios 5:21

Nda iin kuachi köo ndi̱kan Jesucristo, ta xaꞌa kuachi yoo kua si̱kuiso Ndioxi kuachi sata ra, ya ná kuchiñu yoo nduu yo tá íin naꞌa, na köo ka kuachi kúu mií nuu Ndioxi, xaꞌa ya ndi̱kitaꞌan yo xiꞌin Jesucristo.

1 Corintios 1:30

Ta Ndioxi i̱kan ra saa, si̱kitaꞌan ra ndóꞌo̱ xiꞌin Tata yo Jesucristo. Ta mií Tata yo Jesucristo ku ra táxi ya ndíchi ndaꞌa yo, saa ndása tu ra yoo ndúu yo naꞌa, na köo ka kuachi kúu mií nuu ra, ta ndása i̱í ra yoo, saa ndáxin ra yoo ndaꞌa kuachi nuu núꞌni yo.

Gálatas 2:16

Sundi xa xíni yo, nda iin naꞌa, küchiñu ndikitaꞌan vaꞌa xiꞌin Ndioxi xaꞌa ya xáa súvi ni na ley ra. Ndi̱saa xaꞌa ya ndáa ni ini yo xíni yo Jesucristo va kua ndíkuiso vaꞌa ra yoo. Xaꞌa ya ikán kua kándixa ni yo Jesucristo, ya ná kuchiñu yo nduu yo naꞌa, na vaꞌa, na köo ka kuachi kúu mií nuu ra. Ta süvi xaꞌa ya xáa súvi yo ley Ndioxi kua ndíkuiso mani ra yoo nuu ra, chi tá tu xaꞌa ya xáa súvi yo ley ra kua, ta nda iin yo küchiñu ndikundoo vaꞌa xiꞌin ra, ndikuu.

ROMANOS 8:1

Vitin ná kundaa ini yo xaꞌa ya iin ndu̱u yo xiꞌin Jesucristo, ta köo ndíso ka yo kuachi ya tixuꞌvi yo nuu Ndioxi. Ni köo kúu ka yo naꞌa, na íkan ndisaa ya kúni mií ikin kuñu yo, ta ndixa ndíkun yo ichí nuu xáa súvi yo ya vaꞌa kúni Tachi I̱í Ndioxi.

ROMANOS 1:17

Ta tuꞌun vaꞌa xaꞌa Jesucristo kua sínaꞌa yoo ndá kuꞌva kua ndíkuiso vaꞌa Ndioxi naꞌa nuu ra. Saa ndása ra na ivi na vaꞌa, na köo ka kuachi kúu mií nuu ra. Tá kuꞌva káꞌan mií tuꞌun Ndioxi ya ta̱a na xinaꞌa, káchi ya saa: “Naꞌa na ndíkuiso vaꞌa Ndioxi, na ndúu tá íin naꞌa, na köo ka kuachi ku mií nuu ra, na kándixa ni ñaꞌa, na ikán ku na kuchiñu kutaku xiꞌin Ndioxi”, káchi tuꞌun ra.

Tito 3:5

Si̱kaku ra yoo, ta süvi xaꞌa ndá ka chiñu ya vaꞌa i̱kan yo kua i̱kan ra saa xiꞌin yo. Xaꞌa ya kúndaꞌvi ni ini ra xíni ra yoo kua i̱kan ra saa xiꞌin yo. Ta ndi̱kata ra yoo, saa nda̱sa xa̱á ra yoo ndu̱u yo na xa̱á nuu Tachi I̱í ra.

2 Timoteo 1:9

Mií Ndioxi ku ra si̱kaku yoo, saa ka̱na ra yoo ya nduu yo na ñuu ra, na i̱í. Ta süvi xaꞌa ya vaꞌa íkan yo kua i̱kan ra saa xiꞌin yo, xaꞌa ya kúni mií va ra kua. Chi xaꞌa ya vaꞌa ni mií Tata yo Jesucristo kua i̱kan ra saa xiꞌin yo, tá täꞌan ka xa̱á ñuu ivi yóꞌó vi kua i̱kan ra saa xiꞌin yo.

2 Corintios 5:17

Saa chi ndiꞌi yo xa ndi̱kitaꞌan xiꞌin Cristo, ta ndu̱u yo na xa̱á i̱kan Ndioxi. Ndiꞌi kuꞌva ya väꞌa, ya yata ndi̱xiyo ini yo, ta xa ki̱ndoo ndiꞌi ya chí sata.

Filipenses 3:6

Ta xaꞌa ya xa̱a súvi ni i ndiꞌi ichí ya si̱ndoo xii yo xinaꞌa ñuu i, yakan kua ndi̱xika i xa̱a nduvaꞌa ni i xiꞌin na ndíkun Jesucristo, chi süvi na vaꞌa ku na káꞌán i. Nda iin naꞌa ta köo ya ndi̱niꞌi na kaꞌan na xaꞌa i, chi ndaa ni ndi̱xiyo ini i, xaꞌa ya xa̱a súvi ni i ley Ndioxi.

