Filipenses 3:6 - Xochapa Mixteco

⁶ Ta xaꞌa ya xa̱a súvi ni i ndiꞌi ichí ya si̱ndoo xii yo xinaꞌa ñuu i, yakan kua ndi̱xika i xa̱a nduvaꞌa ni i xiꞌin na ndíkun Jesucristo, chi süvi na vaꞌa ku na káꞌán i. Nda iin naꞌa ta köo ya ndi̱niꞌi na kaꞌan na xaꞌa i, chi ndaa ni ndi̱xiyo ini i, xaꞌa ya xa̱a súvi ni i ley Ndioxi.

Filipenses 3:6 Referans Kwoze

Los Hechos 8:3

Saa xa̱á ra Saulo xíka ra kánitaꞌan ra xiꞌin na ndíkun Jesús, kuakiꞌvi ra ini veꞌe na, tá veꞌe, tá veꞌe kuakiꞌvi ra táva ra na, taa ku nda ñaꞌa ku ná, iin ñúu ndai ra na kuaꞌan xiꞌin ra veꞌe kàà.

San Mateo 5:20

Ya ndixa káꞌan i xiꞌin ndo, tá tu köo íkan ndo ya vaꞌa ndinuꞌu nuu Ndioxi, ta küchiñu ndo kiꞌvi ndo koo ndo nuu xáꞌnda chiñu ra. Yakan tá tu kúni ndo kiꞌvi ndo nuu xáꞌnda chiñu ra, ta xíniñuꞌu ndo vaꞌa ni ka ikan ndo ya vaꞌa nuu taꞌan ya íkan nda fariseo xiꞌin nda sínaꞌa ley Ndioxi ―káchi Jesús xiꞌin na.

1 Timoteo 1:13

Chi yachi ta ndi̱kaꞌan ndikuu ni va i xaꞌa Tata yo Jesucristo, saa xa̱a ndu̱vaꞌa ni i xiꞌin na ndíkun sata ra, ta ndi̱kaꞌan kini ni i xaꞌa ra. Vani saa i̱kan i ta ku̱ndaꞌvi ni ini ra xi̱ni ra yeꞌe, saa chi yeꞌe köo ndi̱kundaa ini va ku i, yeꞌe naá nuu va ndi̱xiyo i, yakan i̱kan i saa.

Filipenses 3:9

Chi ndi̱kiꞌin vaꞌa Ndioxi yeꞌe, ta süvi xaꞌa ya xáa súvi i ley ra ya si̱ndoo ra Moisés kua ndi̱kiꞌin vaꞌa ra yeꞌe, xaꞌa ya ndáa ni ini i xíni i Jesucristo kua ndi̱kiꞌin vaꞌa ra yeꞌe, saa nda̱sa ra yeꞌe tá káa iin naꞌa, na köo ka kuachi kúu mií nuu Ndioxi.

1 Corintios 15:9

Chi yeꞌe, ta ra ni̱nu̱ ni kuu i nuu ndiꞌi nda taꞌan i, ni köo ichí i kaꞌan naꞌa xiꞌin i apóstol, saa chi ra xa̱a ndu̱vaꞌa ni xiꞌin naꞌa, na kúu veꞌe ñuꞌu Ndioxi, ndi̱xiyo i.

ROMANOS 7:9

Tá täꞌan kundaa ini i ley ya xáꞌnda chiñu Ndioxi, ta köo ndíkundaa ini i ya íyo kuachi i nuu ra, nda kivi tá ku̱ndaa ini i xaꞌa ley ra, nda kivi saa kú ya xa̱á kútoo i ikan i ya väꞌa nuu ra. Ta xaꞌa kuachi i yóꞌó ku ya ndu̱u i tá káa iin ra xa ndi̱xiꞌi saa ndu̱u i nuu Ndioxi, ta kuachi i ta ndu̱ndee va ya nuu i.

Los Hechos 26:5

Xíni vaꞌa na yeꞌe, tá tu kúni na ndikuiin na xaꞌa ya káꞌan i ta vaꞌa kaꞌan na xaꞌa i, chi yeꞌe ta nda tá xaꞌa vi xa̱á i kándixa ni i ichí na fariseo, saa chi na ikán ku na ndee ni tuun xáa súvi ley ndeꞌe judío.

Los Hechos 21:20

Tá xi̱ni soꞌo na ya ndi̱kaꞌan ra, ta xa̱a toꞌo na Ndioxi. Saa káꞌan na, káchi na saa: ―Ñani yo, xíni mií un kuaꞌa ni mil ku na judío ndi̱kundikun Jesús, ta ndíkundee na káꞌan na ya xíniñuꞌu na xaa súvi na ley ya ta̱a ra Moisés xinaꞌa.

San Lucas 1:6

Ta vaꞌa ni ndi̱xiyo ra Zacarías xiꞌin yá síꞌi ra ka̱ñuꞌu ni na Ndioxi, tá íyo ya ndi̱kaꞌan ra, saa íyo ya i̱kan na. Xaꞌa ya ikán kua köo ndi̱niꞌi ndá ka naꞌa taxi na kuachi xaꞌa ra Zacarías xiꞌin yá síꞌi ra.

San Mateo 23:25

’¡Ndaꞌvi ni ndóꞌo̱ fariseo xiꞌin ndóꞌo̱ maestro sínaꞌa ley Ndioxi! ¡Ndóꞌo̱ uvi yuꞌu ku ndo! chi tá íin na ndíkata sata vaso xiꞌin sata koꞌo nuu xíxi na, saa íin ndo. Chi vaꞌa ni va náꞌa ndo nuu naꞌa, sundi ini ndo ta iin chútu ndaa ya kuiꞌna xiꞌin ya väꞌa.

Los Hechos 22:5

Nda sutu naꞌnu nuu yo xiꞌin na xikuaꞌa ndíso chiñu xiꞌin yo judío ku na xíni vaꞌa xaꞌa ya káꞌan i xiꞌin ndo. Chi na ikán ku na ta̱xi tutu ndaꞌa i ya ndíkuiin xaꞌa i tiin i na ndíkun Jesús ndóo ñuu Damasco, kixi na xiꞌin i ñuu Jerusalén yóꞌó ya ndoꞌo ni na.

1 Corintios 10:32

Ta küvi ikan ndo ñaꞌa xiꞌin na taꞌan yo, ya sindikava ndo ini na, án na judío ku na, án süvi na judío ku na, án na kándixa Tata yo Jesucristo ku na, ta küvi ikan ndo saa xiꞌin na.

Filipenses 2:15

Ta saa ni naꞌa, ta nïꞌi na kuachi ndo ya kaꞌan na xaꞌa ndo, chi seꞌe Ndioxi ku ndo. Vani tañu naꞌa, na kini, na iku ini ndóo ndo, ta tá kuꞌva ndíyeꞌe kiti kimi nuu naá, saa ndiyeꞌe ndo ñuu ivi yóꞌó, chi yóꞌó ta tá káa nuu naá ni, saa káa ya.