ROMANOS 10:10

Chi tá kándixa un Ndioxi xiꞌin ndinuꞌu nima un, ta saa ndúu un tá íin naꞌa, na vaꞌa na köo ka kuachi ku mií nuu ra, ta sikaku ra yóꞌo̱ tá tu ndinuꞌu ini un káꞌan un kándixa un Jesucristo.

ROMANOS 8:3

Ndioxi i̱kan ra ya vaꞌa xiꞌin yo, ñaꞌa ya köo ndi̱kuchiñu ley ya ta̱a ra Moisés ikan ya xiꞌin yo xaꞌa ya köo ndee kúu mií ikin kuñu yo nuu ya väꞌa. Xaꞌa ya ikán kua ti̱ꞌvi ra Seꞌe ra ki̱xi ra ñuu ivi yóꞌó, ta ndi̱xiyo ikin kuñu ra tá kuꞌva íin mií yo ivi yóꞌó. Ti̱ꞌvi Ndioxi ra ki̱xi ra ndi̱soko ra mií ra xaꞌa kuachi yo, ta saa ku̱chiñu ra si̱ndiꞌi xaꞌa ra ndee ya kúu mií kuachi yo nuu Ndioxi.

San Mateo 9:13

Xíniñuꞌu ndo kundaa vaꞌa ini ndo unkua kúni kachi Ndioxi nuu tuꞌun ra, ya káchi saa: “Kúni i ná kundaꞌvi ni ini ndo kuni ndo inka naꞌa, chi ya ñaa ka kua ndee ni ndee nuu ñaꞌa ya sóko ndo nuu i”, káchi tuꞌun Ndioxi. Saa chi yeꞌe, ta växi i xaꞌa na vaꞌa, xaꞌa na väꞌa vaxi i, kaꞌan i xiꞌin na ya ná ndiko koo ini na kundikun na ichí Ndioxi ―káchi Jesús xiꞌin nda fariseo.

1 Juan 3:4

Ta ndiꞌi na íkan ya väꞌa ta yáꞌa tu na ikán va nuu ley Ndioxi. Chi na kuakiꞌvi kuachi xiꞌin ra ta yáꞌa na nuu ley ra.

2 Pedro 1:1

Yeꞌe, Simón Pedro ra xáa chiñu nuu Tata yo Jesucristo ku i táa tutu ya tíꞌvi i xaa ndaꞌa ndóꞌo̱ ñani yo, na xa iin káchi luvi ni kándixa ra tá kuꞌva kándixa mií nde ra. Saa chi mií Tata yo Jesucristo ra síkaku yoo, ra kúu Iva yo Ndioxi ku iin taa ra ndee ni ndaa ini.

Santiago 3:2

Chi ndiꞌi yo ta yo yáꞌa yuꞌú ku ndiꞌi va yo, ta naꞌa, na köo yáꞌa tuꞌun káꞌan, na ñaa ku na xa ndi̱xinu íyo vaꞌa ni nima na xiꞌin ra, yakan kuchiñu na kaꞌnda chiñu na nuu ndiꞌi ikin kuñu na.

HEBREOS 6:18

Uvi nuu ku ñaꞌa ya ki̱ndoo Ndioxi xaa súvi ra: iin ku ya ki̱ndoo ra xiꞌin naꞌa xaa súvi ra ya ndi̱kaꞌan ra xiꞌin na, ta inka kua chi̱naꞌa ra tixin mií ra ya sixinu ra ya ki̱ndoo ra xiꞌin na. Xaꞌa ya ikán kua vaꞌa ná kandixa ni yo ra, ta ná kuyati yo nuu ra ya chindee ra yoo, saa ná kundaa teꞌe ini yo ya ndikiꞌin yo ya ndi̱kaꞌan ra xiꞌin yo taxi ra ndaꞌa yo.

ROMANOS 16:7

Saa kaꞌan ndioxi ni tu ndo xiꞌin ra ñani yo ra Andrónico xiꞌin yá Junias, na taꞌan i ku na ñaa, na judío ku na, ta iin káchi xi̱ñuꞌu na xiꞌin i veꞌe kàà. Ta nda apóstol nda ti̱ꞌvi Ndioxi xaa chiñu nuu ra ku nda. Ta xa yachi ka vi ka̱ndixa na ñaa Jesucristo nuu yeꞌe.

ROMANOS 5:21

Tá täꞌan ka kixi Jesucristo, ta ndee ya kúu mií kuachi na ku ya xa̱ꞌnda chiñu nuu na ta xa̱á ya xáꞌni ya na. Sundi vitin ta ndee ni ka ndee ya vaꞌa ta̱xi Ndioxi xáꞌnda chiñu nuu ndiꞌi yo kándixa Jesucristo xaꞌa ya kúꞌvi ni ini ra xíni ra yoo. Nda̱sa vaꞌa Ndioxi yo nuu ra, ndu̱u yo tá íin naꞌa, na köo ka kuachi kúu mií nuu ra, ta saa ta̱xi ra ya kutaku yo xiꞌin ra ndiꞌi saa kivi ya vaxi.